១០. បុប្ផចង្កោដិយត្ថេរអបទានំ

៦៨. ‘‘អភីតរូបំ សីហំវ, គរុឡគ្គំវ បក្ខិនំ;

ព្យគ្ឃូសភំវ បវរំ, អភិជាតំវ កេសរិំ.

៦៩. ‘‘សិខិំ តិលោកសរណំ, អនេជំ អបរាជិតំ;

និសិន្នំ សមណានគ្គំ, ភិក្ខុសង្ឃបុរក្ខតំ.

៧០. ‘‘ចង្កោដកេ [ចង្គោដកេ (សី.)] ឋបេត្វាន, អនោជំ បុប្ផមុត្តមំ;

សហ ចង្កោដកេនេវ, ពុទ្ធសេដ្ឋំ សមោកិរិំ.

៧១. ‘‘តេន ចិត្តប្បសាទេន, ទ្វិបទិន្ទ នរាសភ;

បត្តោម្ហិ អចលំ ឋានំ, ហិត្វា ជយបរាជយំ.

៧២. ‘‘ឯកត្តិំសេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ពុទ្ធបូជាយិទំ ផលំ.

៧៣. ‘‘សម្បុណ្ណេ តិំសកប្បម្ហិ, ទេវភូតិសនាមកា;

សត្តរតនសម្បន្នា, បញ្ចាសុំ ចក្កវត្តិនោ.

៧៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បុប្ផចង្កោដិយោ ថេរោ ឥមា គាថាយោ អភាសិត្ថាតិ.

បុប្ផចង្កោដិយត្ថេរស្សាបទានំ ទសមំ.

សកចិន្តនិយវគ្គោ សត្តមោ.