២៤. កកុសន្ធពុទ្ធវំសោ

១. វេស្សភុស្ស អបរេន, សម្ពុទ្ធោ ទ្វិបទុត្តមោ;

កកុសន្ធោ នាម នាមេន, អប្បមេយ្យោ ទុរាសទោ.

២. ឧគ្ឃាដេត្វា សព្ពភវំ, ចរិយាយ បារមិំ គតោ;

សីហោវ បញ្ជរំ ភេត្វា, បត្តោ សម្ពោធិមុត្តមំ.

៣. ធម្មចក្កំ បវត្តេន្តេ, កកុសន្ធេ លោកនាយកេ;

ចត្តារីសកោដិសហស្សានំ, ធម្មាភិសមយោ អហុ.

៤. អន្តលិក្ខម្ហិ អាកាសេ, យមកំ កត្វា វិកុព្ពនំ;

តិំសកោដិសហស្សានំ, ពោធេសិ ទេវមានុសេ.

៥. នរទេវស្ស យក្ខស្ស, ចតុសច្ចប្បកាសនេ;

ធម្មាភិសមយោ តស្ស, គណនាតោ អសង្ខិយោ.

៦. កកុសន្ធស្ស ភគវតោ, ឯកោ អាសិ សមាគមោ;

ខីណាសវានំ វិមលានំ, សន្តចិត្តាន តាទិនំ.

៧. ចត្តាលីសសហស្សានំ, តទា អាសិ សមាគមោ;

ទន្តភូមិមនុប្បត្តានំ, អាសវារិគណក្ខយា.

៨. អហំ តេន សមយេន, ខេមោ នាមាសិ ខត្តិយោ;

តថាគតេ ជិនបុត្តេ, ទានំ ទត្វា អនប្បកំ.

៩. បត្តញ្ច ចីវរំ ទត្វា, អញ្ជនំ មធុលដ្ឋិកំ;

ឥមេតំ បត្ថិតំ សព្ពំ, បដិយាទេមិ វរំ វរំ.

១០. សោបិ មំ ពុទ្ធោ ព្យាកាសិ, កកុសន្ធោ វិនាយកោ;

‘‘ឥមម្ហិ ភទ្ទកេ កប្បេ, អយំ ពុទ្ធោ ភវិស្សតិ.

១១. ‘‘អហុ កបិលវ្ហយា រម្មា…បេ… ហេស្សាម សម្មុខា ឥមំ’’.

១២. តស្សាបិ វចនំ សុត្វា, ភិយ្យោ ចិត្តំ បសាទយិំ;

ឧត្តរិំ វតមធិដ្ឋាសិំ, ទសបារមិបូរិយា.

១៣. នគរំ ខេមាវតី នាម, ខេមោ នាមាសហំ តទា;

សព្ពញ្ញុតំ គវេសន្តោ, បព្ពជិំ តស្ស សន្តិកេ.

១៤. ព្រាហ្មណោ អគ្គិទត្តោ ច, អាសិ ពុទ្ធស្ស សោ បិតា;

វិសាខា នាម ជនិកា, កកុសន្ធស្ស សត្ថុនោ.

១៥. វសតេ តត្ថ ខេមេ បុរេ, សម្ពុទ្ធស្ស មហាកុលំ;

នរានំ បវរំ សេដ្ឋំ, ជាតិមន្តំ មហាយសំ.

១៦. ចតុវស្សសហស្សានិ, អគារំ អជ្ឈ សោ វសិ;

កាម -កាមវណ្ណ-កាមសុទ្ធិនាមា [សុចិ សុរុចិ រតិវទ្ធននាមកា (សី.)], តយោ បាសាទមុត្តមា.

១៧. សមតិំសសហស្សានិ, នារិយោ សមលង្កតា;

រោចិនី នាម សា នារី, ឧត្តរោ នាម អត្រជោ.

១៨. និមិត្តេ ចតុរោ ទិស្វា, រថយានេន និក្ខមិ;

អនូនអដ្ឋមាសានិ, បធានំ បទហី ជិនោ.

១៩. ព្រហ្មុនា យាចិតោ សន្តោ, កកុសន្ធោ វិនាយកោ;

វត្តិ ចក្កំ មហាវីរោ, មិគទាយេ នរុត្តមោ.

២០. វិធុរោ ច សញ្ជីវោ ច, អហេសុំ អគ្គសាវកា;

ពុទ្ធិជោ នាមុបដ្ឋាកោ, កកុសន្ធស្ស សត្ថុនោ.

២១. សាមា ច ចម្បានាមា ច, អហេសុំ អគ្គសាវិកា;

ពោធិ តស្ស ភគវតោ, សិរីសោតិ បវុច្ចតិ.

២២. អច្ចុតោ ច សុមនោ ច, អហេសុំ អគ្គុបដ្ឋកា;

នន្ទា ចេវ សុនន្ទា ច, អហេសុំ អគ្គុបដ្ឋិកា.

២៣. ចត្តាលីសរតនានិ, អច្ចុគ្គតោ មហាមុនិ;

កនកប្បភា និច្ឆរតិ, សមន្តា ទសយោជនំ.

២៤. ចត្តាលីសវស្សសហស្សានិ, អាយុ តស្ស មហេសិនោ;

តាវតា តិដ្ឋមានោ សោ, តារេសិ ជនតំ ពហុំ.

២៥. ធម្មាបណំ បសារេត្វា, នរនារីនំ សទេវកេ;

នទិត្វា សីហនាទំវ, និព្ពុតោ សោ សសាវកោ.

២៦. អដ្ឋង្គវចនសម្បន្នោ, អច្ឆិទ្ទានិ និរន្តរំ;

សព្ពំ តមន្តរហិតំ, ននុ រិត្តា សព្ពសង្ខារា.

២៧. កកុសន្ធោ ជិនវរោ, ខេមារាមម្ហិ និព្ពុតោ;

តត្ថេវស្ស ថូបវរោ, គាវុតំ នភមុគ្គតោតិ.

កកុសន្ធស្ស ភគវតោ វំសោ ទ្វាវីសតិមោ.