៣. សយនទាយកត្ថេរអបទានំ

២០. ‘‘បទុមុត្តរពុទ្ធស្ស, សព្ពលោកានុកម្បិនោ;

សយនំ តស្ស បាទាសិំ, វិប្បសន្នេន ចេតសា.

២១. ‘‘តេន សយនទានេន, សុខេត្តេ ពីជសម្បទា;

ភោគា និព្ពត្តរេ តស្ស, សយនស្ស ឥទំ ផលំ.

២២. ‘‘អាកាសេ សេយ្យំ កប្បេមិ, ធារេមិ បថវិំ ឥមំ;

បាណេសុ មេ ឥស្សរិយំ, សយនស្ស ឥទំ ផលំ.

២៣. ‘‘បញ្ចកប្បសហស្សម្ហិ, អដ្ឋ អាសុំ មហាតេជា [មហាវរា (សី.), មហាវីរា (ស្យា.)];

ចតុត្តិំសេ កប្បសតេ, ចតុរោ ច មហព្ពលា.

២៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សយនទាយកោ ថេរោ ឥមា គាថាយោ អភាសិត្ថាតិ.

សយនទាយកត្ថេរស្សាបទានំ តតិយំ.