៨. អម្ពទាយកត្ថេរអបទានំ

៥៣. ‘‘អនោមទស្សី ភគវា, និសិន្នោ បព្ពតន្តរេ;

មេត្តាយ អផរិ លោកេ, អប្បមាណេ និរូបធិ.

៥៤. ‘‘កបិ អហំ តទា អាសិំ, ហិមវន្តេ នគុត្តមេ;

ទិស្វា អនោមទស្សិំ តំ [អនោមំ អមិតំ (សី.), អនោមមធិតំ (ស្យា.)], ពុទ្ធេ ចិត្តំ បសាទយិំ.

៥៥. ‘‘អវិទូរេ ហិមវន្តស្ស, អម្ពាសុំ ផលិនោ តទា;

តតោ បក្កំ គហេត្វាន, អម្ពំ សមធុកំ អទំ.

៥៦. ‘‘តំ មេ ពុទ្ធោ វិយាកាសិ, អនោមទស្សី មហាមុនិ;

ឥមិនា មធុទានេន, អម្ពទានេន ចូភយំ.

៥៧. ‘‘សត្តបញ្ញាសកប្បម្ហិ, ទេវលោកេ រមិស្សតិ;

អវសេសេសុ កប្បេសុ, វោកិណ្ណំ សំសរិស្សតិ.

៥៨. ‘‘ខេបេត្វា បាបកំ កម្មំ, បរិបក្កាយ ពុទ្ធិយា;

វិនិបាតមគន្ត្វាន, កិលេសេ ឈាបយិស្សតិ.

៥៩. ‘‘ទមេន ឧត្តមេនាហំ, ទមិតោម្ហិ មហេសិនា;

បត្តោម្ហិ អចលំ ឋានំ, ហិត្វា ជយបរាជយំ.

៦០. ‘‘សត្តសត្តតិកប្បសតេ, អម្ពដ្ឋជសនាមកា;

ចតុទ្ទស តេ រាជានោ, ចក្កវត្តី មហព្ពលា.

៦១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អម្ពទាយកោ ថេរោ ឥមា គាថាយោ អភាសិត្ថាតិ.

អម្ពទាយកត្ថេរស្សាបទានំ អដ្ឋមំ.