៦. ពីជនិវគ្គោ

១. វិធូបនទាយកត្ថេរអបទានំ

១. ‘‘បទុមុត្តរពុទ្ធស្ស, លោកជេដ្ឋស្ស តាទិនោ;

ពីជនិកា [វីជនិកា (សី. ស្យា.)] មយា ទិន្នា, ទ្វិបទិន្ទស្ស តាទិនោ.

២. ‘‘សកំ ចិត្តំ បសាទេត្វា, បគ្គហេត្វាន អញ្ជលិំ;

សម្ពុទ្ធមភិវាទេត្វា, បក្កមិំ ឧត្តរាមុខោ.

៣. ‘‘ពីជនិំ បគ្គហេត្វាន, សត្ថា លោកគ្គនាយកោ [លោកេ អនុត្តរោ (សី.)];

ភិក្ខុសង្ឃេ ឋិតោ សន្តោ, ឥមា គាថា អភាសថ.

៤. ‘‘‘ឥមិនា ពីជនិទានេន, ចិត្តស្ស បណិធីហិ [ចេតនាបណិធីហិ (អញ្ញត្ថ)] ច;

កប្បានំ សតសហស្សំ, វិនិបាតំ ន គច្ឆតិ’.

៥. ‘‘អារទ្ធវីរិយោ បហិតត្តោ, ចេតោគុណសមាហិតោ;

ជាតិយា សត្តវស្សោហំ, អរហត្តំ អបាបុណិំ.

៦. ‘‘សដ្ឋិកប្បសហស្សម្ហិ, ពីជមានសនាមកា;

សោឡសាសិំសុ រាជានោ, ចក្កវត្តី មហព្ពលា.

៧. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា វិធូបនទាយកោ ថេរោ ឥមា គាថាយោ អភាសិត្ថាតិ.

វិធូបនទាយកត្ថេរស្សាបទានំ បឋមំ.

២. សតរំសិត្ថេរអបទានំ

៨. ‘‘ឧព្ពិទ្ធំ សេលមារុយ្ហ, និសីទិ បុរិសុត្តមោ;

បព្ពតស្សាវិទូរម្ហិ, ព្រាហ្មណោ មន្តបារគូ.

៩. ‘‘ឧបវិដ្ឋំ មហាវីរំ, ទេវទេវំ នរាសភំ;

អញ្ជលិំ បគ្គហេត្វាន, សន្ថវិំ លោកនាយកំ.

១០. ‘‘‘ឯស ពុទ្ធោ មហាវីរោ, វរធម្មប្បកាសកោ;

ជលតិ អគ្គិខន្ធោវ, ភិក្ខុសង្ឃបុរក្ខតោ.

១១. ‘‘‘មហាសមុទ្ទោវ‘ក្ខុព្ភោ [’ក្ខោភោ (សី. ស្យា.)], អណ្ណវោវ ទុរុត្តរោ;

មិគរាជាវសម្ភីតោ [ឆម្ភិតោ (ក.)], ធម្មំ ទេសេតិ ចក្ខុមា’.

១២. ‘‘មម សង្កប្បមញ្ញាយ, បទុមុត្តរនាយកោ;

ភិក្ខុសង្ឃេ ឋិតោ សត្ថា, ឥមា គាថា អភាសថ.

១៣. ‘‘‘យេនាយំ [យេនាហំ (ក.)] អញ្ជលី ទិន្នោ, ពុទ្ធសេដ្ឋោ ច ថោមិតោ;

តិំសកប្បសហស្សានិ, ទេវរជ្ជំ ករិស្សតិ.

១៤. ‘‘‘កប្បសតសហស្សម្ហិ, អង្គីរសសនាមកោ;

វិវដ្ដច្ឆទោ [វិវត្ថច្ឆទ្ទោ (សី.)] សម្ពុទ្ធោ, ឧប្បជ្ជិស្សតិ តាវទេ.

១៥. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

សតរំសីតិ នាមេន, អរហា សោ ភវិស្សតិ’.

១៦. ‘‘ជាតិយា សត្តវស្សោហំ, បព្ពជិំ អនគារិយំ;

សតរំសិម្ហិ នាមេន, បភា និទ្ធាវតេ មម.

