២៥. កោណាគមនពុទ្ធវំសោ

១. កកុសន្ធស្ស អបរេន, សម្ពុទ្ធោ ទ្វិបទុត្តមោ;

កោណាគមនោ នាម ជិនោ, លោកជេដ្ឋោ នរាសភោ.

២. ទសធម្មេ បូរយិត្វាន, កន្តារំ សមតិក្កមិ;

បវាហិយ មលំ សព្ពំ, បត្តោ សម្ពោធិមុត្តមំ.

៣. ធម្មចក្កំ បវត្តេន្តេ, កោណាគមននាយកេ;

តិំសកោដិសហស្សានំ, បឋមាភិសមយោ អហុ.

៤. បាដិហីរំ ករោន្តេ ច, បរវាទប្បមទ្ទនេ;

វីសតិកោដិសហស្សានំ, ទុតិយាភិសមយោ អហុ.

៥. តតោ វិកុព្ពនំ កត្វា, ជិនោ ទេវបុរំ គតោ;

វសតេ តត្ថ សម្ពុទ្ធោ, សិលាយ បណ្ឌុកម្ពលេ.

៦. បករណេ សត្ត ទេសេន្តោ, វស្សំ វសតិ សោ មុនិ;

ទសកោដិសហស្សានំ, តតិយាភិសមយោ អហុ.

៧. តស្សាបិ ទេវទេវស្ស, ឯកោ អាសិ សមាគមោ;

ខីណាសវានំ វិមលានំ, សន្តចិត្តាន តាទិនំ.

៨. តិំសភិក្ខុសហស្សានំ, តទា អាសិ សមាគមោ;

ឱឃានមតិក្កន្តានំ, ភិជ្ជិតានញ្ច មច្ចុយា.

៩. អហំ តេន សមយេន, បព្ពតោ នាម ខត្តិយោ;

មិត្តាមច្ចេហិ សម្បន្នោ, អនន្តពលវាហនោ.

១០. សម្ពុទ្ធទស្សនំ គន្ត្វា, សុត្វា ធម្មមនុត្តរំ;

និមន្តេត្វា សជិនសង្ឃំ, ទានំ ទត្វា យទិច្ឆកំ.

១១. បដ្ដុណ្ណំ ចីនបដ្ដញ្ច, កោសេយ្យំ កម្ពលម្បិ ច;

សោវណ្ណបាទុកញ្ចេវ, អទាសិំ សត្ថុសាវកេ.

១២. សោបិ មំ ពុទ្ធោ ព្យាកាសិ, សង្ឃមជ្ឈេ និសីទិយ;

‘‘ឥមម្ហិ ភទ្ទកេ កប្បេ, អយំ ពុទ្ធោ ភវិស្សតិ.

១៣. ‘‘អហុ កបិលវ្ហយា រម្មា…បេ… ហេស្សាម សម្មុខា ឥមំ’’.

១៤. តស្សាបិ វចនំ សុត្វា, ភិយ្យោ ចិត្តំ បសាទយិំ;

ឧត្តរិំ វតមធិដ្ឋាសិំ, ទសបារមិបូរិយា.

១៥. សព្ពញ្ញុតំ គវេសន្តោ, ទានំ ទត្វា នរុត្តមេ;

ឱហាយាហំ មហារជ្ជំ, បព្ពជិំ ជិនសន្តិកេ [តស្ស សន្តិកេ (សី.)].

១៦. នគរំ សោភវតី នាម, សោភោ នាមាសិ ខត្តិយោ;

វសតេ តត្ថ នគរេ, សម្ពុទ្ធស្ស មហាកុលំ.

១៧. ព្រាហ្មណោ យញ្ញទត្តោ ច, អាសិ ពុទ្ធស្ស សោ បិតា;

ឧត្តរា នាម ជនិកា, កោណាគមនស្ស សត្ថុនោ.

១៨. តីណិ វស្សសហស្សានិ, អគារំ អជ្ឈ សោ វសិ;

តុសិតសន្តុសិតសន្តុដ្ឋា, តយោ បាសាទមុត្តមា.

១៩. អនូនសោឡសសហស្សានិ, នារិយោ សមលង្កតា;

រុចិគត្តា នាម នារី, សត្ថវាហោ នាម អត្រជោ.

២០. និមិត្តេ ចតុរោ ទិស្វា, ហត្ថិយានេន និក្ខមិ;

ឆមាសំ បធានចារំ, អចរី បុរិសុត្តមោ.

២១. ព្រហ្មុនា យាចិតោ សន្តោ, កោណាគមននាយកោ;

វត្តិ ចក្កំ មហាវីរោ, មិគទាយេ នរុត្តមោ.

២២. ភិយ្យសោ ឧត្តរោ នាម, អហេសុំ អគ្គសាវកា;

សោត្ថិជោ នាមុបដ្ឋាកោ, កោណាគមនស្ស សត្ថុនោ.

២៣. សមុទ្ទា ឧត្តរា ចេវ, អហេសុំ អគ្គសាវិកា;

ពោធិ តស្ស ភគវតោ, ឧទុម្ពរោតិ បវុច្ចតិ.

២៤. ឧគ្គោ ច សោមទេវោ ច, អហេសុំ អគ្គុបដ្ឋកា;

សីវលា ចេវ សាមា ច, អហេសុំ អគ្គុបដ្ឋិកា.

២៥. ឧច្ចត្តនេន សោ ពុទ្ធោ, តិំសហត្ថសមុគ្គតោ;

ឧក្កាមុខេ យថា កម្ពុ, ឯវំ រំសីហិ មណ្ឌិតោ.

២៦. តិំសវស្សសហស្សានិ, អាយុ ពុទ្ធស្ស តាវទេ;

តាវតា តិដ្ឋមានោ សោ, តារេសិ ជនតំ ពហុំ.

២៧. ធម្មចេតិំ សមុស្សេត្វា, ធម្មទុស្សវិភូសិតំ;

ធម្មបុប្ផគុឡំ កត្វា, និព្ពុតោ សោ សសាវកោ.

២៨. មហាវិលាសោ តស្ស ជនោ, សិរិធម្មប្បកាសនោ;

សព្ពំ តមន្តរហិតំ, ននុ រិត្តា សព្ពសង្ខារា.

២៩. កោណាគមនោ សម្ពុទ្ធោ, បព្ពតារាមម្ហិ និព្ពុតោ;

ធាតុវិត្ថារិកំ អាសិ, តេសុ តេសុ បទេសតោតិ.

កោណាគមនស្ស ភគវតោ វំសោ តេវីសតិមោ.