២៧. គោតមពុទ្ធវំសោ

១. អហមេតរហិ សម្ពុទ្ធោ [ពុទ្ធោ (សី.)], គោតមោ សក្យវឌ្ឍនោ;

បធានំ បទហិត្វាន, បត្តោ សម្ពោធិមុត្តមំ.

២. ព្រហ្មុនា យាចិតោ សន្តោ, ធម្មចក្កំ បវត្តយិំ;

អដ្ឋារសន្នំ កោដីនំ, បឋមាភិសមយោ អហុ.

៣. តតោ បរញ្ច ទេសេន្តេ, នរទេវសមាគមេ;

គណនាយ ន វត្តព្ពោ, ទុតិយាភិសមយោ អហុ.

៤. ឥធេវាហំ ឯតរហិ, ឱវទិំ មម អត្រជំ;

គណនាយ ន វត្តព្ពោ, តតិយាភិសមយោ អហុ.

៥. ឯកោសិ សន្និបាតោ មេ, សាវកានំ មហេសិនំ;

អឌ្ឍតេឡសសតានំ, ភិក្ខូនាសិ សមាគមោ.

៦. វិរោចមានោ វិមលោ, ភិក្ខុសង្ឃស្ស មជ្ឈគោ;

ទទាមិ បត្ថិតំ សព្ពំ, មណីវ សព្ពកាមទោ.

៧. ផលមាកង្ខមានានំ, ភវច្ឆន្ទជហេសិនំ;

ចតុសច្ចំ បកាសេមិ, អនុកម្បាយ បាណិនំ.

៨. ទសវីសសហស្សានំ, ធម្មាភិសមយោ អហុ;

ឯកទ្វិន្នំ អភិសមយោ, គណនាតោ អសង្ខិយោ.

៩. វិត្ថារិកំ ពាហុជញ្ញំ, ឥទ្ធំ ផីតំ សុផុល្លិតំ;

ឥធ មយ្ហំ សក្យមុនិនោ, សាសនំ សុវិសោធិតំ.

១០. អនាសវា វីតរាគា, សន្តចិត្តា សមាហិតា;

ភិក្ខូនេកសតា សព្ពេ, បរិវារេន្តិ មំ សទា.

១១. ឥទានិ យេ ឯតរហិ, ជហន្តិ មានុសំ ភវំ;

អប្បត្តមានសា សេខា, តេ ភិក្ខូ វិញ្ញុគរហិតា.

១២. អរិយញ្ច សំថោមយន្តា, សទា ធម្មរតា ជនា;

ពុជ្ឈិស្សន្តិ សតិមន្តោ, សំសារសរិតំ គតា.

១៣. នគរំ កបិលវត្ថុ មេ, រាជា សុទ្ធោទនោ បិតា;

មយ្ហំ ជនេត្តិកា មាតា, មាយាទេវីតិ វុច្ចតិ.

១៤. ឯកូនតិំសវស្សានិ, អគារំ អជ្ឈហំ វសិំ;

រម្មោ សុរម្មោ សុភកោ, តយោ បាសាទមុត្តមា.

១៥. ចត្តារីសសហស្សានិ, នារិយោ សមលង្កតា;

ភទ្ទកញ្ចនា នាម នារី, រាហុលោ នាម អត្រជោ.

១៦. និមិត្តេ ចតុរោ ទិស្វា, អស្សយានេន និក្ខមិំ;

ឆព្ពស្សំ បធានចារំ, អចរិំ ទុក្ករំ អហំ.

១៧. ពារាណសិយំ ឥសិបតនេ, ចក្កំ បវត្តិតំ មយា;

អហំ គោតមសម្ពុទ្ធោ, សរណំ សព្ពបាណិនំ.

១៨. កោលិតោ ឧបតិស្សោ ច, ទ្វេ ភិក្ខូ អគ្គសាវកា;

អានន្ទោ នាមុបដ្ឋាកោ, សន្តិកាវចរោ មម;

ខេមា ឧប្បលវណ្ណា ច, ភិក្ខុនី អគ្គសាវិកា.

១៩. ចិត្តោ ហត្ថាឡវកោ ច, អគ្គុបដ្ឋាកុបាសកា;

នន្ទមាតា ច ឧត្តរា, អគ្គុបដ្ឋិកុបាសិកា.

២០. អហំ អស្សត្ថមូលម្ហិ, បត្តោ សម្ពោធិមុត្តមំ;

ព្យាមប្បភា សទា មយ្ហំ, សោឡសហត្ថមុគ្គតា.

២១. អប្បំ វស្សសតំ អាយុ, ឥទានេតរហិ វិជ្ជតិ;

តាវតា តិដ្ឋមានោហំ, តារេមិ ជនតំ ពហុំ.

២២. ឋបយិត្វាន ធម្មុក្កំ, បច្ឆិមំ ជនពោធនំ;

អហម្បិ នចិរស្សេវ, សទ្ធិំ សាវកសង្ឃតោ;

ឥធេវ បរិនិព្ពិស្សំ, អគ្គី វាហារសង្ខយា.

២៣. តានិ ច អតុលតេជានិ, ឥមានិ ច ទសពលានិ [យសពលានិ (អដ្ឋ.)];

អយញ្ច គុណធារណោ ទេហោ, ទ្វត្តិំសវរលក្ខណវិចិត្តោ.

២៤. ទស ទិសា បភាសេត្វា, សតរំសីវ ឆប្បភា;

សព្ពំ តមន្តរហិស្សន្តិ, ននុ រិត្តា សព្ពសង្ខារាតិ.

គោតមស្ស ភគវតោ វំសោ បញ្ចវីសតិមោ.