៤. កោណ្ឌញ្ញពុទ្ធវំសោ

១. ទីបង្ករស្ស អបរេន, កោណ្ឌញ្ញោ នាម នាយកោ;

អនន្តតេជោ អមិតយសោ, អប្បមេយ្យោ ទុរាសទោ.

២. ធរណូបមោ ខមនេន, សីលេន សាគរូបមោ;

សមាធិនា មេរូបមោ, ញាណេន គគនូបមោ.

៣. ឥន្ទ្រិយពលពោជ្ឈង្គ-មគ្គសច្ចប្បកាសនំ;

បកាសេសិ សទា ពុទ្ធោ, ហិតាយ សព្ពបាណិនំ.

៤. ធម្មចក្កំ បវត្តេន្តេ, កោណ្ឌញ្ញេ លោកនាយកេ;

កោដិសតសហស្សានំ, បឋមាភិសមយោ អហុ.

៥. តតោ បរម្បិ ទេសេន្តេ, នរមរូនំ សមាគមេ;

នវុតិកោដិសហស្សានំ, ទុតិយាភិសមយោ អហុ.

៦. តិត្ថិយេ អភិមទ្ទន្តោ, យទា ធម្មមទេសយិ;

អសីតិកោដិសហស្សានំ, តតិយាភិសមយោ អហុ.

៧. សន្និបាតា តយោ អាសុំ, កោណ្ឌញ្ញស្ស មហេសិនោ;

ខីណាសវានំ វិមលានំ, សន្តចិត្តាន តាទិនំ.

៨. កោដិសតសហស្សានំ, បឋមោ អាសិ សមាគមោ;

ទុតិយោ កោដិសហស្សានំ, តតិយោ នវុតិកោដិនំ.

៩. អហំ តេន សមយេន, វិជិតាវី នាម ខត្តិយោ;

សមុទ្ទំ អន្តមន្តេន, ឥស្សរិយំ វត្តយាមហំ.

១០. កោដិសតសហស្សានំ, វិមលានំ មហេសិនំ;

សហ លោកគ្គនាថេន, បរមន្នេន តប្បយិំ.

១១. សោបិ មំ ពុទ្ធោ ព្យាកាសិ, កោណ្ឌញ្ញោ លោកនាយកោ;

‘‘អបរិមេយ្យិតោ កប្បេ, ពុទ្ធោ លោកេ ភវិស្សតិ.

១២. ‘‘បធានំ បទហិត្វាន, កត្វា ទុក្ករការិកំ;

អស្សត្ថមូលេ សម្ពុទ្ធោ, ពុជ្ឈិស្សតិ មហាយសោ.

១៣. ‘‘ឥមស្ស ជនិកា មាតា, មាយា នាម ភវិស្សតិ;

បិតា សុទ្ធោទនោ នាម, អយំ ហេស្សតិ គោតមោ.

១៤. ‘‘កោលិតោ ឧបតិស្សោ ច, អគ្គា ហេស្សន្តិ សាវកា;

អានន្ទោ នាមុបដ្ឋាកោ, ឧបដ្ឋិស្សតិមំ ជិនំ.

១៥. ‘‘ខេមា ឧប្បលវណ្ណា ច, អគ្គា ហេស្សន្តិ សាវិកា;

ពោធិ តស្ស ភគវតោ, អស្សត្ថោតិ បវុច្ចតិ.

១៦. ‘‘ចិត្តោ ច ហត្ថាឡវកោ, អគ្គា ហេស្សន្តុបដ្ឋកា;

នន្ទមាតា ច ឧត្តរា, អគ្គា ហេស្សន្តុបដ្ឋិកា;

អាយុ វស្សសតំ តស្ស, គោតមស្ស យសស្សិនោ’’.

១៧. ឥទំ សុត្វាន វចនំ, អសមស្ស មហេសិនោ;

អាមោទិតា នរមរូ, ពុទ្ធពីជំ កិរ អយំ.

១៨. ឧក្កុដ្ឋិសទ្ទា វត្តន្តិ, អប្ផោដេន្តិ ហសន្តិ ច;

កតញ្ជលី នមស្សន្តិ, ទសសហស្សិទេវតា.

១៩. ‘‘យទិមស្ស លោកនាថស្ស, វិរជ្ឈិស្សាម សាសនំ;

អនាគតម្ហិ អទ្ធានេ, ហេស្សាម សម្មុខា ឥមំ.

