៩. ឋិតញ្ជលិយត្ថេរអបទានំ

៤២. ‘‘មិគលុទ្ទោ បុរេ អាសិំ, អរញ្ញេ កាននេ អហំ;

តត្ថ អទ្ទសំ [តត្ថទ្ទសាសិំ (សី. ស្យា.)] សម្ពុទ្ធំ, ពាត្តិំសវរលក្ខណំ.

៤៣. ‘‘តត្ថាហំ អញ្ជលិំ កត្វា, បក្កាមិំ បាចិនាមុខោ;

អវិទូរេ និសិន្នស្ស, និយកេ បណ្ណសន្ថរេ.

៤៤. ‘‘តតោ មេ អសនីបាតោ, មត្ថកេ និបតី តទា;

សោហំ មរណកាលម្ហិ, អកាសិំ បុនរញ្ជលិំ.

៤៥. ‘‘ទ្វេនវុតេ ឥតោ កប្បេ, អញ្ជលិំ អករិំ តទា;

ទុគ្គតិំ នាភិជានាមិ, អញ្ជលិស្ស ឥទំ ផលំ.

៤៦. ‘‘ចតុបណ្ណាសកប្បម្ហិ, មិគកេតុសនាមកោ;

សត្តរតនសម្បន្នោ, ចក្កវត្តី មហព្ពលោ.

៤៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឋិតញ្ជលិយោ ថេរោ ឥមា គាថាយោ អភាសិត្ថាតិ.

ឋិតញ្ជលិយត្ថេរស្សាបទានំ នវមំ.