៧. វត្ថទាយកត្ថេរអបទានំ

៤៥. ‘‘បក្ខិជាតោ តទា អាសិំ, សុបណ្ណោ គរុឡាធិបោ;

អទ្ទសំ វិរជំ ពុទ្ធំ, គច្ឆន្តំ គន្ធមាទនំ.

៤៦. ‘‘ជហិត្វា គរុឡវណ្ណំ, មាណវកំ អធារយិំ;

ឯកំ វត្ថំ មយា ទិន្នំ, ទ្វិបទិន្ទស្ស តាទិនោ.

៤៧. ‘‘តញ្ច ទុស្សំ បដិគ្គយ្ហ, ពុទ្ធោ លោកគ្គនាយកោ;

អន្តលិក្ខេ ឋិតោ សត្ថា, ឥមា គាថា អភាសថ.

៤៨. ‘‘‘ឥមិនា វត្ថទានេន, ចិត្តស្ស បណិធីហិ ច;

បហាយ គរុឡំ យោនិំ, ទេវលោកេ រមិស្សតិ’.

៤៩. ‘‘អត្ថទស្សី តុ ភគវា, លោកជេដ្ឋោ នរាសភោ;

វត្ថទានំ បសំសិត្វា, បក្កាមិ ឧត្តរាមុខោ.

៥០. ‘‘ភវេ និព្ពត្តមានម្ហិ, ហោន្តិ មេ វត្ថសម្បទា;

អាកាសេ ឆទនំ ហោតិ, វត្ថទានស្សិទំ ផលំ.

៥១. ‘‘អរុណវា [អរុណកា (សី.), អរុណសា (ស្យា.)] សត្ត ជនា, ចក្កវត្តី មហព្ពលា;

ឆត្តិំសតិម្ហិ អាសិំសុ, កប្បម្ហិ មនុជាធិបា.

៥២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា វត្ថទាយកោ ថេរោ ឥមា គាថាយោ អភាសិត្ថាតិ.

វត្ថទាយកត្ថេរស្សាបទានំ សត្តមំ.