៥. នន្ទកត្ថេរអបទានំ

១៤៣. ‘‘បទុមុត្តរោ នាម ជិនោ, សព្ពធម្មេសុ ចក្ខុមា;

ឥតោ សតសហស្សម្ហិ, កប្បេ ឧប្បជ្ជិ នាយកោ.

១៤៤. ‘‘ហិតាយ សព្ពសត្តានំ, សុខាយ វទតំ វរោ;

អត្ថាយ បុរិសាជញ្ញោ, បដិបន្នោ សទេវកេ.

១៤៥. ‘‘យសគ្គបត្តោ សិរិមា, កិត្តិវណ្ណភតោ [កិត្តិវណ្ណ ភដោ (ស្យា. ក.)] ជិនោ;

បូជិតោ សព្ពលោកស្ស, ទិសា សព្ពាសុ វិស្សុតោ.

១៤៦. ‘‘ឧត្តិណ្ណវិចិកិច្ឆោ សោ, វីតិវត្តកថំកថោ;

បរិបុណ្ណមនសង្កប្បោ, បត្តោ សម្ពោធិមុត្តមំ.

១៤៧. ‘‘អនុប្បន្នស្ស មគ្គស្ស, ឧប្បាទេតា នរុត្តមោ;

អនក្ខាតញ្ច អក្ខាសិ, អសញ្ជាតញ្ច សញ្ជនី.

១៤៨. ‘‘មគ្គញ្ញូ មគ្គវិទូ [សោ មគ្គវិទូ (សី. បី.)] ច, មគ្គក្ខាយី នរាសភោ;

មគ្គស្ស កុសលោ សត្ថា, សារថីនំ វរុត្តមោ [នរុត្តមោ (ស្យា.)].

១៤៩. ‘‘តទា មហាការុណិកោ, ធម្មំ ទេសេសិ នាយកោ;

និមុគ្គេ កាមបង្កម្ហិ [មោហបង្កម្ហិ (សី. ស្យា.), មោហមគ្គម្ហិ (បី.)], សមុទ្ធរតិ បាណិនេ.

១៥០. ‘‘ភិក្ខុនីនំ ឱវទនេ, សាវកំ សេដ្ឋសម្មតំ;

វណ្ណយំ ឯតទគ្គម្ហិ, បញ្ញបេសិ មហាមុនិ.

១៥១. ‘‘តំ សុត្វាហំ បមុទិតោ, និមន្តេត្វា តថាគតំ;

ភោជយិត្វា សសង្ឃំ តំ, បត្ថយិំ ឋានមុត្តមំ.

១៥២. ‘‘តទា បមុទិតោ នាថោ, មំ អវោច មហាឥសិ;

‘សុខី ភវស្សុ ទីឃាវុ [ទីឃាយុ (សី. ស្យា.)], លច្ឆសេ តំ មនោរថំ.

១៥៣. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

១៥៤. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

នន្ទកោ នាម នាមេន, ហេស្សតិ សត្ថុ សាវកោ’.

១៥៥. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសូបគោ អហំ.

១៥៦. ‘‘បច្ឆិមេ ច ភវេ ទានិ, ជាតោ សេដ្ឋិកុលេ អហំ;

សាវត្ថិយំ បុរេ វរេ, ឥទ្ធេ ផីតេ មហទ្ធនេ.

១៥៧. ‘‘បុរប្បវេសេ សុគតំ, ទិស្វា វិម្ហិតមានសោ;

ជេតារាមបដិគ្គាហេ, បព្ពជិំ អនគារិយំ.

១៥៨. ‘‘នចិរេនេវ កាលេន, អរហត្តមបាបុណិំ;

តតោហំ តិណ្ណសំសារោ, សាសិតោ សព្ពទស្សិនា.

១៥៩. ‘‘ភិក្ខុនីនំ ធម្មកថំ, បដិបុច្ឆាករិំ អហំ;

សាសិតា តា មយា សព្ពា, អភវិំសុ អនាសវា.

១៦០. ‘‘សតានិ បញ្ចនូនានិ, តទា តុដ្ឋោ មហាហិតោ;

ភិក្ខុនីនំ ឱវទតំ, អគ្គដ្ឋានេ ឋបេសិ មំ.

១៦១. ‘‘សតសហស្សេ កតំ កម្មំ, ផលំ ទស្សេសិ មេ ឥធ;

សុមុត្តោ សរវេគោវ, កិលេសេ ឈាបយិំ មម.

១៦២. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១៦៣. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៦៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា នន្ទកោ ថេរោ ឥមា គាថាយោ

អភាសិត្ថាតិ.

នន្ទកត្ថេរស្សាបទានំ បញ្ចមំ.