១០. ចូឡសុគន្ធត្ថេរអបទានំ

២៧២. ‘‘ឥមម្ហិ ភទ្ទកេ កប្បេ, ព្រហ្មពន្ធុ មហាយសោ;

កស្សបោ នាម គោត្តេន, ឧប្បជ្ជិ វទតំ វរោ.

២៧៣. ‘‘អនុព្យញ្ជនសម្បន្នោ, ពាត្តិំសវរលក្ខណោ;

ព្យាមប្បភាបរិវុតោ, រំសិជាលសមោត្ថដោ.

២៧៤. ‘‘អស្សាសេតា យថា ចន្ទោ, សូរិយោវ បភង្ករោ;

និព្ពាបេតា យថា មេឃោ, សាគរោវ គុណាករោ.

២៧៥. ‘‘ធរណីរិវ សីលេន, ហិមវាវ សមាធិនា;

អាកាសោ វិយ បញ្ញាយ, អសង្គោ អនិលោ យថា.

២៧៦. ‘‘តទាហំ ពារាណសិយំ, ឧបបន្នោ មហាកុលេ;

បហូតធនធញ្ញស្មិំ, នានារតនសញ្ចយេ.

២៧៧. ‘‘មហតា បរិវារេន, និសិន្នំ លោកនាយកំ;

ឧបេច្ច ធម្មមស្សោសិំ, អមតំវ មនោហរំ.

២៧៨. ‘‘ទ្វត្តិំសលក្ខណធរោ, សនក្ខត្តោវ ចន្ទិមា;

អនុព្យញ្ជនសម្បន្នោ, សាលរាជាវ ផុល្លិតោ.

២៧៩. ‘‘រំសិជាលបរិក្ខិត្តោ, ទិត្តោវ កនកាចលោ;

ព្យាមប្បភាបរិវុតោ, សតរំសី ទិវាករោ.

២៨០. ‘‘សោណ្ណាននោ ជិនវរោ, សមណីវ [រម្មណីវ (ស្យា.)] សិលុច្ចយោ;

ករុណាបុណ្ណហទយោ, គុណេន វិយ សាគរោ.

២៨១. ‘‘លោកវិស្សុតកិត្តិ ច, សិនេរូវ នគុត្តមោ;

យសសា វិត្ថតោ វីរោ, អាកាសសទិសោ មុនិ.

២៨២. ‘‘អសង្គចិត្តោ សព្ពត្ថ, អនិលោ វិយ នាយកោ;

បតិដ្ឋា សព្ពភូតានំ, មហីវ មុនិសត្តមោ.

២៨៣. ‘‘អនុបលិត្តោ លោកេន, តោយេន បទុមំ យថា;

កុវាទគច្ឆទហនោ, អគ្គិខន្ធោវ សោភសិ [សោភតិ (សី.), សោ វសិ (ស្យា. ក.)].

២៨៤. ‘‘អគធោ វិយ សព្ពត្ថ, កិលេសវិសនាសកោ;

គន្ធមាទនសេលោវ, គុណគន្ធវិភូសិតោ.

២៨៥. ‘‘គុណានំ អាករោ វីរោ, រតនានំវ សាគរោ;

សិន្ធូវ វនរាជីនំ, កិលេសមលហារកោ.

២៨៦. ‘‘វិជយីវ មហាយោធោ, មារសេនាវមទ្ទនោ;

ចក្កវត្តីវ សោ រាជា, ពោជ្ឈង្គរតនិស្សរោ.

២៨៧. ‘‘មហាភិសក្កសង្កាសោ, ទោសព្យាធិតិកិច្ឆកោ;

សល្លកត្តោ យថា វេជ្ជោ, ទិដ្ឋិគណ្ឌវិផាលកោ.

២៨៨. ‘‘សោ តទា លោកបជ្ជោតោ, សនរាមរសក្កតោ;

បរិសាសុ នរាទិច្ចោ, ធម្មំ ទេសយតេ ជិនោ.

២៨៩. ‘‘ទានំ ទត្វា មហាភោគោ, សីលេន សុគតូបគោ;

ភាវនាយ ច និព្ពាតិ, ឥច្ចេវមនុសាសថ.

