៧. រេវតពុទ្ធវំសោ

១. សុមនស្ស អបរេន, រេវតោ នាម នាយកោ;

អនូបមោ អសទិសោ, អតុលោ ឧត្តមោ ជិនោ.

២. សោបិ ធម្មំ បកាសេសិ, ព្រហ្មុនា អភិយាចិតោ;

ខន្ធធាតុវវត្ថានំ, អប្បវត្តំ ភវាភវេ.

៣. តស្សាភិសមយា តីណិ, អហេសុំ ធម្មទេសនេ;

គណនាយ ន វត្តព្ពោ, បឋមាភិសមយោ អហុ.

៤. យទា អរិន្ទមំ រាជំ [រាជានំ (ក.)], វិនេសិ រេវតោ មុនិ;

តទា កោដិសហស្សានំ, ទុតិយាភិសមយោ អហុ.

៥. សត្តាហំ បដិសល្លានា, វុដ្ឋហិត្វា នរាសភោ;

កោដិសតំ នរមរូនំ, វិនេសិ ឧត្តមេ ផលេ.

៦. សន្និបាតា តយោ អាសុំ, រេវតស្ស មហេសិនោ;

ខីណាសវានំ វិមលានំ, សុវិមុត្តាន តាទិនំ.

៧. អតិក្កន្តា គណនបថំ, បឋមំ យេ សមាគតា;

កោដិសតសហស្សានំ, ទុតិយោ អាសិ សមាគមោ.

៨. យោបិ [យោ សោ (ស្យា. កំ. ក.)] បញ្ញាយ អសមោ, តស្ស ចក្កានុវត្តកោ;

សោ តទា ព្យាធិតោ អាសិ, បត្តោ ជីវិតសំសយំ.

៩. តស្ស គិលានបុច្ឆាយ, យេ តទា ឧបគតា មុនី;

កោដិសហស្សា អរហន្តោ, តតិយោ អាសិ សមាគមោ.

១០. អហំ តេន សមយេន, អតិទេវោ នាម ព្រាហ្មណោ;

ឧបគន្ត្វា រេវតំ ពុទ្ធំ, សរណំ តស្ស គញ្ឆហំ.

១១. តស្ស សីលំ សមាធិញ្ច, បញ្ញាគុណមនុត្តមំ;

ថោមយិត្វា យថាថាមំ, ឧត្តរីយមទាសហំ.

១២. សោបិ មំ ពុទ្ធោ ព្យាកាសិ, រេវតោ លោកនាយកោ;

‘‘អបរិមេយ្យិតោ កប្បេ, អយំ ពុទ្ធោ ភវិស្សតិ.

១៣. ‘‘បធានំ បទហិត្វាន…បេ… ហេស្សាម សម្មុខា ឥមំ’’.

១៤. តស្សាបិ វចនំ សុត្វា, ភិយ្យោ ចិត្តំ បសាទយិំ;

ឧត្តរិំ វតមធិដ្ឋាសិំ, ទសបារមិបូរិយា.

១៥. តទាបិ តំ ពុទ្ធធម្មំ, សរិត្វា អនុព្រូហយិំ;

អាហរិស្សាមិ តំ ធម្មំ, យំ មយ្ហំ អភិបត្ថិតំ.

១៦. នគរំ សុធញ្ញវតី នាម [សុធម្មកំ នាម (សី.), សុធញ្ញកំ នាម (ស្យា.)], វិបុលោ នាម ខត្តិយោ;

វិបុលា នាម ជនិកា, រេវតស្ស មហេសិនោ.

១៧. ឆ ច វស្សសហស្សានិ [ឆព្ពស្សសហស្សានិ (សី. ស្យា.)], អគារំ អជ្ឈ សោ វសិ;

សុទស្សនោ រតនគ្ឃិ, អាវេឡោ ច វិភូសិតោ;

បុញ្ញកម្មាភិនិព្ពត្តា, តយោ បាសាទមុត្តមា.

១៨. តេត្តិំស ច សហស្សានិ, នារិយោ សមលង្កតា;

សុទស្សនា នាម នារី, វរុណោ នាម អត្រជោ.

១៩. និមិត្តេ ចតុរោ ទិស្វា, រថយានេន និក្ខមិ;

អនូនសត្តមាសានិ, បធានំ បទហី ជិនោ.

២០. ព្រហ្មុនា យាចិតោ សន្តោ, រេវតោ លោកនាយកោ;

វត្តិ ចក្កំ មហាវីរោ, វរុណារាមេ សិរីឃរេ.

២១. វរុណោ ព្រហ្មទេវោ ច, អហេសុំ អគ្គសាវកា;

សម្ភវោ នាមុបដ្ឋាកោ, រេវតស្ស មហេសិនោ.

២២. ភទ្ទា ចេវ សុភទ្ទា ច, អហេសុំ អគ្គសាវិកា;

សោបិ ពុទ្ធោ អសមសមោ, នាគមូលេ អពុជ្ឈថ.

២៣. បទុមោ កុញ្ជរោ ចេវ, អហេសុំ អគ្គុបដ្ឋិកា;

សិរីមា ចេវ យសវតី, អហេសុំ អគ្គុបដ្ឋិកា.

២៤. ឧច្ចត្តនេន សោ ពុទ្ធោ, អសីតិហត្ថមុគ្គតោ;

ឱភាសេតិ ទិសា សព្ពា, ឥន្ទកេតុវ ឧគ្គតោ.

២៥. តស្ស សរីរេ និព្ពត្តា, បភាមាលា អនុត្តរា;

ទិវា វា យទិ វា រត្តិំ, សមន្តា ផរតិ យោជនំ.

២៦. សដ្ឋិវស្សសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

២៧. ទស្សយិត្វា ពុទ្ធពលំ, អមតំ លោកេ បកាសយំ;

និព្ពាយិ អនុបាទានោ, យថគ្គុបាទានសង្ខយា.

២៨. សោ ច កាយោ រតននិភោ, សោ ច ធម្មោ អសាទិសោ;

សព្ពំ តមន្តរហិតំ, ននុ រិត្តា សព្ពសង្ខារា.

២៩. រេវតោ យសធរោ ពុទ្ធោ, និព្ពុតោ សោ មហាបុរេ;

ធាតុវិត្ថារិកំ អាសិ, តេសុ តេសុ បទេសតោតិ.

រេវតស្ស ភគវតោ វំសោ បញ្ចមោ.