២៦. កស្សបពុទ្ធវំសោ

១. កោណាគមនស្ស អបរេន, សម្ពុទ្ធោ ទ្វិបទុត្តមោ;

កស្សបោ នាម គោត្តេន, ធម្មរាជា បភង្ករោ.

២. សញ្ឆឌ្ឌិតំ កុលមូលំ, ពហ្វន្នបានភោជនំ;

ទត្វាន យាចកេ ទានំ, បូរយិត្វាន មានសំ;

ឧសភោវ អាឡកំ ភេត្វា, បត្តោ សម្ពោធិមុត្តមំ.

៣. ធម្មចក្កំ បវត្តេន្តេ, កស្សបេ លោកនាយកេ;

វីសកោដិសហស្សានំ, បឋមាភិសមយោ អហុ.

៤. ចតុមាសំ យទា ពុទ្ធោ, លោកេ ចរតិ ចារិកំ;

ទសកោដិសហស្សានំ, ទុតិយាភិសមយោ អហុ.

៥. យមកំ វិកុព្ពនំ កត្វា, ញាណធាតុំ បកិត្តយិ;

បញ្ចកោដិសហស្សានំ, តតិយាភិសមយោ អហុ.

៦. សុធម្មា ទេវបុរេ រម្មេ, តត្ថ ធម្មំ បកិត្តយិ;

តីណិកោដិសហស្សានំ, ទេវានំ ពោធយី ជិនោ.

៧. នរទេវស្ស យក្ខស្ស, អបរេ ធម្មទេសនេ;

ឯតេសានំ អភិសមយា, គណនាតោ អសង្ខិយា.

៨. តស្សាបិ ទេវទេវស្ស, ឯកោ អាសិ សមាគមោ;

ខីណាសវានំ វិមលានំ, សន្តចិត្តាន តាទិនំ.

៩. វីសភិក្ខុសហស្សានំ, តទា អាសិ សមាគមោ;

អតិក្កន្តភវន្តានំ, ហិរិសីលេន តាទិនំ.

១០. អហំ តទា មាណវកោ, ជោតិបាលោតិ វិស្សុតោ;

អជ្ឈាយកោ មន្តធរោ, តិណ្ណំ វេទាន បារគូ.

១១. លក្ខណេ ឥតិហាសេ ច, សធម្មេ បារមិំ គតោ;

ភូមន្តលិក្ខកុសលោ, កតវិជ្ជោ អនាវយោ.

១២. កស្សបស្ស ភគវតោ, ឃដិការោ នាមុបដ្ឋាកោ;

សគារវោ សប្បតិស្សោ, និព្ពុតោ តតិយេ ផលេ.

១៣. អាទាយ មំ ឃដីការោ, ឧបគញ្ឆិ កស្សបំ ជិនំ;

តស្ស ធម្មំ សុណិត្វាន, បព្ពជិំ តស្ស សន្តិកេ.

១៤. អារទ្ធវីរិយោ ហុត្វា, វត្តាវត្តេសុ កោវិទោ;

ន ក្វចិ បរិហាយាមិ, បូរេសិំ ជិនសាសនំ.

១៥. យាវតា ពុទ្ធភណិតំ, នវង្គំ ជិនសាសនំ;

សព្ពំ បរិយាបុណិត្វាន, សោភយិំ ជិនសាសនំ.

១៦. មម អច្ឆរិយំ ទិស្វា, សោបិ ពុទ្ធោ វិយាករិ;

‘‘ឥមម្ហិ ភទ្ទកេ កប្បេ, អយំ ពុទ្ធោ ភវិស្សតិ.

១៧. ‘‘អហុ កបិលវ្ហយា រម្មា, និក្ខមិត្វា តថាគតោ;

បធានំ បទហិត្វាន, កត្វា ទុក្ករការិកំ.

១៨. ‘‘អជបាលរុក្ខមូលេ, និសីទិត្វា តថាគតោ;

តត្ថ បាយាសំ បគ្គយ្ហ, នេរញ្ជរមុបេហិតិ.

