៨. លោមសកង្គិយត្ថេរអបទានំ

២២៥. ‘‘ឥមម្ហិ ភទ្ទកេ កប្បេ, ព្រហ្មពន្ធុ មហាយសោ;

កស្សបោ នាម គោត្តេន, ឧប្បជ្ជិ វទតំ វរោ.

២២៦. ‘‘តទាហំ ចន្ទនោ ចេវ, បព្ពជិត្វាន សាសនេ;

អាបាណកោដិកំ ធម្មំ, បូរយិត្វាន សាសនេ.

២២៧. ‘‘តតោ ចុតា សន្តុសិតំ, ឧបបន្នា ឧភោ មយំ;

តត្ថ ទិព្ពេហិ នច្ចេហិ, គីតេហិ វាទិតេហិ ច.

២២៨. ‘‘រូបាទិទសហង្គេហិ, អភិភោត្វាន សេសកេ;

យាវតាយុំ វសិត្វាន, អនុភោត្វា មហាសុខំ.

២២៩. ‘‘តតោ ចវិត្វា តិទសំ, ចន្ទនោ ឧបបជ្ជថ;

អហំ កបិលវត្ថុស្មិំ, អជាយិំ សាកិយត្រជោ.

២៣០. ‘‘យទា ឧទាយិត្ថេរេន, អជ្ឈិដ្ឋោ លោកនាយកោ;

អនុកម្បិយ សក្យានំ, ឧបេសិ កបិលវ្ហយំ.

២៣១. ‘‘តទាតិមានិនោ សក្យា, ន ពុទ្ធស្ស គុណញ្ញុនោ;

បណមន្តិ ន សម្ពុទ្ធំ, ជាតិថទ្ធា អនាទរា.

២៣២. ‘‘តេសំ សង្កប្បមញ្ញាយ, អាកាសេ ចង្កមី ជិនោ;

បជ្ជុន្នោ វិយ វស្សិត្ថ, បជ្ជលិត្ថ យថា សិខី.

២៣៣. ‘‘ទស្សេត្វា រូបមតុលំ, បុន អន្តរធាយថ;

ឯកោបិ ហុត្វា ពហុធា, អហោសិ បុនរេកកោ.

២៣៤. ‘‘អន្ធការំ បកាសញ្ច, ទស្សយិត្វា អនេកធា;

បាដិហេរំ ករិត្វាន, វិនយី ញាតកេ មុនិ.

២៣៥. ‘‘ចាតុទ្ទីបោ មហាមេឃោ, តាវទេវ បវស្សថ;

តទា ហិ ជាតកំ ពុទ្ធោ, វេស្សន្តរមទេសយិ.

២៣៦. ‘‘តទា តេ ខត្តិយា សព្ពេ, និហន្ត្វា ជាតិជំ មទំ;

ឧបេសុំ សរណំ ពុទ្ធំ, អាហ សុទ្ធោទនោ តទា.

២៣៧. ‘‘‘ឥទំ តតិយំ តវ ភូរិបញ្ញ, បាទានិ វន្ទាមិ សមន្តចក្ខុ;

យទាភិជាតោ បថវី បកម្បយី, យទា ច តំ នជ្ជហិ ជម្ពុឆាយា’.

២៣៨. ‘‘តទា ពុទ្ធានុភាវំ តំ, ទិស្វា វិម្ហិតមានសោ;

បព្ពជិត្វាន តត្ថេវ, និវសិំ មាតុបូជកោ.

២៣៩. ‘‘ចន្ទនោ ទេវបុត្តោ មំ, ឧបគន្ត្វានុបុច្ឆថ;

ភទ្ទេករត្តស្ស តទា, សង្ខេបវិត្ថារំ នយំ.

២៤០. ‘‘ចោទិតោហំ តទា តេន, ឧបេច្ច នរនាយកំ;

ភទ្ទេករត្តំ សុត្វាន, សំវិគ្គោ វនមាមកោ.

២៤១. ‘‘តទា មាតរមបុច្ឆិំ, វនេ វច្ឆាមិ ឯកកោ;

សុខុមាលោតិ មេ មាតា, វារយី តំ [តេ (ស្យា. បី. ក.)] តទា វចំ.

២៤២. ‘‘កាសំ [ទព្ពំ (សី. ស្យា. បី.)] កុសំ បោដកិលំ, ឧសីរំ មុញ្ជបព្ពជំ [មុញ្ជពព្ពជំ (សី. បី.)];

ឧរសា បនុទិស្សាមិ, វិវេកមនុព្រូហយំ.

២៤៣. ‘‘តទា វនំ បវិដ្ឋោហំ, សរិត្វា ជិនសាសនំ;

ភទ្ទេករត្តឱវាទំ, អរហត្តមបាបុណិំ.

២៤៤. ‘‘‘អតីតំ នាន្វាគមេយ្យ, នប្បដិកង្ខេ អនាគតំ;

យទតីតំ បហីនំ តំ, អប្បត្តញ្ច អនាគតំ.

២៤៥. ‘‘‘បច្ចុប្បន្នញ្ច យោ ធម្មំ, តត្ថ តត្ថ វិបស្សតិ;

អសំហីរំ អសំកុប្បំ, តំ វិទ្វា មនុព្រូហយេ.

២៤៦. ‘‘‘អជ្ជេវ កិច្ចមាតប្បំ, កោ ជញ្ញា មរណំ សុវេ;

ន ហិ នោ សង្គរំ [សង្ករំ (ក.)] តេន, មហាសេនេន មច្ចុនា.

២៤៧. ‘‘‘ឯវំវិហារិំ អាតាបិំ, អហោរត្តមតន្ទិតំ;

តំ វេ ភទ្ទេករត្តោតិ, សន្តោ អាចិក្ខតេ មុនិ’.

២៤៨. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

២៤៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២៥០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា លោមសកង្គិយោ [លោមសង្ខិយោ (ស្យា. ក.)] ថេរោ ឥមា គាថាយោ

អភាសិត្ថាតិ.

លោមសកង្គិយត្ថេរស្សាបទានំ អដ្ឋមំ.