១០. តិបទុមិយត្ថេរអបទានំ

៤៨. ‘‘បទុមុត្តរោ នាម ជិនោ, សព្ពធម្មាន បារគូ;

ទន្តោ ទន្តបរិវុតោ, នគរា និក្ខមី តទា.

៤៩. ‘‘នគរេ ហំសវតិយំ, អហោសិំ មាលិកោ តទា;

យំ តត្ថ ឧត្តមំ តោណិ, បទ្មបុប្ផានិ [ឧត្តមំ បុប្ផំ, តីណិ បុប្ផានិ (សី.)] អគ្គហិំ.

៥០. ‘‘អទ្ទសំ វិរជំ ពុទ្ធំ, បដិមគ្គន្តរាបណេ;

សហ [សោហំ (សី.)] ទិស្វាន សម្ពុទ្ធំ, ឯវំ ចិន្តេសហំ តទា.

៥១. ‘‘កិំ មេ ឥមេហិ បុប្ផេហិ, រញ្ញោ ឧបនិតេហិ មេ;

គាមំ វា គាមខេត្តំ វា, សហស្សំ វា លភេយ្យហំ.

៥២. ‘‘អទន្តទមនំ វីរំ, សព្ពសត្តសុខាវហំ;

លោកនាថំ បូជយិត្វា, លច្ឆាមិ អមតំ ធនំ.

៥៣. ‘‘ឯវាហំ ចិន្តយិត្វាន, សកំ ចិត្តំ បសាទយិំ;

តីណិ លោហិតកេ គយ្ហ, អាកាសេ ឧក្ខិបិំ តទា.

៥៤. ‘‘មយា ឧក្ខិត្តមត្តម្ហិ, អាកាសេ បត្ថរិំសុ តេ;

ធារិំសុ មត្ថកេ តត្ថ, ឧទ្ធំវណ្ដា អធោមុខា.

៥៥. ‘‘យេ កេចិ មនុជា ទិស្វា, ឧក្កុដ្ឋិំ សម្បវត្តយុំ;

ទេវតា អន្តលិក្ខម្ហិ, សាធុការំ បវត្តយុំ.

៥៦. ‘‘អច្ឆេរំ លោកេ ឧប្បន្នំ, ពុទ្ធសេដ្ឋស្ស វាហសា;

សព្ពេ ធម្មំ សុណិស្សាម, បុប្ផានំ វាហសា មយំ.

៥៧. ‘‘បទុមុត្តរោ លោកវិទូ, អាហុតីនំ បដិគ្គហោ;

វីថិយញ្ហិ ឋិតោ សន្តោ, ឥមា គាថា អភាសថ.

៥៨. ‘‘‘យោ សោ ពុទ្ធំ អបូជេសិ, រត្តបទ្មេហិ [រត្តបទុមេហិ (សី. ស្យា.)] មាណវោ;

តមហំ កិត្តយិស្សាមិ, សុណាថ មម ភាសតោ.

៥៩. ‘‘‘តិំសកប្បសហស្សានិ, ទេវលោកេ រមិស្សតិ;

តិំសកប្បានិ [តិំសក្ខត្តុញ្ច (ស្យា.)] ទេវិន្ទោ, ទេវរជ្ជំ ករិស្សតិ.

៦០. ‘‘‘មហាវិត្ថារិកំ នាម, ព្យម្ហំ ហេស្សតិ តាវទេ;

តិយោជនសតុព្ពិទ្ធំ, ទិយឌ្ឍសតវិត្ថតំ.

៦១. ‘‘‘ចត្តារិសតសហស្សានិ, និយ្យូហា ច សុមាបិតា;

កូដាគារវរូបេតា, មហាសយនមណ្ឌិតា.

៦២. ‘‘‘កោដិសតសហស្សិយោ, បរិវារេស្សន្តិ អច្ឆរា;

កុសលា នច្ចគីតស្ស, វាទិតេបិ បទក្ខិណា.

៦៣. ‘‘‘ឯតាទិសេ ព្យម្ហវរេ, នារីគណសមាកុលេ;

វស្សិស្សតិ បុប្ផវស្សោ, ទិព្ពោ [បទ (ក.)] លោហិតកោ សទា.

៦៤. ‘‘‘ភិត្តិខីលេ នាគទន្តេ, ទ្វារពាហាយ តោរណេ;

ចក្កមត្តា លោហិតកា, ឱលម្ពិស្សន្តិ តាវទេ.

៦៥. ‘‘‘បត្តេន បត្តសញ្ឆន្នេ, អន្តោព្យម្ហវរេ ឥមំ;

អត្ថរិត្វា បារុបិត្វា, តុវដ្ដិស្សន្តិ តាវទេ.

៦៦. ‘‘‘ភវនំ បរិវារេត្វា, សមន្តា សតយោជនេ;

តេបិ បទ្មា [តេ វិសុទ្ធា (សី. ស្យា.)] លោហិតកា, ទិព្ពគន្ធំ បវាយរេ.

៦៧. ‘‘‘បញ្ចសត្តតិក្ខត្តុញ្ច, ចក្កវត្តី ភវិស្សតិ;

បទេសរជ្ជំ វិបុលំ, គណនាតោ អសង្ខិយំ.

៦៨. ‘‘‘សម្បត្តិយោ ទុវេ ភុត្វា, អនីតិ អនុបទ្ទវោ;

សម្បត្តេ បរិយោសានេ, និព្ពានំ បាបុណិស្សតិ’ [ផស្សយិស្សតិ (សី.), បស្សយិស្សតិ (ក.)].

៦៩. ‘‘សុទិដ្ឋោ វត មេ ពុទ្ធោ, វាណិជ្ជំ សុបយោជិតំ;

បទ្មានិ តីណិ បូជេត្វា, អនុភោសិំ តិសម្បទា [អនុភូយន្តិ សម្បទា (ក.)].

៧០. ‘‘អជ្ជ មេ ធម្មប្បត្តស្ស, វិប្បមុត្តស្ស សព្ពសោ;

សុបុប្ផិតំ លោហិតកំ, ធារយិស្សតិ មត្ថកេ.

៧១. ‘‘មម កម្មំ កថេន្តស្ស, បទុមុត្តរសត្ថុនោ;

សតបាណសហស្សានំ, ធម្មាភិសមយោ អហុ.

៧២. ‘‘សតសហស្សិតោ កប្បេ, យំ ពុទ្ធមភិបូជយិំ;

ទុគ្គតិំ នាភិជានាមិ, តិបទុមានិទំ ផលំ.

៧៣. ‘‘កិលេសា ឈាបិតា មយ្ហំ, ភវា សព្ពេ សមូហតា;

សព្ពាសវា បរិក្ខីណា, នត្ថិ ទានិ បុនព្ភវោ.

៧៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិបទុមិយោ ថេរោ ឥមា គាថាយោ អភាសិត្ថាតិ.

តិបទុមិយត្ថេរស្សាបទានំ ទសមំ.

នាគសមាលវគ្គោ អដ្ឋមោ.