៩. វនវច្ឆត្ថេរអបទានំ

២៥១. ‘‘ឥមម្ហិ ភទ្ទកេ កប្បេ, ព្រហ្មពន្ធុ មហាយសោ;

កស្សបោ នាម គោត្តេន, ឧប្បជ្ជិ វទតំ វរោ.

២៥២. ‘‘តទាហំ បព្ពជិត្វាន, តស្ស ពុទ្ធស្ស សាសនេ;

យាវជីវំ ចរិត្វាន, ព្រហ្មចារំ តតោ ចុតោ.

២៥៣. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

២៥៤. ‘‘តតោ ចុតោ អរញ្ញម្ហិ, កបោតោ អាសហំ តហិំ;

វសតេ គុណសម្បន្នោ, ភិក្ខុ ឈានរតោ សទា.

២៥៥. ‘‘មេត្តចិត្តោ ការុណិកោ, សទា បមុទិតាននោ;

ឧបេក្ខកោ មហាវីរោ, អប្បមញ្ញាសុ កោវិទោ.

២៥៦. ‘‘វិនីវរណសង្កប្បេ, សព្ពសត្តហិតាសយេ;

វិសដ្ឋោ នចិរេនាសិំ, តស្មិំ សុគតសាវកេ.

២៥៧. ‘‘ឧបេច្ច បាទមូលម្ហិ, និសិន្នស្ស តទាស្សមេ;

កទាចិ សាមិសំ ទេតិ, ធម្មំ ទេសេសិ ចេកទា.

២៥៨. ‘‘តទា វិបុលបេមេន, ឧបាសិត្វា ជិនត្រជំ;

តតោ ចុតោ គតោ សគ្គំ, បវាសោ សឃរំ យថា.

២៥៩. ‘‘សគ្គា ចុតោ មនុស្សេសុ, និព្ពត្តោ បុញ្ញកម្មុនា;

អគារំ ឆឌ្ឌយិត្វាន, បព្ពជិំ ពហុសោ អហំ.

២៦០. ‘‘សមណោ តាបសោ វិប្បោ, បរិព្ពជោ តថេវហំ;

ហុត្វា វសិំ អរញ្ញម្ហិ, អនេកសតសោ អហំ.

២៦១. ‘‘បច្ឆិមេ ច ភវេ ទានិ, រម្មេ កបិលវត្ថវេ;

វច្ឆគោត្តោ ទិជោ តស្ស, ជាយាយ អហមោក្កមិំ.

២៦២. ‘‘មាតុ មេ ទោហឡោ អាសិ, តិរោកុច្ឆិគតស្ស មេ;

ជាយមានសមីបម្ហិ, វនវាសាយ និច្ឆយោ.

២៦៣. ‘‘តតោ មេ អជនី មាតា, រមណីយេ វនន្តរេ;

គព្ភតោ និក្ខមន្តំ មំ, កាសាយេន បដិគ្គហុំ.

២៦៤. ‘‘តតោ កុមារោ សិទ្ធត្ថោ, ជាតោ សក្យកុលទ្ធជោ;

តស្ស មិត្តោ បិយោ អាសិំ, សំវិសដ្ឋោ សុមានិយោ.

២៦៥. ‘‘សត្តសារេភិនិក្ខន្តេ, ឱហាយ វិបុលំ យសំ;

អហម្បិ បព្ពជិត្វាន, ហិមវន្តមុបាគមិំ.

២៦៦. ‘‘វនាលយំ ភាវនីយំ, កស្សបំ ធុតវាទិកំ;

ទិស្វា សុត្វា ជិនុប្បាទំ, ឧបេសិំ នរសារថិំ.

២៦៧. ‘‘សោ មេ ធម្មមទេសេសិ, សព្ពត្ថំ សម្បកាសយំ;

តតោហំ បព្ពជិត្វាន, វនមេវ បុនាគមំ [បុនាគមិំ (សី. បី.), បុនោក្កមំ (ស្យា.)].

២៦៨. ‘‘តត្ថាប្បមត្តោ វិហរំ, ឆឡភិញ្ញា អផស្សយិំ [អបស្សយិំ (ស្យា. ក.)];

អហោ សុលទ្ធលាភោម្ហិ, សុមិត្តេនានុកម្បិតោ.

២៦៩. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

២៧០. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២៧១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា វនវច្ឆោ ថេរោ ឥមា គាថាយោ

អភាសិត្ថាតិ.

វនវច្ឆត្ថេរស្សាបទានំ នវមំ.