៩. តិមិរវគ្គោ

១. តិមិរបុប្ផិយត្ថេរអបទានំ

១. ‘‘ចន្ទភាគានទីតីរេ, អនុសោតំ វជាមហំ;

និសិន្នំ សមណំ ទិស្វា, វិប្បសន្នមនាវិលំ.

២. ‘‘តត្ថ ចិត្តំ បសាទេត្វា [បសាទេសិំ (ស្យា.)], ឯវំ ចិន្តេសហំ តទា;

តារយិស្សតិ តិណ្ណោយំ, ទន្តោយំ ទមយិស្សតិ.

៣. ‘‘អស្សាសិស្សតិ អស្សត្ថោ, សន្តោ ច សមយិស្សតិ;

មោចយិស្សតិ មុត្តោ ច, និព្ពាបេស្សតិ និព្ពុតោ.

៤. ‘‘ឯវាហំ ចិន្តយិត្វាន, សិទ្ធត្ថស្ស មហេសិនោ;

គហេត្វា តិមិរបុប្ផំ, មត្ថកេ ឱកិរិំ អហំ [តទា (ស្យា.)].

៥. ‘‘អញ្ជលិំ បគ្គហេត្វាន, កត្វា ច នំ បទក្ខិណំ;

វន្ទិត្វា សត្ថុនោ បាទេ, បក្កាមិំ អបរំ ទិសំ.

៦. ‘‘អចិរំ គតមត្តំ មំ, មិគរាជា វិហេឋយិ;

បបាតមនុគច្ឆន្តោ, តត្ថេវ បបតិំ អហំ.

៧. ‘‘ចតុន្នវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, បុប្ផបូជាយិទំ [ពុទ្ធបូជាយិទំ (សី. ស្យា.)] ផលំ.

៨. ‘‘ឆប្បញ្ញាសម្ហិ កប្បម្ហិ, សត្តេវាសុំ មហាយសា [មហារហា (ស្យា. ក.)];

សត្តរតនសម្បន្នា, ចក្កវត្តី មហព្ពលា.

៩. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា តិមិរបុប្ផិយោ ថេរោ ឥមា គាថាយោ អភាសិត្ថាតិ.

តិមិរបុប្ផិយត្ថេរស្សាបទានំ បឋមំ.

២. គតសញ្ញកត្ថេរអបទានំ

១០. ‘‘ជាតិយា សត្តវស្សោហំ, បព្ពជិំ អនគារិយំ;

អវន្ទិំ សត្ថុនោ បាទេ, វិប្បសន្នេន ចេតសា.

១១. ‘‘សត្តនង្គលកីបុប្ផេ, អាកាសេ ឧក្ខិបិំ អហំ;

តិស្សំ ពុទ្ធំ សមុទ្ទិស្ស, អនន្តគុណសាគរំ.

១២. ‘‘សុគតានុគតំ មគ្គំ, បូជេត្វា ហដ្ឋមានសោ;

អញ្ជលិញ្ច [អញ្ជលិស្ស (ក.)] តទាកាសិំ, បសន្នោ សេហិ បាណិភិ.

១៣. ‘‘ទ្វេនវុតេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ពុទ្ធបូជាយិទំ ផលំ.

១៤. ‘‘ឥតោ អដ្ឋមកេ កប្បេ, តយោ អគ្គិសិខា អហុ;

សត្តរតនសម្បន្នា, ចក្កវត្តី មហព្ពលា.

១៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា គតសញ្ញកោ ថេរោ ឥមា គាថាយោ អភាសិត្ថាតិ.

គតសញ្ញកត្ថេរស្សាបទានំ ទុតិយំ.

៣. និបន្នញ្ជលិកត្ថេរអបទានំ

១៦. ‘‘រុក្ខមូលេ និសិន្នោហំ, ព្យាធិតោ បរមេន ច;

បរមការុញ្ញបត្តោម្ហិ, អរញ្ញេ កាននេ អហំ.

១៧. ‘‘អនុកម្បំ ឧបាទាយ, តិស្សោ សត្ថា ឧបេសិ មំ;

សោហំ និបន្នកោ សន្តោ, សិរេ កត្វាន អញ្ជលិំ.

១៨. ‘‘បសន្នចិត្តោ សុមនោ, សព្ពសត្តានមុត្តមំ;

សម្ពុទ្ធំ អភិវាទេត្វា, តត្ថ កាលង្កតោ អហំ.

១៩. ‘‘ទ្វេនវុតេ ឥតោ កប្បេ, យំ វន្ទិំ បុរិសុត្តមំ;

ទុគ្គតិំ នាភិជានាមិ, វន្ទនាយ ឥទំ ផលំ.

