៦. តិណសន្ថរទាយកត្ថេរអបទានំ

២២. ‘‘ហិមវន្តស្សាវិទូរេ, មហាជាតស្សរោ អហុ;

សតបត្តេហិ សញ្ឆន្នោ, នានាសកុណមាលយោ.

២៣. ‘‘តម្ហិ ន្ហត្វា ច បិត្វា [បីត្វា (សី. ស្យា.)] ច, អវិទូរេ វសាមហំ;

អទ្ទសំ សមណានគ្គំ, គច្ឆន្តំ អនិលញ្ជសេ.

២៤. ‘‘មម សង្កប្បមញ្ញាយ, សត្ថា លោកេ អនុត្តរោ;

អព្ភតោ ឱរុហិត្វាន, ភូមិយំឋាសិ តាវទេ.

២៥. ‘‘វិសាណេន [លាយនេន (ស្យា.)] តិណំ គយ្ហ, និសីទនមទាសហំ;

និសីទិ ភគវា តត្ថ, តិស្សោ លោកគ្គនាយកោ.

២៦. ‘‘សកំ ចិត្តំ បសាទេត្វា, អវន្ទិ លោកនាយកំ;

បដិកុដិកោ [ឧក្កុដិកោ (ស្យា. ក.)] អបសក្កិំ, និជ្ឈាយន្តោ មហាមុនិំ.

២៧. ‘‘តេន ចិត្តប្បសាទេន, និម្មានំ ឧបបជ្ជហំ;

ទុគ្គតិំ នាភិជានាមិ, សន្ថរស្ស ឥទំ ផលំ.

២៨. ‘‘ឥតោ ទុតិយកេ កប្បេ, មិគ [មិត្ត (ស្យា.)] សម្មតខត្តិយោ;

សត្តរតនសម្បន្នោ, ចក្កវត្តី មហព្ពលោ.

២៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិណសន្ថរទាយកោ ថេរោ ឥមា គាថាយោ អភាសិត្ថាតិ.

តិណសន្ថរទាយកត្ថេរស្សាបទានំ ឆដ្ឋំ.