៧. សូចិទាយកត្ថេរអបទានំ

៣០. ‘‘តិំសកប្បសហស្សម្ហិ, សម្ពុទ្ធោ លោកនាយកោ;

សុមេធោ នាម នាមេន, ពាត្តិំសវរលក្ខណោ.

៣១. ‘‘តស្ស កញ្ចនវណ្ណស្ស, ទ្វិបទិន្ទស្ស តាទិនោ;

បញ្ច សូចី មយា ទិន្នា, សិព្ពនត្ថាយ ចីវរំ.

៣២. ‘‘តេនេវ សូចិទានេន, និបុណត្ថវិបស្សកំ;

តិក្ខំ លហុញ្ច ផាសុញ្ច, ញាណំ មេ ឧទបជ្ជថ.

៣៣. ‘‘កិលេសា ឈាបិតា មយ្ហំ, ភវា សព្ពេ សមូហតា;

ធារេមិ អន្តិមំ ទេហំ, សម្មាសម្ពុទ្ធសាសនេ.

៣៤. ‘‘ទ្វិបទាធិបតី នាម, រាជានោ ចតុរោ អហុំ;

សត្តរតនសម្បន្នា, ចក្កវត្តី មហព្ពលា.

៣៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សូចិទាយកោ ថេរោ ឥមា គាថាយោ អភាសិត្ថាតិ.

សូចិទាយកត្ថេរស្សាបទានំ សត្តមំ.