២០. ‘‘ឥតោ បញ្ចមកេ កប្បេ, បញ្ចេវាសុំ មហាសិខា;

សត្តរតនសម្បន្នា, ចក្កវត្តី មហព្ពលា.

២១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា និបន្នញ្ជលិកោ ថេរោ ឥមា គាថាយោ អភាសិត្ថាតិ.

និបន្នញ្ជលិកត្ថេរស្សាបទានំ តតិយំ.

៤. អធោបុប្ផិយត្ថេរអបទានំ

២២. ‘‘អភិភូ នាម សោ ភិក្ខុ, សិខិនោ អគ្គសាវកោ;

មហានុភាវោ តេវិជ្ជោ, ហិមវន្តំ ឧបាគមិ.

២៣. ‘‘អហម្បិ ហិមវន្តម្ហិ, រមណីយស្សមេ ឥសិ;

វសាមិ អប្បមញ្ញាសុ, ឥទ្ធីសុ ច តទា វសី.

២៤. ‘‘បក្ខិជាតោ វិយាកាសេ, បព្ពតំ អធិវត្តយិំ [អភិបត្ថយិំ (ស្យា.), អភិមត្ថយិំ (ក.), អធិវត្ថយិន្តិ បព្ពតស្ស ឧបរិ គច្ឆិន្តិអត្ថោ];

អធោបុប្ផំ គហេត្វាន, អាគច្ឆិំ [អគច្ឆិំ (ក.)] បព្ពតំ អហំ.

២៥. ‘‘សត្ត បុប្ផានិ គណ្ហិត្វា, មត្ថកេ ឱកិរិំ អហំ;

អាលោកិតេ [អាលោកិតោ (ស្យា.)] ច វីរេន, បក្កាមិំ បាចិនាមុខោ.

២៦. ‘‘អាវាសំ អភិសម្ភោសិំ, បត្វាន អស្សមំ អហំ;

ខារិភារំ គហេត្វាន, បាយាសិំ [បាវិសិំ (សី.)] បព្ពតន្តរំ.

២៧. ‘‘អជគរោ មំ បីឡេសិ, ឃោររូបោ មហព្ពលោ;

បុព្ពកម្មំ សរិត្វាន, តត្ថ កាលង្កតោ អហំ.

២៨. ‘‘ឯកត្តិំសេ ឥតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, បុប្ផបូជាយិទំ ផលំ.

២៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អធោបុប្ផិយោ ថេរោ ឥមា គាថាយោ អភាសិត្ថាតិ.

អធោបុប្ផិយត្ថេរស្សាបទានំ ចតុត្ថំ.

៥. រំសិសញ្ញកត្ថេរអបទានំ

៣០. ‘‘បព្ពតេ ហិមវន្តម្ហិ, វាសំ កប្បេសហំ បុរេ;

អជិនុត្តរវាសោហំ, វសាមិ បព្ពតន្តរេ.

៣១. ‘‘សុវណ្ណវណ្ណំ សម្ពុទ្ធំ, សតរំសិំវ ភាណុមំ;

វនន្តរគតំ ទិស្វា, សាលរាជំវ បុប្ផិតំ.

៣២. ‘‘រំស្យា [រំសេ (ស្យា. ក.)] ចិត្តំ បសាទេត្វា, វិបស្សិស្ស មហេសិនោ;

បគ្គយ្ហ អញ្ជលិំ វន្ទិំ, សិរសា ឧក្កុដី [សិរសា ឧក្កុដិកោ (ស្យា.), សិរសុក្កុដិកោ (ក.)] អហំ.

៣៣. ‘‘ឯកនវុតិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, រំសិសញ្ញាយិទំ ផលំ.

៣៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា រំសិសញ្ញកោ ថេរោ ឥមា គាថាយោ អភាសិត្ថាតិ.

រំសិសញ្ញកត្ថេរស្សាបទានំ បញ្ចមំ.

៦. ទុតិយរំសិសញ្ញកត្ថេរអបទានំ

៣៥. ‘‘បព្ពតេ ហិមវន្តម្ហិ, វាកចីរធរោ អហំ;

ចង្កមញ្ច សមារូឡ្ហោ, និសីទិំ បាចិនាមុខោ.

៣៦. ‘‘បព្ពតេ សុគតំ ទិស្វា, ផុស្សំ ឈានរតំ តទា;

អញ្ជលិំ បគ្គហេត្វាន, រំស្យា ចិត្តំ បសាទយិំ.

៣៧. ‘‘ទ្វេនវុតេ ឥតោ កប្បេ, យំ សញ្ញមលភិំ តទា;

ទុគ្គតិំ នាភិជានាមិ, រំសិសញ្ញាយិទំ ផលំ.