២០. ‘‘យថា មនុស្សា នទិំ តរន្តា, បដិតិត្ថំ វិរជ្ឈិយ;

ហេដ្ឋាតិត្ថេ គហេត្វាន, ឧត្តរន្តិ មហានទិំ.

២១. ‘‘ឯវមេវ មយំ សព្ពេ, យទិ មុញ្ចាមិមំ ជិនំ;

អនាគតម្ហិ អទ្ធានេ, ហេស្សាម សម្មុខា ឥមំ’’.

២២. តស្សាហំ វចនំ សុត្វា, ភិយ្យោ ចិត្តំ បសាទយិំ;

តមេវ អត្ថំ សាធេន្តោ, មហារជ្ជំ ជិនេ អទំ;

មហារជ្ជំ ទទិត្វាន [ចជិត្វា (សី.)], បព្ពជិំ តស្ស សន្តិកេ.

២៣. សុត្តន្តំ វិនយញ្ចាបិ, នវង្គំ សត្ថុសាសនំ;

សព្ពំ បរិយាបុណិត្វាន, សោភយិំ ជិនសាសនំ.

២៤. តត្ថប្បមត្តោ វិហរន្តោ, និសជ្ជដ្ឋានចង្កមេ;

អភិញ្ញាបារមិំ គន្ត្វា, ព្រហ្មលោកមគញ្ឆហំ.

២៥. នគរំ រម្មវតី នាម, សុនន្ទោ នាម ខត្តិយោ;

សុជាតា នាម ជនិកា, កោណ្ឌញ្ញស្ស មហេសិនោ.

២៦. ទសវស្សសហស្សានិ, អគារំ អជ្ឈ សោ វសិ [អគារមជ្ឈេ ច សោ វសិ (ស្យា.)];

សុចិ សុរុចិ សុភោ ច, តយោ បាសាទមុត្តមា.

២៧. តីណិសតសហស្សានិ, នារិយោ សមលង្កតា;

រុចិទេវី នាម នារី, វិជិតសេនោ អត្រជោ.

២៨. និមិត្តេ ចតុរោ ទិស្វា, រថយានេន និក្ខមិ;

អនូនទសមាសានិ, បធានំ បទហី ជិនោ.

២៩. ព្រហ្មុនា យាចិតោ សន្តោ, កោណ្ឌញ្ញោ ទ្វិបទុត្តមោ;

វត្តិ ចក្កំ មហាវីរោ, ទេវានំ នគរុត្តមេ.

៣០. ភទ្ទោ ចេវ សុភទ្ទោ ច, អហេសុំ អគ្គសាវកា;

អនុរុទ្ធោ នាមុបដ្ឋាកោ, កោណ្ឌញ្ញស្ស មហេសិនោ.

៣១. តិស្សា ច ឧបតិស្សា ច, អហេសុំ អគ្គសាវិកា;

សាលកល្យាណិកោ ពោធិ, កោណ្ឌញ្ញស្ស មហេសិនោ.

៣២. សោណោ ច ឧបសោណោ ច, អហេសុំ អគ្គុបដ្ឋកា;

នន្ទា ចេវ សិរីមា ច, អហេសុំ អគ្គុបដ្ឋិកា.

៣៣. សោ អដ្ឋាសីតិ ហត្ថានិ, អច្ចុគ្គតោ មហាមុនិ;

សោភតេ ឧឡុរាជាវ សូរិយោ មជ្ឈន្ហិកេ យថា.

៣៤. វស្សសតសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

៣៥. ខីណាសវេហិ វិមលេហិ, វិចិត្តា អាសិ មេទនី;

យថា គគនមុឡូហិ, ឯវំ សោ ឧបសោភថ.

៣៦. តេបិ នាគា អប្បមេយ្យា, អសង្ខោភា ទុរាសទា;

វិជ្ជុបាតំវ ទស្សេត្វា, និព្ពុតា តេ មហាយសា.

៣៧. សា ច អតុលិយា ជិនស្ស ឥទ្ធិ, ញាណបរិភាវិតោ ច សមាធិ;

សព្ពំ តមន្តរហិតំ, ននុ រិត្តា សព្ពសង្ខារា.

៣៨. កោណ្ឌញ្ញោ បវរោ ពុទ្ធោ, ចន្ទារាមម្ហិ និព្ពុតោ;

តត្ថេវ ចេតិយោ ចិត្តោ, សត្ត យោជនមុស្សិតោតិ.

កោណ្ឌញ្ញស្ស ភគវតោ វំសោ ទុតិយោ.