៦. កាឡុទាយិត្ថេរអបទានំ

១៦៥. ‘‘បទុមុត្តរោ នាម ជិនោ, សព្ពធម្មេសុ ចក្ខុមា;

ឥតោ សតសហស្សម្ហិ, កប្បេ ឧប្បជ្ជិ នាយកោ.

១៦៦. ‘‘នាយកានំ វរោ សត្ថា, គុណាគុណវិទូ ជិនោ;

កតញ្ញូ កតវេទី ច, តិត្ថេ យោជេតិ បាណិនេ [បាណិនោ (សី. ស្យា បី.)].

១៦៧. ‘‘សព្ពញ្ញុតេន ញាណេន, តុលយិត្វា ទយាសយោ;

ទេសេតិ បវរំ ធម្មំ, អនន្តគុណសញ្ចយោ.

១៦៨. ‘‘ស កទាចិ មហាវីរោ, អនន្តជិនសំសរិ [អនន្តជនសំសទិ (សី.), អនន្តជនសំសុធិ (ស្យា.), អនន្តជនសំសរី (បី.)];

ទេសេតិ មធុរំ ធម្មំ, ចតុសច្ចូបសញ្ហិតំ.

១៦៩. ‘‘សុត្វាន តំ ធម្មវរំ, អាទិមជ្ឈន្តសោភណំ;

បាណសតសហស្សានំ, ធម្មាភិសមយោ អហុ.

១៧០. ‘‘និន្នាទិតា តទា ភូមិ, គជ្ជិំសុ ច បយោធរា;

សាធុការំ បវត្តិំសុ, ទេវព្រហ្មនរាសុរា.

១៧១. ‘‘‘អហោ ការុណិកោ សត្ថា, អហោ សទ្ធម្មទេសនា;

អហោ ភវសមុទ្ទម្ហិ, និមុគ្គេ ឧទ្ធរី ជិនោ’.

១៧២. ‘‘ឯវំ បវេទជាតេសុ, សនរាមរព្រហ្មសុ;

កុលប្បសាទកានគ្គំ, សាវកំ វណ្ណយី ជិនោ.

១៧៣. ‘‘តទាហំ ហំសវតិយំ, ជាតោមច្ចកុលេ អហុំ;

បាសាទិកោ ទស្សនិយោ, បហូតធនធញ្ញវា.

១៧៤. ‘‘ហំសារាមមុបេច្ចាហំ, វន្ទិត្វា តំ តថាគតំ;

សុណិត្វា មធុរំ ធម្មំ, ការំ កត្វា ច តាទិនោ.

១៧៥. ‘‘និបច្ច បាទមូលេហំ, ឥមំ វចនមព្រវិំ;

‘កុលប្បសាទកានគ្គោ, យោ តយា សន្ថុតោ [យោ តវ សាសនេ (ស្យា.)] មុនេ.

១៧៦. ‘‘‘តាទិសោ ហោមហំ វីរ [តាទិសោហំ មហាវីរ (ស្យា. ក.)], ពុទ្ធសេដ្ឋស្ស សាសនេ’;

តទា មហាការុណិកោ, សិញ្ចន្តោ វា មតេន មំ.

១៧៧. ‘‘អាហ មំ ‘បុត្ត ឧត្តិដ្ឋ, លច្ឆសេ តំ មនោរថំ;

កថំ នាម ជិនេ ការំ, កត្វាន វិផលោ សិយា.

១៧៨. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

១៧៩. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

ឧទាយិ នាម នាមេន, ហេស្សតិ សត្ថុ សាវកោ’.

១៨០. ‘‘តំ សុត្វា មុទិតោ ហុត្វា, យាវជីវំ តទា ជិនំ;

មេត្តចិត្តោ បរិចរិំ, បច្ចយេហិ វិនាយកំ.

១៨១. ‘‘តេន កម្មវិបាកេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

១៨២. ‘‘បច្ឆិមេ ច ភវេ ទានិ, រម្មេ កបិលវត្ថវេ;

ជាតោ មហាមច្ចកុលេ, សុទ្ធោទនមហីបតេ [សុទ្ធោទនោ មហីបតិ (ស្យា.)].

១៨៣. ‘‘តទា អជាយិ សិទ្ធត្ថោ, រម្មេ លុម្ពិនិកាននេ;

ហិតាយ សព្ពលោកស្ស, សុខាយ ច នរាសភោ.

១៨៤. ‘‘តទហេវ អហំ ជាតោ, សហ តេនេវ វឌ្ឍិតោ;

បិយោ សហាយោ ទយិតោ, វិយត្តោ នីតិកោវិទោ.

១៨៥. ‘‘ឯកូនតិំសោ វយសា, និក្ខមិត្វា អគារតោ [និក្ខន្តោ បព្ពជិត្ថសោ (សី. ស្យា.)];

ឆព្ពស្សំ វីតិនាមេត្វា, អាសិ ពុទ្ធោ វិនាយកោ.

១៨៦. ‘‘ជេត្វា សសេនកំ មារំ, ខេបយិត្វាន អាសវេ;

ភវណ្ណវំ តរិត្វាន, ពុទ្ធោ អាសិ សទេវកេ.

១៨៧. ‘‘ឥសិវ្ហយំ គមិត្វាន [ឥសិវ្ហយំ បតនំ គន្ត្វា (ស្យា.)], វិនេត្វា បញ្ចវគ្គិយេ;

តតោ វិនេសិ ភគវា, គន្ត្វា គន្ត្វា តហិំ តហិំ.

១៨៨. ‘‘វេនេយ្យេ វិនយន្តោ សោ, សង្គណ្ហន្តោ សទេវកំ;

ឧបេច្ច មគធេ គិរិំ [មាគទគិរិំ (សី.), មង្គលាគិរិំ (បី.)], វិហរិត្ថ តទា ជិនោ.

១៨៩. ‘‘តទា សុទ្ធោទនេនាហំ, ភូមិបាលេន បេសិតោ;

គន្ត្វា ទិស្វា ទសពលំ, បព្ពជិត្វារហា អហុំ.

១៩០. ‘‘តទា មហេសិំ យាចិត្វា, បាបយិំ កបិលវ្ហយំ;

តតោ បុរាហំ គន្ត្វាន, បសាទេសិំ មហាកុលំ.

១៩១. ‘‘ជិនោ តស្មិំ គុណេ តុដ្ឋោ, មំ មហាបរិសាយ សោ [មមាហ បុរិសាសភោ (ស្យា. បី.)];

កុលប្បសាទកានគ្គំ, បញ្ញាបេសិ វិនាយកោ.

១៩២. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១៩៣. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៩៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កាឡុទាយិថេរោ ឥមា គាថាយោ

អភាសិត្ថាតិ.

កាឡុទាយិត្ថេរស្សាបទានំ ឆដ្ឋំ.