១៧. ‘‘មណ្ឌបេ រុក្ខមូលេ វា, ឈាយី ឈានរតោ អហំ;

ធារេមិ អន្តិមំ ទេហំ, សម្មាសម្ពុទ្ធសាសនេ.

១៨. ‘‘សដ្ឋិកប្បសហស្សម្ហិ, ចតុរោ រាមនាមកា;

សត្តរតនសម្បន្នា, ចក្កវត្តី មហព្ពលា.

១៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សតរំសិ ថេរោ ឥមា គាថាយោ អភាសិត្ថាតិ.

សតរំសិត្ថេរស្សាបទានំ ទុតិយំ.

៣. សយនទាយកត្ថេរអបទានំ

២០. ‘‘បទុមុត្តរពុទ្ធស្ស, សព្ពលោកានុកម្បិនោ;

សយនំ តស្ស បាទាសិំ, វិប្បសន្នេន ចេតសា.

២១. ‘‘តេន សយនទានេន, សុខេត្តេ ពីជសម្បទា;

ភោគា និព្ពត្តរេ តស្ស, សយនស្ស ឥទំ ផលំ.

២២. ‘‘អាកាសេ សេយ្យំ កប្បេមិ, ធារេមិ បថវិំ ឥមំ;

បាណេសុ មេ ឥស្សរិយំ, សយនស្ស ឥទំ ផលំ.

២៣. ‘‘បញ្ចកប្បសហស្សម្ហិ, អដ្ឋ អាសុំ មហាតេជា [មហាវរា (សី.), មហាវីរា (ស្យា.)];

ចតុត្តិំសេ កប្បសតេ, ចតុរោ ច មហព្ពលា.

២៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សយនទាយកោ ថេរោ ឥមា គាថាយោ អភាសិត្ថាតិ.

សយនទាយកត្ថេរស្សាបទានំ តតិយំ.

៤. គន្ធោទកិយត្ថេរអបទានំ

២៥. ‘‘បទុមុត្តរពុទ្ធស្ស, មហាពោធិមហោ អហុ;

វិចិត្តំ ឃដមាទាយ, គន្ធោទកមទាសហំ.

២៦. ‘‘ន្ហានកាលេ ច ពោធិយា, មហាមេឃោ បវស្សថ;

និន្នាទោ ច មហា អាសិ, អសនិយា ផលន្តិយា.

២៧. ‘‘តេនេវាសនិវេគេន, តត្ថ កាលង្កតោ [កាលកតោ (សី. ស្យា.)] អហំ [អហុំ (សី.)];

ទេវលោកេ ឋិតោ សន្តោ, ឥមា គាថា អភាសហំ.

២៨. ‘‘‘អហោ ពុទ្ធោ អហោ ធម្មោ, អហោ នោ សត្ថុសម្បទា;

កឡេវរំ [កលេពរំ (សី.)] មេ បតិតំ, ទេវលោកេ រមាមហំ.

២៩. ‘‘‘ឧព្ពិទ្ធំ ភវនំ មយ្ហំ, សតភូមំ សមុគ្គតំ;

កញ្ញាសតសហស្សានិ, បរិវារេន្តិ មំ សទា.

៣០. ‘‘‘អាពាធា មេ ន វិជ្ជន្តិ, សោកោ មយ្ហំ ន វិជ្ជតិ;

បរិឡាហំ ន បស្សាមិ, បុញ្ញកម្មស្សិទំ ផលំ.

៣១. ‘‘‘អដ្ឋវីសេ កប្បសតេ, រាជា សំវសិតោ អហុំ;

សត្តរតនសម្បន្នោ, ចក្កវត្តី មហព្ពលោ’.

៣២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា គន្ធោទកិយោ ថេរោ ឥមា គាថាយោ អភាសិត្ថាតិ.

គន្ធោទកិយត្ថេរស្សាបទានំ ចតុត្ថំ.

៥. ឱបវយ្ហត្ថេរអបទានំ

៣៣. ‘‘បទុមុត្តរពុទ្ធស្ស, អាជានីយមទាសហំ;

និយ្យាទេត្វាន សម្ពុទ្ធេ [សម្ពុទ្ធំ (សី. ក.)], អគមាសិំ សកំ ឃរំ.

៣៤. ‘‘ទេវលោ នាម នាមេន, សត្ថុនោ អគ្គសាវកោ;

វរធម្មស្ស ទាយាទោ, អាគច្ឆិ មម សន្តិកំ.

