១. នាគសមាលត្ថេរអបទានំ

១. ‘‘អបាដលិំ អហំ បុប្ផំ, ឧជ្ឈិតំ សុមហាបថេ;

ថូបម្ហិ អភិរោបេសិំ, សិខិនោ លោកពន្ធុនោ.

២. ‘‘ឯកត្តិំសេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ថូបបូជាយិទំ ផលំ.

៣. ‘‘ឥតោ បន្នរសេ កប្បេ, ភូមិយោ [បុប្ផិយោ (ស្យា.)] នាម ខត្តិយោ;

សត្តរតនសម្បន្នោ, ចក្កវត្តី មហព្ពលោ.

៤. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា នាគសមាលោ ថេរោ ឥមា គាថាយោ អភាសិត្ថាតិ.

នាគសមាលត្ថេរស្សាបទានំ បឋមំ.