៦. សុចិន្តិតត្ថេរអបទានំ

៣៦. ‘‘គិរិទុគ្គចរោ អាសិំ, អភិជាតោវ កេសរី;

មិគសង្ឃំ វធិត្វាន, ជីវាមិ បព្ពតន្តរេ.

៣៧. ‘‘អត្ថទស្សី តុ ភគវា, សព្ពញ្ញូ វទតំ វរោ;

មមុទ្ធរិតុកាមោ សោ, អាគច្ឆិ បព្ពតុត្តមំ.

៣៨. ‘‘បសទញ្ច មិគំ ហន្ត្វា, ភក្ខិតុំ សមុបាគមិំ;

ភគវា តម្ហិ សមយេ, ភិក្ខមានោ [សិក្ខាចារោ (ស្យា.)] ឧបាគមិ.

៣៩. ‘‘វរមំសានិ បគ្គយ្ហ, អទាសិំ តស្ស សត្ថុនោ;

អនុមោទិ មហាវីរោ, និព្ពាបេន្តោ មមំ តទា.

៤០. ‘‘តេន ចិត្តប្បសាទេន, គិរិទុគ្គំ បវិសិំ អហំ;

បីតិំ ឧប្បាទយិត្វាន, តត្ថ កាលង្កតោ អហំ.

៤១. ‘‘ឯតេន មំសទានេន, ចិត្តស្ស បណិធីហិ ច;

បន្នរសេ កប្បសតេ, ទេវលោកេ រមិំ អហំ.

៤២. ‘‘អវសេសេសុ កប្បេសុ, កុសលំ ចិន្តិតំ [និចិតំ (សី.), ករិតំ (ស្យា.)] មយា;

តេនេវ មំសទានេន, ពុទ្ធានុស្សរណេន ច.

៤៣. ‘‘អដ្ឋត្តិំសម្ហិ កប្បម្ហិ, អដ្ឋ ទីឃាយុនាមកា;

សដ្ឋិម្ហិតោ កប្បសតេ, ទុវេ វរុណនាមកា [សរណនាមកា (ស្យា.)].

៤៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សុចិន្តិតោ ថេរោ ឥមា គាថាយោ អភាសិត្ថាតិ.

សុចិន្តិតត្ថេរស្សាបទានំ ឆដ្ឋំ.