៥. មង្គលពុទ្ធវំសោ

១. កោណ្ឌញ្ញស្ស អបរេន, មង្គលោ នាម នាយកោ;

តមំ លោកេ និហន្ត្វាន, ធម្មោក្កមភិធារយិ.

២. អតុលាសិ បភា តស្ស, ជិនេហញ្ញេហិ ឧត្តរិំ;

ចន្ទសូរិយបភំ ហន្ត្វា, ទសសហស្សី វិរោចតិ.

៣. សោបិ ពុទ្ធោ បកាសេសិ, ចតុរោ សច្ចវរុត្តមេ;

តេ តេ សច្ចរសំ បីត្វា, វិនោទេន្តិ មហាតមំ.

៤. បត្វាន ពោធិមតុលំ, បឋមេ ធម្មទេសនេ;

កោដិសតសហស្សានំ, ធម្មាភិសមយោ អហុ.

៥. សុរិន្ទទេវភវនេ, ពុទ្ធោ ធម្មមទេសយិ;

តទា កោដិសហស្សានំ [នវកោដិសហស្សានំ (សី.)], ទុតិយោ សមយោ អហុ.

៦. យទា សុនន្ទោ ចក្កវត្តី, សម្ពុទ្ធំ ឧបសង្កមិ;

តទា អាហនិ សម្ពុទ្ធោ, ធម្មភេរិំ វរុត្តមំ.

៧. សុនន្ទស្សានុចរា ជនតា, តទាសុំ នវុតិកោដិយោ;

សព្ពេបិ តេ និរវសេសា, អហេសុំ ឯហិ ភិក្ខុកា.

៨. សន្និបាតា តយោ អាសុំ, មង្គលស្ស មហេសិនោ;

កោដិសតសហស្សានំ, បឋមោ អាសិ សមាគមោ.

៩. ទុតិយោ កោដិសតសហស្សានំ, តតិយោ នវុតិកោដិនំ;

ខីណាសវានំ វិមលានំ, តទា អាសិ សមាគមោ.

១០. អហំ តេន សមយេន, សុរុចី នាម ព្រាហ្មណោ;

អជ្ឈាយកោ មន្តធរោ, តិណ្ណំ វេទាន បារគូ.

១១. តមហំ ឧបសង្កម្ម, សរណំ គន្ត្វាន សត្ថុនោ;

សម្ពុទ្ធប្បមុខំ សង្ឃំ, គន្ធមាលេន បូជយិំ;

បូជេត្វា គន្ធមាលេន, គវបានេន តប្បយិំ.

១២. សោបិ មំ ពុទ្ធោ ព្យាកាសិ, មង្គលោ ទ្វិបទុត្តមោ;

‘‘អបរិមេយ្យិតោ កប្បេ, អយំ ពុទ្ធោ ភវិស្សតិ.

១៣. ‘‘បធានំ បទហិត្វាន…បេ… ហេស្សាម សម្មុខា ឥមំ’’.

១៤. តស្សាបិ វចនំ សុត្វា, ភិយ្យោ ចិត្តំ បសាទយិំ;

ឧត្តរិំ វតមធិដ្ឋាសិំ, ទស បារមិបូរិយា.

១៥. តទា បីតិមនុព្រូហន្តោ, សម្ពោធិវរបត្តិយា;

ពុទ្ធេ ទត្វាន មំ គេហំ, បព្ពជិំ តស្ស សន្តិកេ.

១៦. សុត្តន្តំ វិនយញ្ចាបិ, នវង្គំ សត្ថុសាសនំ;

សព្ពំ បរិយាបុណិត្វា, សោភយិំ ជិនសាសនំ.

១៧. តត្ថប្បមត្តោ វិហរន្តោ, ព្រហ្មំ ភាវេត្វ ភាវនំ;

អភិញ្ញាបារមិំ គន្ត្វា, ព្រហ្មលោកមគច្ឆហំ.

១៨. ឧត្តរំ នាម នគរំ, ឧត្តរោ នាម ខត្តិយោ;

ឧត្តរា នាម ជនិកា, មង្គលស្ស មហេសិនោ.

១៩. នវវស្សសហស្សានិ, អគារំ អជ្ឈ សោ វសិ;

យសវា សុចិមា សិរីមា, តយោ បាសាទមុត្តមា.

២០. សមតិំសសហស្សានិ, នារិយោ សមលង្កតា;

យសវតី នាម នារី, សីវលោ នាម អត្រជោ.

២១. និមិត្តេ ចតុរោ ទិស្វា, អស្សយានេន និក្ខមិ;

អនូនអដ្ឋមាសានិ, បធានំ បទហី ជិនោ.

២២. ព្រហ្មុនា យាចិតោ សន្តោ, មង្គលោ នាម នាយកោ;

វត្តិ ចក្កំ មហាវីរោ, វនេ សិរីវរុត្តមេ.

២៣. សុទេវោ ធម្មសេនោ ច, អហេសុំ អគ្គសាវកា;

បាលិតោ នាមុបដ្ឋាកោ, មង្គលស្ស មហេសិនោ.

២៤. សីវលា ច អសោកា ច, អហេសុំ អគ្គសាវិកា;

ពោធិ តស្ស ភគវតោ, នាគរុក្ខោតិ វុច្ចតិ.

២៥. នន្ទោ ចេវ វិសាខោ ច, អហេសុំ អគ្គុបដ្ឋកា;

អនុលា ចេវ សុតនា ច, អហេសុំ អគ្គុបដ្ឋិកា.

២៦. អដ្ឋាសីតិ រតនានិ, អច្ចុគ្គតោ មហាមុនិ;

តតោ និទ្ធាវតី រំសី, អនេកសតសហស្សិយោ.

២៧. នវុតិវស្សសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

២៨. យថាបិ សាគរេ ឩមី, ន សក្កា តា គណេតុយេ;

តថេវ សាវកា តស្ស, ន សក្កា តេ គណេតុយេ.

២៩. យាវ អដ្ឋាសិ សម្ពុទ្ធោ, មង្គលោ លោកនាយកោ;

ន តស្ស សាសនេ អត្ថិ, សកិលេសមរណំ [សំកិលេសមរណំ (សី.)] តទា.

៣០. ធម្មោក្កំ ធារយិត្វាន, សន្តារេត្វា មហាជនំ;

ជលិត្វា ធូមកេតូវ, និព្ពុតោ សោ មហាយសោ.

៣១. សង្ខារានំ សភាវត្ថំ, ទស្សយិត្វា សទេវកេ;

ជលិត្វា អគ្គិក្ខន្ធោវ, សូរិយោ អត្ថង្គតោ យថា.

៣២. ឧយ្យានេ វស្សរេ នាម, ពុទ្ធោ និព្ពាយិ មង្គលោ;

តត្ថេវស្ស ជិនថូបោ, តិំសយោជនមុគ្គតោតិ.

មង្គលស្ស ភគវតោ វំសោ តតិយោ.