៨. បាដលិបុប្ផិយត្ថេរអបទានំ

៣៦. ‘‘សុវណ្ណវណ្ណំ សម្ពុទ្ធំ, គច្ឆន្តំ អន្តរាបណេ;

កញ្ចនគ្ឃិយសង្កាសំ, ពាត្តិំសវរលក្ខណំ.

៣៧. ‘‘សេដ្ឋិបុត្តោ តទា អាសិំ, សុខុមាលោ សុខេធិតោ;

ឧច្ឆង្គេ បាដលិបុប្ផំ, កត្វាន [កត្វា តំ (សី. ស្យា.)] អភិសំហរិំ.

៣៨. ‘‘ហដ្ឋោ ហដ្ឋេន ចិត្តេន, បុប្ផេហិ អភិបូជយិំ;

តិស្សំ លោកវិទុំ នាថំ, នរទេវំ នមស្សហំ.

៣៩. ‘‘ទ្វេនវុតេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, បុប្ផបូជាយិទំ ផលំ.

៤០. ‘‘ឥតោ តេសដ្ឋិកប្បម្ហិ, អភិសម្មតនាមកោ;

សត្តរតនសម្បន្នោ, ចក្កវត្តី មហព្ពលោ.

៤១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បាដលិបុប្ផិយោ ថេរោ ឥមា គាថាយោ អភាសិត្ថាតិ.

បាដលិបុប្ផិយត្ថេរស្សាបទានំ អដ្ឋមំ.