៣៥. ‘‘សបត្តភារោ ភគវា, អាជានេយ្យោ ន កប្បតិ;

តវ សង្កប្បមញ្ញាយ, អធិវាសេសិ ចក្ខុមា.

៣៦. ‘‘អគ្ឃាបេត្វា វាតជវំ, សិន្ធវំ សីឃវាហនំ;

បទុមុត្តរពុទ្ធស្ស, ខមនីយមទាសហំ.

៣៧. ‘‘យំ យំ យោនុបបជ្ជាមិ, ទេវត្តំ អថ មានុសំ [ទេវេ ច មានុសេ ភវេ (សី. ក.)];

ខមនីយំ វាតជវំ, ចិត្តំ និព្ពត្តតេ [អាជានីយា វាតជវា, វិត្តិ និព្ពត្តរេ (ស្យា.), ខមនីយា វាតជវា, ចិត្តា និព្ពត្តរេ (សី.)] មម.

៣៨. ‘‘លាភំ តេសំ សុលទ្ធំវ, យេ លភន្តុបសម្បទំ;

បុនបិ បយិរុបាសេយ្យំ, ពុទ្ធោ លោកេ សចេ ភវេ.

៣៩. ‘‘អដ្ឋវីសតិក្ខត្តុំហំ, រាជា អាសិំ មហព្ពលោ;

ចាតុរន្តោ វិជិតាវី, ជម្ពុសណ្ឌស្ស [ជម្ពុទីបស្ស (ស្យា.), ជម្ពុមណ្ឌស្ស (ក.)] ជម្ពុឥស្សរោ.

៤០. ‘‘ឥទំ បច្ឆិមកំ មយ្ហំ, ចរិមោ វត្តតេ ភវោ;

បត្តោស្មិ អចលំ ឋានំ, ហិត្វា ជយបរាជយំ.

៤១. ‘‘ចតុតិំសសហស្សម្ហិ, មហាតេជោសិ ខត្តិយោ;

សតរតនសម្បន្នោ, ចក្កវត្តី មហព្ពលោ.

៤២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឱបវយ្ហោ ថេរោ ឥមា គាថាយោ អភាសិត្ថាតិ.

ឱបវយ្ហត្ថេរស្សាបទានំ បញ្ចមំ.

៦. សបរិវារាសនត្ថេរអបទានំ

៤៣. ‘‘បទុមុត្តរពុទ្ធស្ស, បិណ្ឌបាតំ អទាសហំ;

គន្ត្វា កិលិដ្ឋកំ ឋានំ [តំ ភោជនដ្ឋានំ (សី.)], មល្លិកាហិ បរិក្ខិតំ [បរិក្ខិបិំ (សី.)].

៤៤. ‘‘តម្ហាសនម្ហិ អាសីនោ, ពុទ្ធោ លោកគ្គនាយកោ;

អកិត្តយិ បិណ្ឌបាតំ, ឧជុភូតោ សមាហិតោ.

៤៥. ‘‘យថាបិ ភទ្ទកេ ខេត្តេ, ពីជំ អប្បម្បិ រោបិតំ;

សម្មា ធារំ បវេច្ឆន្តេ, ផលំ តោសេតិ កស្សកំ.

៤៦. ‘‘តថេវាយំ បិណ្ឌបាតោ, សុខេត្តេ រោបិតោ តយា;

ភវេ និព្ពត្តមានម្ហិ, ផលំ តេ [និព្ពត្តមានំ ហិ, ផលតោ (សី.)] តោសយិស្សតិ [តប្បយិស្សតិ (ក.)].

៤៧. ‘‘ឥទំ វត្វាន សម្ពុទ្ធោ, ជលជុត្តមនាមកោ;

បិណ្ឌបាតំ គហេត្វាន, បក្កាមិ ឧត្តរាមុខោ.

៤៨. ‘‘សំវុតោ បាតិមោក្ខស្មិំ, ឥន្ទ្រិយេសុ ច បញ្ចសុ;

បវិវេកមនុយុត្តោ, វិហរាមិ អនាសវោ.

៤៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សបរិវារាសនោ ថេរោ ឥមា គាថាយោ អភាសិត្ថាតិ.

សបរិវារាសនត្ថេរស្សាបទានំ ឆដ្ឋំ.

