២៨. ពុទ្ធបកិណ្ណកកណ្ឌំ

១. អបរិមេយ្យិតោ កប្បេ, ចតុរោ អាសុំ វិនាយកា;

តណ្ហង្ករោ មេធង្ករោ, អថោបិ សរណង្ករោ;

ទីបង្ករោ ច សម្ពុទ្ធោ, ឯកកប្បម្ហិ តេ ជិនា.

២. ទីបង្ករស្ស អបរេន, កោណ្ឌញ្ញោ នាម នាយកោ;

ឯកោវ ឯកកប្បម្ហិ, តារេសិ ជនតំ ពហុំ.

៣. ទីបង្ករស្ស ភគវតោ, កោណ្ឌញ្ញស្ស ច សត្ថុនោ;

ឯតេសំ អន្តរា កប្បា, គណនាតោ អសង្ខិយា.

៤. កោណ្ឌញ្ញស្ស អបរេន, មង្គលោ នាម នាយកោ;

តេសម្បិ អន្តរា កប្បា, គណនាតោ អសង្ខិយា.

៥. មង្គលោ ច សុមនោ ច, រេវតោ សោភិតោ មុនិ;

តេបិ ពុទ្ធា ឯកកប្បេ, ចក្ខុមន្តោ បភង្ករា.

៦. សោភិតស្ស អបរេន, អនោមទស្សី មហាយសោ;

តេសម្បិ អន្តរា កប្បា, គណនាតោ អសង្ខិយា.

៧. អនោមទស្សី បទុមោ, នារទោ ចាបិ នាយកោ;

តេបិ ពុទ្ធា ឯកកប្បេ, តមន្តការកា មុនី.

៨. នារទស្ស អបរេន, បទុមុត្តរោ នាម នាយកោ;

ឯកកប្បម្ហិ ឧប្បន្នោ, តារេសិ ជនតំ ពហុំ.

៩. នារទស្ស ភគវតោ, បទុមុត្តរស្ស សត្ថុនោ;

តេសម្បិ អន្តរា កប្បា, គណនាតោ អសង្ខិយា.

១០. កប្បសតសហស្សម្ហិ, ឯកោ អាសិ មហាមុនិ;

បទុមុត្តរោ លោកវិទូ, អាហុតីនំ បដិគ្គហោ.

១១. តិំសកប្បសហស្សម្ហិ, ទុវេ អាសុំ វិនាយកា [អាសិំសុ នាយកា (ស្យា. ក.)];

សុមេធោ ច សុជាតោ ច, ឱរតោ បទុមុត្តរា.

១២. អដ្ឋារសេ កប្បសតេ, តយោ អាសុំ វិនាយកា [អាសិំសុ នាយកា (ស្យា. ក.)];

បិយទស្សី អត្ថទស្សី, ធម្មទស្សី ច នាយកា.

១៣. ឱរតោ ច សុជាតស្ស, សម្ពុទ្ធា ទ្វិបទុត្តមា;

ឯកកប្បម្ហិ តេ ពុទ្ធា, លោកេ អប្បដិបុគ្គលា.

១៤. ចតុន្នវុតិតោ កប្បេ, ឯកោ អាសិ មហាមុនិ;

សិទ្ធត្ថោ សោ លោកវិទូ, សល្លកត្តោ អនុត្តរោ.

១៥. ទ្វេនវុតេ ឥតោ កប្បេ, ទុវេ អាសុំ វិនាយកា;

តិស្សោ ផុស្សោ ច សម្ពុទ្ធា, អសមា អប្បដិបុគ្គលា.

១៦. ឯកនវុតិតោ កប្បេ, វិបស្សី នាម នាយកោ;

សោបិ ពុទ្ធោ ការុណិកោ, សត្តេ មោចេសិ ពន្ធនា.

១៧. ឯកតិំសេ ឥតោ កប្បេ, ទុវេ អាសុំ វិនាយកា;

សិខី ច វេស្សភូ ចេវ, អសមា អប្បដិបុគ្គលា.

១៨. ឥមម្ហិ ភទ្ទកេ កប្បេ, តយោ អាសុំ វិនាយកា;

កកុសន្ធោ កោណាគមនោ, កស្សបោ ចាបិ នាយកោ.

១៩. អហមេតរហិ សម្ពុទ្ធោ, មេត្តេយ្យោ ចាបិ ហេស្សតិ;

ឯតេបិមេ បញ្ច ពុទ្ធា, ធីរា លោកានុកម្បកា.

២០. ឯតេសំ ធម្មរាជូនំ, អញ្ញេសំនេកកោដិនំ;

អាចិក្ខិត្វាន តំ មគ្គំ, និព្ពុតា តេ សសាវកាតិ.

ពុទ្ធបកិណ្ណកកណ្ឌំ និដ្ឋិតំ.