២៩០. ‘‘ទេសនំ តំ មហស្សាទំ, អាទិមជ្ឈន្តសោភណំ;

សុណន្តិ បរិសា សព្ពា, អមតំវ មហារសំ.

២៩១. ‘‘សុត្វា សុមធុរំ ធម្មំ, បសន្នោ ជិនសាសនេ;

សុគតំ សរណំ គន្ត្វា, យាវជីវំ នមស្សហំ.

២៩២. ‘‘មុនិនោ គន្ធកុដិយា, ឱបុញ្ជេសិំ [ឧព្ពដ្ដេសិំ (ស្យា.)] តទា មហិំ;

ចតុជ្ជាតេន គន្ធេន, មាសេ អដ្ឋ ទិនេស្វហំ.

២៩៣. ‘‘បណិធាយ សុគន្ធត្តំ, សរីរវិស្សគន្ធិនោ [សរីរស្ស វិគន្ធិនោ (សី. ស្យា. បី.)];

តទា ជិនោ វិយាកាសិ, សុគន្ធតនុលាភិតំ.

២៩៤. ‘‘‘យោ យំ គន្ធកុដិភូមិំ, គន្ធេនោបុញ្ជតេ សកិំ;

តេន កម្មវិបាកេន, ឧបបន្នោ តហិំ តហិំ.

២៩៥. ‘‘‘សុគន្ធទេហោ សព្ពត្ថ, ភវិស្សតិ អយំ នរោ;

គុណគន្ធយុត្តោ ហុត្វា, និព្ពាយិស្សតិនាសវោ’.

២៩៦. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

២៩៧. ‘‘បច្ឆិមេ ច ភវេ ទានិ, ជាតោ វិប្បកុលេ អហំ;

គព្ភំ មេ វសតោ មាតា, ទេហេនាសិ សុគន្ធិតា.

២៩៨. ‘‘យទា ច មាតុកុច្ឆិម្ហា, និក្ខមាមិ តទា បុរី [បុរំ (ស្យា. ក.)];

សាវត្ថិសព្ពគន្ធេហិ, វាសិតា វិយ វាយថ.

២៩៩. ‘‘បុប្ផវស្សញ្ច សុរភិ, ទិព្ពគន្ធំ មនោរមំ;

ធូបានិ ច មហគ្ឃានិ, ឧបវាយិំសុ តាវទេ.

៣០០. ‘‘ទេវា ច សព្ពគន្ធេហិ, ធូបបុប្ផេហិ តំ ឃរំ;

វាសយិំសុ សុគន្ធេន, យស្មិំ ជាតោ អហំ ឃរេ.

៣០១. ‘‘យទា ច តរុណោ ភទ្ទោ, បឋមេ យោព្ពនេ ឋិតោ;

តទា សេលំ [សេសំ (ស្យា.)] សបរិសំ, វិនេត្វា នរសារថិ.

៣០២. ‘‘តេហិ សព្ពេហិ បរិវុតោ [សហិតោ (សី. ស្យា. បី.)], សាវត្ថិបុរមាគតោ;

តទា ពុទ្ធានុភាវំ តំ, ទិស្វា បព្ពជិតោ អហំ.

៣០៣. ‘‘សីលំ សមាធិបញ្ញញ្ច, វិមុត្តិញ្ច អនុត្តរំ;

ភាវេត្វា ចតុរោ ធម្មេ, បាបុណិំ អាសវក្ខយំ.

៣០៤. ‘‘យទា បព្ពជិតោ ចាហំ, យទា ច អរហា អហុំ;

និព្ពាយិស្សំ យទា ចាហំ, គន្ធវស្សោ តទា អហុ.

៣០៥. ‘‘សរីរគន្ធោ ច សទាតិសេតិ [សទា វាសេតិ (ក.)] មេ, មហារហំ ចន្ទនចម្បកុប្បលំ;

តថេវ គន្ធេ ឥតរេ ច សព្ពសោ, បសយ្ហ វាយាមិ តតោ តហិំ [យហិំ (ស្យា.)] តហិំ.

៣០៦. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៣០៧. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៣០៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ចូឡសុគន្ធោ ថេរោ ឥមា គាថាយោ អភាសិត្ថាតិ;

ចូឡសុគន្ធត្ថេរស្សាបទានំ ទសមំ.

ភទ្ទិយវគ្គោ បញ្ចបញ្ញាសមោ.