៨. សោភិតពុទ្ធវំសោ

១. រេវតស្ស អបរេន, សោភិតោ នាម នាយកោ;

សមាហិតោ សន្តចិត្តោ, អសមោ អប្បដិបុគ្គលោ.

២. សោ ជិនោ សកគេហម្ហិ, មានសំ វិនិវត្តយិ;

បត្វាន កេវលំ ពោធិំ, ធម្មចក្កំ បវត្តយិ.

៣. យាវ ហេដ្ឋា អវីចិតោ, ភវគ្គា ចាបិ ឧទ្ធតោ;

ឯត្ថន្តរេ ឯកបរិសា, អហោសិ ធម្មទេសនេ.

៤. តាយ បរិសាយ សម្ពុទ្ធោ, ធម្មចក្កំ បវត្តយិ;

គណនាយ ន វត្តព្ពោ, បឋមាភិសមយោ អហុ.

៥. តតោ បរម្បិ ទេសេន្តេ, មរូនញ្ច សមាគមេ;

នវុតិកោដិសហស្សានំ, ទុតិយាភិសមយោ អហុ.

៦. បុនាបរំ រាជបុត្តោ, ជយសេនោ នាម ខត្តិយោ;

អារាមំ រោបយិត្វាន, ពុទ្ធេ និយ្យាទយី តទា.

៧. តស្ស យាគំ បកិត្តេន្តោ, ធម្មំ ទេសេសិ ចក្ខុមា;

តទា កោដិសហស្សានំ, តតិយាភិសមយោ អហុ.

៨. សន្និបាតា តយោ អាសុំ, សោភិតស្ស មហេសិនោ;

ខីណាសវានំ វិមលានំ, សន្តចិត្តាន តាទិនំ.

៩. ឧគ្គតោ នាម សោ រាជា, ទានំ ទេតិ នរុត្តមេ;

តម្ហិ ទានេ សមាគញ្ឆុំ, អរហន្តា [អរហតំ (ក.)] សតកោដិយោ.

១០. បុនាបរំ បុរគណោ [បុគគណោ (ក.)], ទេតិ ទានំ នរុត្តមេ;

តទា នវុតិកោដីនំ, ទុតិយោ អាសិ សមាគមោ.

១១. ទេវលោកេ វសិត្វាន, យទា ឱរោហតី ជិនោ;

តទា អសីតិកោដីនំ, តតិយោ អាសិ សមាគមោ.

១២. អហំ តេន សមយេន, សុជាតោ នាម ព្រាហ្មណោ;

តទា សសាវកំ ពុទ្ធំ, អន្នបានេន តប្បយិំ.

១៣. សោបិ មំ ពុទ្ធោ ព្យាកាសិ, សោភិតោ លោកនាយកោ;

‘‘អបរិមេយ្យិតោ កប្បេ, អយំ ពុទ្ធោ ភវិស្សតិ.

១៤. ‘‘បធានំ បទហិត្វាន…បេ… ហេស្សាម សម្មុខា ឥមំ’’.

១៥. តស្សាបិ វចនំ សុត្វា, ហដ្ឋោ សំវិគ្គមានសោ;

តមេវត្ថមនុប្បត្តិយា, ឧគ្គំ ធិតិមកាសហំ.

១៦. សុធម្មំ នាម នគរំ, សុធម្មោ នាម ខត្តិយោ;

សុធម្មា នាម ជនិកា, សោភិតស្ស មហេសិនោ.

១៧. នវវស្សសហស្សានិ, អគារំ អជ្ឈ សោ វសិ;

កុមុទោ នាឡិនោ បទុមោ, តយោ បាសាទមុត្តមា.

១៨. សត្តតិំសសហស្សានិ, នារិយោ សមលង្កតា;

មណិលា [មខិលា (អដ្ឋ.), សមង្គី (សី.), មកិលា (ស្យា. កំ.)] នាម សា នារី, សីហោ នាមាសិ អត្រជោ.

១៩. និមិត្តេ ចតុរោ ទិស្វា, បាសាទេនាភិនិក្ខមិ;

សត្តាហំ បធានចារំ, ចរិត្វា បុរិសុត្តមោ.

២០. ព្រហ្មុនា យាចិតោ សន្តោ, សោភិតោ លោកនាយកោ;

វត្តិ ចក្កំ មហាវីរោ, សុធម្មុយ្យានមុត្តមេ.

២១. អសមោ ច សុនេត្តោ ច, អហេសុំ អគ្គសាវកា;

អនោមោ នាមុបដ្ឋាកោ, សោភិតស្ស មហេសិនោ.

២២. នកុលា ច សុជាតា ច, អហេសុំ អគ្គសាវិកា;

ពុជ្ឈមានោ ច សោ ពុទ្ធោ, នាគមូលេ អពុជ្ឈថ.

២៣. រម្មោ ចេវ សុទត្តោ ច, អហេសុំ អគ្គុបដ្ឋកា;

នកុលា ចេវ ចិត្តា ច, អហេសុំ អគ្គុបដ្ឋិកា.

២៤. អដ្ឋបណ្ណាសរតនំ, អច្ចុគ្គតោ មហាមុនិ;

ឱភាសេតិ ទិសា សព្ពា, សតរំសីវ ឧគ្គតោ.

២៥. យថា សុផុល្លំ បវនំ, នានាគន្ធេហិ ធូបិតំ;

តថេវ តស្ស បាវចនំ, សីលគន្ធេហិ ធូបិតំ.

២៦. យថាបិ សាគរោ នាម, ទស្សនេន អតប្បិយោ;

តថេវ តស្ស បាវចនំ, សវណេន អតប្បិយំ.

២៧. នវុតិវស្សសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

២៨. ឱវាទំ អនុសិដ្ឋិញ្ច, ទត្វាន សេសកេ ជនេ;

ហុតាសនោវ តាបេត្វា, និព្ពុតោ សោ សសាវកោ.

២៩. សោ ច ពុទ្ធោ អសមសមោ, តេបិ សាវកា ពលប្បត្តា;

សព្ពំ តមន្តរហិតំ, ននុ រិត្តា សព្ពសង្ខារា.

៣០. សោភិតោ វរសម្ពុទ្ធោ, សីហារាមម្ហិ និព្ពុតោ;

ធាតុវិត្ថារិកំ អាសិ, តេសុ តេសុ បទេសតោតិ.

សោភិតស្ស ភគវតោ វំសោ ឆដ្ឋោ.