១០. អសនពោធិយត្ថេរអបទានំ

៧៨. ‘‘ជាតិយា សត្តវស្សោហំ, អទ្ទសំ លោកនាយកំ;

បសន្នចិត្តោ សុមនោ, ឧបគច្ឆិំ នរុត្តមំ.

៧៩. ‘‘តិស្សស្សាហំ ភគវតោ, លោកជេដ្ឋស្ស តាទិនោ;

ហដ្ឋោ ហដ្ឋេន ចិត្តេន, រោបយិំ ពោធិមុត្តមំ.

៨០. ‘‘អសនោ នាមធេយ្យេន, ធរណីរុហបាទបោ;

បញ្ចវស្សេ បរិចរិំ, អសនំ ពោធិមុត្តមំ.

៨១. ‘‘បុប្ផិតំ បាទបំ ទិស្វា, អព្ភុតំ លោមហំសនំ;

សកំ កម្មំ បកិត្តេន្តោ, ពុទ្ធសេដ្ឋំ ឧបាគមិំ.

៨២. ‘‘តិស្សោ តទា សោ សម្ពុទ្ធោ, សយម្ភូ អគ្គបុគ្គលោ;

ភិក្ខុសង្ឃេ និសីទិត្វា, ឥមា គាថា អភាសថ.

៨៣. ‘‘‘យេនាយំ រោបិតា ពោធិ, ពុទ្ធបូជា ច សក្កតា;

តមហំ កិត្តយិស្សាមិ, សុណាថ មម ភាសតោ.

៨៤. ‘‘‘តិំសកប្បានិ ទេវេសុ, ទេវរជ្ជំ ករិស្សតិ;

ចតុសដ្ឋិ ចក្ខត្តុំ សោ, ចក្កវត្តី ភវិស្សតិ.

៨៥. ‘‘‘តុសិតា ហិ ចវិត្វាន, សុក្កមូលេន ចោទិតោ;

ទ្វេ សម្បត្តី អនុភោត្វា, មនុស្សត្តេ រមិស្សតិ.

៨៦. ‘‘‘បធានបហិតត្តោ សោ, ឧបសន្តោ និរូបធិ;

សព្ពាសវេ បរិញ្ញាយ, និព្ពាយិស្សតិនាសវោ’.

៨៧. ‘‘វិវេកមនុយុត្តោហំ, ឧបសន្តោ និរូបធិ;

នាគោវ ពន្ធនំ ឆេត្វា, វិហរាមិ អនាសវោ.

៨៨. ‘‘ទ្វេនវុតេ ឥតោ កប្បេ, ពោធិំ រោបេសហំ តទា;

ទុគ្គតិំ នាភិជានាមិ, ពោធិរោបស្សិទំ ផលំ.

៨៩. ‘‘ចតុសត្តតិតោ កប្បេ, ទណ្ឌសេនោតិ វិស្សុតោ;

សត្តរតនសម្បន្នោ, ចក្កវត្តី តទា អហុំ.

៩០. ‘‘តេសត្តតិម្ហិតោ កប្បេ, សត្តាហេសុំ មហីបតី;

សមន្តនេមិនាមេន, រាជានោ ចក្កវត្តិនោ.

៩១. ‘‘បណ្ណវីសតិតោ កប្បេ, បុណ្ណកោ នាម ខត្តិយោ;

សត្តរតនសម្បន្នោ, ចក្កវត្តី មហព្ពលោ.

៩២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អសនពោធិយោ ថេរោ ឥមា គាថាយោ អភាសិត្ថាតិ.

អសនពោធិយត្ថេរស្សាបទានំ ទសមំ.

ពីជនិវគ្គោ ឆដ្ឋោ.