៣៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា រំសិសញ្ញកោ ថេរោ ឥមា គាថាយោ អភាសិត្ថាតិ.

ទុតិយរំសិសញ្ញកត្ថេរស្សាបទានំ ឆដ្ឋំ.

៧. ផលទាយកត្ថេរអបទានំ

៣៩. ‘‘បព្ពតេ ហិមវន្តម្ហិ, ខរាជិនធរោ អហំ;

ផុស្សំ ជិនវរំ ទិស្វា, ផលហត្ថោ ផលំ អទំ.

៤០. ‘‘យមហំ ផលមទាសិំ, វិប្បសន្នេន ចេតសា;

ភវេ និព្ពត្តមានម្ហិ, ផលំ និព្ពត្តតេ មម.

៤១. ‘‘ទ្វេនវុតេ ឥតោ កប្បេ, យំ ផលំ អទទិំ អហំ;

ទុគ្គតិំ នាភិជានាមិ, ផលទានស្សិទំ ផលំ.

៤២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ផលទាយកោ ថេរោ ឥមា គាថាយោ អភាសិត្ថាតិ.

ផលទាយកត្ថេរស្សាបទានំ សត្តមំ.

៨. សទ្ទសញ្ញកត្ថេរអបទានំ

៤៣. ‘‘បព្ពតេ ហិមវន្តម្ហិ, វសាមិ បណ្ណសន្ថរេ;

ផុស្សស្ស ធម្មំ ភណតោ, សទ្ទេ ចិត្តំ បសាទយិំ.

៤៤. ‘‘ទ្វេនវុតេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, បុញ្ញកម្មស្សិទំ ផលំ.

៤៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សទ្ទសញ្ញកោ ថេរោ ឥមា គាថាយោ អភាសិត្ថាតិ.

សទ្ទសញ្ញកត្ថេរស្សាបទានំ អដ្ឋមំ.

៩. ពោធិសិញ្ចកត្ថេរអបទានំ

៤៦. ‘‘វិបស្សិស្ស ភគវតោ, មហាពោធិមហោ អហុ;

បព្ពជ្ជុបគតោ សន្តោ, ឧបគច្ឆិំ អហំ តទា.

៤៧. ‘‘កុសុមោទកមាទាយ, ពោធិយា ឱកិរិំ អហំ;

មោចយិស្សតិ នោ មុត្តោ, និព្ពាបេស្សតិ និព្ពុតោ.

៤៨. ‘‘ឯកនវុតិតោ កប្បេ, យំ ពោធិមភិសិញ្ចយិំ;

ទុគ្គតិំ នាភិជានាមិ, ពោធិសិញ្ចាយិទំ ផលំ.

៤៩. ‘‘តេត្តិំសេ វត្តមានម្ហិ, កប្បេ អាសុំ ជនាធិបា;

ឧទកសេចនា នាម, អដ្ឋេតេ ចក្កវត្តិនោ.

៥០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ពោធិសិញ្ចកោ ថេរោ ឥមា គាថាយោ អភាសិត្ថាតិ.

ពោធិសិញ្ចកត្ថេរស្សាបទានំ នវមំ.

១០. បទុមបុប្ផិយត្ថេរអបទានំ

៥១. ‘‘បោក្ខរវនំ បវិដ្ឋោ, ភញ្ជន្តោ បទុមានិហំ;

តត្ថទ្ទសំ ផុស្សំ ពុទ្ធំ [អទ្ទសំ ផុស្សសម្ពុទ្ធំ (សី. ស្យា.)], ពាត្តិំសវរលក្ខណំ.

៥២. ‘‘បទុមបុប្ផំ គហេត្វាន, អាកាសេ ឧក្ខិបិំ អហំ;

បាបកម្មំ សរិត្វាន, បព្ពជិំ អនគារិយំ.

៥៣. ‘‘បព្ពជិត្វាន កាយេន, មនសា សំវុតេន ច;

វចីទុច្ចរិតំ ហិត្វា, អាជីវំ បរិសោធយិំ.

៥៤. ‘‘ទ្វេនវុតេ ឥតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៥៥. ‘‘បទុមាភាសនាមា ច, អដ្ឋារស មហីបតី;

អដ្ឋារសេសុ កប្បេសុ, អដ្ឋតាលីសមាសិសុំ.

៥៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បទុមបុប្ផិយោ ថេរោ ឥមា គាថាយោ អភាសិត្ថាតិ;

បទុមបុប្ផិយត្ថេរស្សាបទានំ ទសមំ.

តិមិរវគ្គោ នវមោ.