៧. អភយត្ថេរអបទានំ

១៩៥. ‘‘បទុមុត្តរោ នាម ជិនោ, សព្ពធម្មេសុ ចក្ខុមា;

ឥតោ សតសហស្សម្ហិ, កប្បេ ឧប្បជ្ជិ នាយកោ.

១៩៦. ‘‘សរណគមនេ កិញ្ចិ, និវេសេសិ តថាគតោ;

កិញ្ចិ សីលេ និវេសេសិ, ទសកម្មបថុត្តមេ.

១៩៧. ‘‘ទេតិ កស្សចិ សោ វីរោ, សាមញ្ញផលមុត្តមំ;

សមាបត្តី តថា អដ្ឋ, តិស្សោ វិជ្ជា បវច្ឆតិ.

១៩៨. ‘‘ឆឡភិញ្ញាសុ យោជេសិ, កិញ្ចិ សត្តំ នរុត្តមោ;

ទេតិ កស្សចិ នាថោ សោ, ចតស្សោ បដិសម្ភិទា.

១៩៩. ‘‘ពោធនេយ្យំ បជំ ទិស្វា, អសង្ខេយ្យម្បិ យោជនំ [អសង្ខេយ្យេបិ យោជនេ សី. ស្យា. បី.)];

ខណេន ឧបគន្ត្វាន, វិនេតិ នរសារថិ.

២០០. ‘‘តទាហំ ហំសវតិយំ, អហោសិំ ព្រាហ្មណត្រជោ;

បារគូ សព្ពវេទានំ, វេយ្យាករណសម្មតោ.

២០១. ‘‘និរុត្តិយា ច កុសលោ, និឃណ្ឌុម្ហិ វិសារទោ;

បទកោ កេដុភវិទូ, ឆន្ទោវិចិតិកោវិទោ.

២០២. ‘‘ជង្ឃាវិហារំ វិចរំ, ហំសារាមមុបេច្ចហំ;

អទ្ទសំ វរទំ [វទតំ (សី. បី.), បវរំ (ស្យា.)] សេដ្ឋំ, មហាជនបុរក្ខតំ.

២០៣. ‘‘ទេសេន្តំ វិរជំ ធម្មំ, បច្ចនីកមតី អហំ;

ឧបេត្វា តស្ស កល្យាណំ, សុត្វាន វិមលំ អហំ [វាក្យានិ, សុត្វាន វិមលានហំ (សី. ស្យា. បី.)].

២០៤. ‘‘ព្យាហតំ បុនរុត្តំ វា, អបត្ថំ វា និរត្ថកំ;

នាទ្ទសំ តស្ស មុនិនោ, តតោ បព្ពជិតោ អហំ.

២០៥. ‘‘នចិរេនេវ កាលេន, សព្ពសត្តវិសារទោ;

និបុណោ ពុទ្ធវចនេ, អហោសិំ គុណិសម្មតោ.

២០៦. ‘‘តទា ចតស្សោ គាថាយោ, គន្ថយិត្វា សុព្យញ្ជនា;

សន្ថវិត្វា តិលោកគ្គំ, ទេសយិស្សំ ទិនេ ទិនេ.

២០៧. ‘‘វិរត្តោសិ មហាវីរោ, សំសារេ សភយេ វសំ;

ករុណាយ ន និព្ពាយិ, តតោ ការុណិកោ មុនិ.

២០៨. ‘‘បុថុជ្ជនោ វយោ សន្តោ, ន កិលេសវសោ អហុ;

សម្បជានោ សតិយុត្តោ, តស្មា ឯសោ អចិន្តិយោ.

២០៩. ‘‘ទុព្ពលានិ កិលេសានិ, យស្សាសយគតានិ មេ;

ញាណគ្គិបរិទឌ្ឍានិ, ន ខីយិំសុ តមព្ភុតំ.

២១០. ‘‘យោ សព្ពលោកស្ស គរុ, លោកោ [លោកេ (ស្យា. ក.)] យស្ស តថា គរុ;

តថាបិ លោកាចរិយោ, លោកោ តស្សានុវត្តកោ.

២១១. ‘‘ឯវមាទីហិ សម្ពុទ្ធំ, កិត្តយំ ធម្មទេសនំ;

យាវជីវំ ករិត្វាន, គតោ សគ្គំ តតោ ចុតោ.

២១២. ‘‘សតសហស្សិតោ កប្បេ, យំ ពុទ្ធមភិកិត្តយិំ;

ទុគ្គតិំ នាភិជានាមិ, កិត្តនាយ ឥទំ ផលំ.

២១៣. ‘‘ទេវលោកេ មហារជ្ជំ, បាទេសិំ កញ្ចនគ្ឃិយំ [ទិព្ពានុភោជហំ តទា (ស្យា.), រជ្ជំ បាទេសិ កំចយំ (សី.)];

ចក្កវត្តី មហារជ្ជំ, ពហុសោនុភវិំ អហំ.

២១៤. ‘‘ទុវេ ភវេ បជាយាមិ, ទេវត្តេ អថ មានុសេ;

អញ្ញំ គតិំ ន ជានាមិ, កិត្តនាយ ឥទំ ផលំ.

២១៥. ‘‘ទុវេ កុលេ បជាយាមិ, ខត្តិយេ អថ ព្រាហ្មណេ;

នីចេ កុលេ ន ជាយាមិ, កិត្តនាយ ឥទំ ផលំ.

២១៦. ‘‘បច្ឆិមេ ច ភវេ ទានិ, គិរិព្ពជបុរុត្តមេ;

រញ្ញោហំ ពិម្ពិសារស្ស, បុត្តោ នាមេន ចាភយោ.

២១៧. ‘‘បាបមិត្តវសំ គន្ត្វា, និគណ្ឋេន វិមោហិតោ;

បេសិតោ នាដបុត្តេន, ពុទ្ធសេដ្ឋមុបេច្ចហំ.

២១៨. ‘‘បុច្ឆិត្វា និបុណំ បញ្ហំ, សុត្វា ព្យាករណុត្តមំ;

បព្ពជិត្វាន នចិរំ, អរហត្តមបាបុណិំ.

២១៩. ‘‘កិត្តយិត្វា ជិនវរំ, កិត្តិតោ ហោមិ សព្ពទា;

សុគន្ធទេហវទនោ, អាសិំ សុខសមប្បិតោ.

២២០. ‘‘តិក្ខហាសលហុបញ្ញោ, មហាបញ្ញោ តថេវហំ;

វិចិត្តបដិភានោ ច, តស្ស កម្មស្ស វាហសា.

២២១. ‘‘អភិត្ថវិត្វា បទុមុត្តរាហំ, បសន្នចិត្តោ អសមំ សយម្ភុំ;

ន គច្ឆិ កប្បានិ អបាយភូមិំ, សតំ សហស្សានិ ពលេន តស្ស.

២២២. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

២២៣. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២២៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អភយោ ថេរោ ឥមា គាថាយោ

អភាសិត្ថាតិ.

អភយត្ថេរស្សាបទានំ សត្តមំ.