៣. ទីបង្ករពុទ្ធវំសោ

១. តទា តេ ភោជយិត្វាន, សសង្ឃំ លោកនាយកំ;

ឧបគច្ឆុំ សរណំ តស្ស, ទីបង្ករស្ស សត្ថុនោ.

២. សរណាគមនេ កញ្ចិ, និវេសេសិ តថាគតោ;

កញ្ចិ បញ្ចសុ សីលេសុ, សីលេ ទសវិធេ បរំ.

៣. កស្សចិ ទេតិ សាមញ្ញំ, ចតុរោ ផលមុត្តមេ;

កស្សចិ អសមេ ធម្មេ, ទេតិ សោ បដិសម្ភិទា.

៤. កស្សចិ វរសមាបត្តិយោ, អដ្ឋ ទេតិ នរាសភោ;

តិស្សោ កស្សចិ វិជ្ជាយោ, ឆឡភិញ្ញា បវេច្ឆតិ.

៥. តេន យោគេន ជនកាយំ, ឱវទតិ មហាមុនិ;

តេន វិត្ថារិកំ អាសិ, លោកនាថស្ស សាសនំ.

៦. មហាហនុសភក្ខន្ធោ, ទីបង្ករស្ស នាមកោ;

ពហូ ជនេ តារយតិ, បរិមោចេតិ ទុគ្គតិំ.

៧. ពោធនេយ្យំ ជនំ ទិស្វា, សតសហស្សេបិ យោជនេ;

ខណេន ឧបគន្ត្វាន, ពោធេតិ តំ មហាមុនិ.

៨. បឋមាភិសមយេ ពុទ្ធោ, កោដិសតមពោធយិ;

ទុតិយាភិសមយេ នាថោ, នវុតិកោដិមពោធយិ.

៩. យទា ច ទេវភវនម្ហិ, ពុទ្ធោ ធម្មមទេសយិ;

នវុតិកោដិសហស្សានំ, តតិយាភិសមយោ អហុ.

១០. សន្និបាតា តយោ អាសុំ, ទីបង្ករស្ស សត្ថុនោ;

កោដិសតសហស្សានំ, បឋមោ អាសិ សមាគមោ.

១១. បុន នារទកូដម្ហិ, បវិវេកគតេ ជិនេ;

ខីណាសវា វីតមលា, សមិំសុ សតកោដិយោ.

១២. យម្ហិ កាលេ មហាវីរោ, សុទស្សនសិលុច្ចយេ;

នវកោដិសហស្សេហិ, បវារេសិ មហាមុនិ.

១៣. ទសវីសសហស្សានំ, ធម្មាភិសមយោ អហុ;

ឯកទ្វិន្នំ អភិសមយា, គណនាតោ អសង្ខិយា.

១៤. វិត្ថារិកំ ពាហុជញ្ញំ, ឥទ្ធំ ផីតំ អហូ តទា;

ទីបង្ករស្ស ភគវតោ, សាសនំ សុវិសោធិតំ.

១៥. ចត្តារិ សតសហស្សានិ, ឆឡភិញ្ញា មហិទ្ធិកា;

ទីបង្ករំ លោកវិទុំ, បរិវារេន្តិ សព្ពទា.

១៦. យេ កេចិ តេន សមយេន, ជហន្តិ មានុសំ ភវំ;

អបត្តមានសា សេខា, គរហិតា ភវន្តិ តេ.

១៧. សុបុប្ផិតំ បាវចនំ, អរហន្តេហិ តាទិហិ;

ខីណាសវេហិ វិមលេហិ, ឧបសោភតិ សព្ពទា.

១៨. នគរំ រម្មវតី នាម, សុទេវោ នាម ខត្តិយោ;

សុមេធា នាម ជនិកា, ទីបង្ករស្ស សត្ថុនោ.

១៩. ទសវស្សសហស្សានិ, អគារំ អជ្ឈ សោ វសិ [អជ្ឈាវសី ជិនោ (ស្យា. ក.)];

ហំសា កោញ្ចា មយូរា ច, តយោ បាសាទមុត្តមា.

២០. តីណិសតសហស្សានិ, នារិយោ សមលង្កតា;

បទុមា នាម សា នារី, ឧសភក្ខន្ធោ អត្រជោ.

២១. និមិត្តេ ចតុរោ ទិស្វា, ហត្ថិយានេន និក្ខមិ;

អនូនទសមាសានិ, បធានេ បទហី ជិនោ.

២២. បធានចារំ ចរិត្វាន, អពុជ្ឈិ មានសំ មុនិ;

ព្រហ្មុនា យាចិតោ សន្តោ, ទីបង្ករោ មហាមុនិ.

២៣. វត្តិ ចក្កំ មហាវីរោ, នន្ទារាមេ សិរីឃរេ [សិរីធរេ (សី.)];

និសិន្នោ សិរីសមូលម្ហិ, អកា តិត្ថិយមទ្ទនំ.

២៤. សុមង្គលោ ច តិស្សោ ច, អហេសុំ អគ្គសាវកា;

សាគតោ [សោភិតោ (ក.)] នាមុបដ្ឋាកោ, ទីបង្ករស្ស សត្ថុនោ.

២៥. នន្ទា ចេវ សុនន្ទា ច, អហេសុំ អគ្គសាវិកា;

ពោធិ តស្ស ភគវតោ, បិប្ផលីតិ បវុច្ចតិ.

២៦. តបុស្សភល្លិកា [តបស្សុភល្លិកា (សី.)] នាម, អហេសុំ អគ្គុបដ្ឋកា;

សិរិមា កោណា ឧបដ្ឋិកា, ទីបង្ករស្ស សត្ថុនោ.

២៧. អសីតិហត្ថមុព្ពេធោ, ទីបង្ករោ មហាមុនិ;

សោភតិ ទីបរុក្ខោវ, សាលរាជាវ ផុល្លិតោ.

២៨. សតសហស្សវស្សានិ, អាយុ តស្ស មហេសិនោ;

តាវតា តិដ្ឋមានោ សោ, តារេសិ ជនតំ ពហុំ.

២៩. ជោតយិត្វាន សទ្ធម្មំ, សន្តារេត្វា មហាជនំ;

ជលិត្វា អគ្គិក្ខន្ធោវ, និព្ពុតោ សោ សសាវកោ.

៣០. សា ច ឥទ្ធិ សោ ច យសោ, តានិ ច បាទេសុ ចក្ករតនានិ;

សព្ពំ តមន្តរហិតំ [សមន្តរហិតំ (សី. ស្យា. ក.)], ននុ រិត្តា សព្ពសង្ខារា [សព្ពសង្ខារាតិ (សព្ពត្ថ)].

៣១. ទីបង្ករោ ជិនោ សត្ថា, នន្ទារាមម្ហិ និព្ពុតោ;

តត្ថេវស្ស ជិនថូបោ, ឆត្តិំសុព្ពេធយោជនោតិ.

ទីបង្ករស្ស ភគវតោ វំសោ បឋមោ.