១០. បទុមបុប្ផិយត្ថេរអបទានំ

៥១. ‘‘បោក្ខរវនំ បវិដ្ឋោ, ភញ្ជន្តោ បទុមានិហំ;

តត្ថទ្ទសំ ផុស្សំ ពុទ្ធំ [អទ្ទសំ ផុស្សសម្ពុទ្ធំ (សី. ស្យា.)], ពាត្តិំសវរលក្ខណំ.

៥២. ‘‘បទុមបុប្ផំ គហេត្វាន, អាកាសេ ឧក្ខិបិំ អហំ;

បាបកម្មំ សរិត្វាន, បព្ពជិំ អនគារិយំ.

៥៣. ‘‘បព្ពជិត្វាន កាយេន, មនសា សំវុតេន ច;

វចីទុច្ចរិតំ ហិត្វា, អាជីវំ បរិសោធយិំ.

៥៤. ‘‘ទ្វេនវុតេ ឥតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៥៥. ‘‘បទុមាភាសនាមា ច, អដ្ឋារស មហីបតី;

អដ្ឋារសេសុ កប្បេសុ, អដ្ឋតាលីសមាសិសុំ.

៥៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បទុមបុប្ផិយោ ថេរោ ឥមា គាថាយោ អភាសិត្ថាតិ;

បទុមបុប្ផិយត្ថេរស្សាបទានំ ទសមំ.

តិមិរវគ្គោ នវមោ.