១៩. ‘‘នេរញ្ជរាយ តីរម្ហិ, បាយាសំ បរិភុញ្ជិយ;

បដិយត្តវរមគ្គេន, ពោធិមូលមុបេហិតិ.

២០. ‘‘តតោ បទក្ខិណំ កត្វា, ពោធិមណ្ឌំ អនុត្តរោ;

អបរាជិតដ្ឋានម្ហិ [អបរាជិតនិសភដ្ឋានេ (ក.)], ពោធិបល្លង្កមុត្តមេ;

បល្លង្កេន និសីទិត្វា, ពុជ្ឈិស្សតិ មហាយសោ.

២១. ‘‘ឥមស្ស ជនិកា មាតា, មាយា នាម ភវិស្សតិ;

បិតា សុទ្ធោទនោ នាម, អយំ ហេស្សតិ គោតមោ.

២២. ‘‘អនាសវា វីតរាគា, សន្តចិត្តា សមាហិតា;

កោលិតោ ឧបតិស្សោ ច, អគ្គា ហេស្សន្តិ សាវកា;

អានន្ទោ នាមុបដ្ឋាកោ, ឧបដ្ឋិស្សតិមំ ជិនំ.

២៣. ‘‘ខេមា ឧប្បលវណ្ណា ច, អគ្គា ហេស្សន្តិ សាវិកា;

អនាសវា សន្តចិត្តា, វីតរាគា សមាហិតា;

ពោធិ តស្ស ភគវតោ, អស្សត្ថោតិ បវុច្ចតិ.

២៤. ‘‘ចិត្តោ ហត្ថាឡវកោ ច, អគ្គា ហេស្សន្តុបដ្ឋកា;

នន្ទមាតា ច ឧត្តរា, អគ្គា ហេស្សន្តុបដ្ឋិកា’’.

២៥. ឥទំ សុត្វាន វចនំ, អស្សមស្ស មហេសិនោ;

អាមោទិតា នរមរូ, ពុទ្ធពីជំ កិរ អយំ.

២៦. ឧក្កុដ្ឋិសទ្ទា បវត្តន្តិ, អប្ផោដេន្តិ ហសន្តិ ច;

កតញ្ជលី នមស្សន្តិ, ទសសហស្សី សទេវកា.

២៧. ‘‘យទិមស្ស លោកនាថស្ស, វិរជ្ឈិស្សាម សាសនំ;

អនាគតម្ហិ អទ្ធានេ, ហេស្សាម សម្មុខា ឥមំ.

២៨. ‘‘យថា មនុស្សា នទិំ តរន្តា, បដិតិត្ថំ វិរជ្ឈិយ;

ហេដ្ឋា តិត្ថេ គហេត្វាន, ឧត្តរន្តិ មហានទិំ.

២៩. ‘‘ឯវមេវ មយំ សព្ពេ, យទិ មុញ្ចាមិមំ ជិនំ;

អនាគតម្ហិ អទ្ធានេ, ហេស្សាម សម្មុខា ឥមំ’’.

៣០. តស្សាបិ វចនំ សុត្វា, ភិយ្យោ ចិត្តំ បសាទយិំ;

ឧត្តរិំ វតមធិដ្ឋាសិំ, ទសបារមិបូរិយា.

៣១. ឯវមហំ សំសរិត្វា, បរិវជ្ជេន្តោ អនាចរំ;

ទុក្ករញ្ច កតំ មយ្ហំ, ពោធិយាយេវ ការណា.

៣២. នគរំ ពារាណសី នាម, កិកី នាមាសិ ខត្តិយោ;

វសតេ តត្ថ នគរេ, សម្ពុទ្ធស្ស មហាកុលំ.

៣៣. ព្រាហ្មណោ ព្រហ្មទត្តោវ, អាសិ ពុទ្ធស្ស សោ បិតា;

ធនវតី នាម ជនិកា, កស្សបស្ស មហេសិនោ.

៣៤. ទុវេ វស្សសហស្សានិ, អគារំ អជ្ឈ សោ វសិ;

ហំសោ យសោ សិរិនន្ទោ, តយោ បាសាទមុត្តមា.