៧. បញ្ចទីបកត្ថេរអបទានំ

៥០. ‘‘បទុមុត្តរពុទ្ធស្ស, សព្ពភូតានុកម្បិនោ;

សទ្ទហិត្វាន [សុសណ្ឋហិត្វា (សី.)] សទ្ធម្មេ, ឧជុទិដ្ឋិ អហោសហំ.

៥១. ‘‘បទីបទានំ បាទាសិំ, បរិវារេត្វាន ពោធិយំ;

សទ្ទហន្តោ បទីបានិ, អករិំ តាវទេ អហំ.

៥២. ‘‘យំ យំ យោនុបបជ្ជាមិ, ទេវត្តំ អថ មានុសំ;

អាកាសេ ឧក្កំ ធារេន្តិ, ទីបទានស្សិទំ ផលំ.

៥៣. ‘‘តិរោកុដ្ដំ តិរោសេលំ, សមតិគ្គយ្ហ បព្ពតំ;

សមន្តា យោជនសតំ, ទស្សនំ អនុភោមហំ.

៥៤. ‘‘តេន កម្មាវសេសេន, បត្តោម្ហិ អាសវក្ខយំ;

ធារេមិ អន្តិមំ ទេហំ, ទ្វិបទិន្ទស្ស សាសនេ.

៥៥. ‘‘ចតុត្តិំសេ កប្បសតេ, សតចក្ខុសនាមកា;

រាជាហេសុំ មហាតេជា, ចក្កវត្តី មហព្ពលា.

៥៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បញ្ចទីបកោ ថេរោ ឥមា គាថាយោ អភាសិត្ថាតិ.

បញ្ចទីបកត្ថេរស្សាបទានំ សត្តមំ.

៨. ធជទាយកត្ថេរអបទានំ

៥៧. ‘‘បទុមុត្តរពុទ្ធស្ស, ពោធិយា បាទបុត្តមេ;

ហដ្ឋោ ហដ្ឋេន ចិត្តេន, ធជមារោបយិំ អហំ.

៥៨. ‘‘បតិតបត្តានិ គណ្ហិត្វា, ពហិទ្ធា ឆឌ្ឌយិំ អហំ;

អន្តោសុទ្ធំ ពហិសុទ្ធំ, អធិមុត្តមនាសវំ.

៥៩. ‘‘សម្មុខា វិយ សម្ពុទ្ធំ, អវន្ទិំ ពោធិមុត្តមំ;

បទុមុត្តរោ លោកវិទូ, អាហុតីនំ បដិគ្គហោ.

៦០. ‘‘ភិក្ខុសង្ឃេ ឋិតោ សត្ថា, ឥមា គាថា អភាសថ;

‘‘‘ឥមិនា ធជទានេន, ឧបដ្ឋានេន ចូភយំ.

៦១. ‘‘‘កប្បានំ សតសហស្សំ, ទុគ្គតិំ សោ ន គច្ឆតិ;

ទេវេសុ ទេវសោភគ្យំ, អនុភោស្សតិនប្បកំ.

៦២. ‘‘‘អនេកសតក្ខត្តុញ្ច, រាជា រដ្ឋេ ភវិស្សតិ;

ឧគ្គតោ នាម នាមេន, ចក្កវត្តី ភវិស្សតិ.

៦៣. ‘‘‘សម្បត្តិំ អនុភោត្វាន, សុក្កមូលេន ចោទិតោ;

គោតមស្ស ភគវតោ, សាសនេភិរមិស្សតិ’.

៦៤. ‘‘បធានបហិតត្តោម្ហិ, ឧបសន្តោ និរូបធិ;

ធារេមិ អន្តិមំ ទេហំ, សម្មាសម្ពុទ្ធសាសនេ.

៦៥. ‘‘ឯកបញ្ញាសសហស្សេ, កប្បេ ឧគ្គតសវ្ហយោ [សវ្ហយា (ស្យា.)];

បញ្ញាសសតសហស្សេ, ខត្តិយោ មេឃសវ្ហយោ [ខត្តិយា ខេមសវ្ហយា (ស្យា.)].

៦៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ធជទាយកោ ថេរោ ឥមា គាថាយោ អភាសិត្ថាតិ.

ធជទាយកត្ថេរស្សាបទានំ អដ្ឋមំ.