២. សតរំសិត្ថេរអបទានំ

៨. ‘‘ឧព្ពិទ្ធំ សេលមារុយ្ហ, និសីទិ បុរិសុត្តមោ;

បព្ពតស្សាវិទូរម្ហិ, ព្រាហ្មណោ មន្តបារគូ.

៩. ‘‘ឧបវិដ្ឋំ មហាវីរំ, ទេវទេវំ នរាសភំ;

អញ្ជលិំ បគ្គហេត្វាន, សន្ថវិំ លោកនាយកំ.

១០. ‘‘‘ឯស ពុទ្ធោ មហាវីរោ, វរធម្មប្បកាសកោ;

ជលតិ អគ្គិខន្ធោវ, ភិក្ខុសង្ឃបុរក្ខតោ.

១១. ‘‘‘មហាសមុទ្ទោវ‘ក្ខុព្ភោ [’ក្ខោភោ (សី. ស្យា.)], អណ្ណវោវ ទុរុត្តរោ;

មិគរាជាវសម្ភីតោ [ឆម្ភិតោ (ក.)], ធម្មំ ទេសេតិ ចក្ខុមា’.

១២. ‘‘មម សង្កប្បមញ្ញាយ, បទុមុត្តរនាយកោ;

ភិក្ខុសង្ឃេ ឋិតោ សត្ថា, ឥមា គាថា អភាសថ.

១៣. ‘‘‘យេនាយំ [យេនាហំ (ក.)] អញ្ជលី ទិន្នោ, ពុទ្ធសេដ្ឋោ ច ថោមិតោ;

តិំសកប្បសហស្សានិ, ទេវរជ្ជំ ករិស្សតិ.

១៤. ‘‘‘កប្បសតសហស្សម្ហិ, អង្គីរសសនាមកោ;

វិវដ្ដច្ឆទោ [វិវត្ថច្ឆទ្ទោ (សី.)] សម្ពុទ្ធោ, ឧប្បជ្ជិស្សតិ តាវទេ.

១៥. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

សតរំសីតិ នាមេន, អរហា សោ ភវិស្សតិ’.

១៦. ‘‘ជាតិយា សត្តវស្សោហំ, បព្ពជិំ អនគារិយំ;

សតរំសិម្ហិ នាមេន, បភា និទ្ធាវតេ មម.

១៧. ‘‘មណ្ឌបេ រុក្ខមូលេ វា, ឈាយី ឈានរតោ អហំ;

ធារេមិ អន្តិមំ ទេហំ, សម្មាសម្ពុទ្ធសាសនេ.

១៨. ‘‘សដ្ឋិកប្បសហស្សម្ហិ, ចតុរោ រាមនាមកា;

សត្តរតនសម្បន្នា, ចក្កវត្តី មហព្ពលា.

១៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សតរំសិ ថេរោ ឥមា គាថាយោ អភាសិត្ថាតិ.

សតរំសិត្ថេរស្សាបទានំ ទុតិយំ.