៣៥. តិសោឡសសហស្សានិ, នារិយោ សមលង្កតា;

សុនន្ទា នាម សា នារី, វិជិតសេនោ នាម អត្រជោ.

៣៦. និមិត្តេ ចតុរោ ទិស្វា, បាសាទេនាភិនិក្ខមិ;

សត្តាហំ បធានចារំ, អចរី បុរិសុត្តមោ.

៣៧. ព្រហ្មុនា យាចិតោ សន្តោ, កស្សបោ លោកនាយកោ;

វត្តិ ចក្កំ មហាវីរោ, មិគទាយេ នរុត្តមោ.

៣៨. តិស្សោ ច ភារទ្វាជោ ច, អហេសុំ អគ្គសាវកា;

សព្ពមិត្តោ នាមុបដ្ឋាកោ, កស្សបស្ស មហេសិនោ.

៣៩. អនុឡា ឧរុវេឡា ច, អហេសុំ អគ្គសាវិកា;

ពោធិ តស្ស ភគវតោ, និគ្រោធោតិ បវុច្ចតិ.

៤០. សុមង្គលោ ឃដិការោ ច, អហេសុំ អគ្គុបដ្ឋកា;

វិចិតសេនា ភទ្ទា [ភទ្រា (ក.)] ច, អហេសុំ អគ្គុបដ្ឋិកា.

៤១. ឧច្ចត្តនេន សោ ពុទ្ធោ, វីសតិរតនុគ្គតោ;

វិជ្ជុលដ្ឋីវ អាកាសេ, ចន្ទោវ គហបូរិតោ.

៤២. វីសតិវស្សសហស្សានិ, អាយុ តស្ស មហេសិនោ;

តាវតា តិដ្ឋមានោ សោ, តារេសិ ជនតំ ពហុំ.

៤៣. ធម្មតឡាកំ មាបយិត្វា, សីលំ ទត្វា វិលេបនំ;

ធម្មទុស្សំ និវាសេត្វា, ធម្មមាលំ វិភជ្ជិយ.

៤៤. ធម្មវិមលមាទាសំ, ឋបយិត្វា មហាជនេ;

កេចិ និព្ពានំ បត្ថេន្តា, បស្សន្តុ មេ អលង្ករំ.

៤៥. សីលកញ្ចុកំ ទត្វាន, ឈានកវចវម្មិតំ;

ធម្មចម្មំ បារុបិត្វា, ទត្វា សន្នាហមុត្តមំ.

៤៦. សតិផលកំ ទត្វាន, តិខិណញាណកុន្តិមំ;

ធម្មខគ្គវរំ ទត្វា, សីលសំសគ្គមទ្ទនំ.

៤៧. តេវិជ្ជាភូសនំ ទត្វាន, អាវេឡំ ចតុរោ ផលេ;

ឆឡភិញ្ញាភរណំ ទត្វា, ធម្មបុប្ផបិឡន្ធនំ.

៤៨. សទ្ធម្មបណ្ឌរច្ឆត្តំ, ទត្វា បាបនិវារណំ;

មាបយិត្វាភយំ បុប្ផំ, និព្ពុតោ សោ សសាវកោ.

៤៩. ឯសោ ហិ សម្មាសម្ពុទ្ធោ, អប្បមេយ្យោ ទុរាសទោ;

ឯសោ ហិ ធម្មរតនោ, ស្វាក្ខាតោ ឯហិបស្សិកោ.

៥០. ឯសោ ហិ សង្ឃរតនោ, សុប្បដិបន្នោ អនុត្តរោ;

សព្ពំ តមន្តរហិតំ, ននុ រិត្តា សព្ពសង្ខារា.

៥១. មហាកស្សបោ ជិនោ សត្ថា, សេតព្យារាមម្ហិ និព្ពុតោ;

តត្ថេវស្ស ជិនថូបោ, យោជនុព្ពេធមុគ្គតោតិ.

កស្សបស្ស ភគវតោ វំសោ ចតុវីសតិមោ.