៤. វង្គីសត្ថេរអបទានំ

៩៦. ‘‘បទុមុត្តរោ នាម ជិនោ, សព្ពធម្មេសុ ចក្ខុមា;

ឥតោ សតសហស្សម្ហិ, កប្បេ ឧប្បជ្ជិ នាយកោ.

៩៧. ‘‘យថាបិ សាគរេ ឩមិ, គគនេ វិយ តារកា;

ឯវំ បាវចនំ តស្ស, អរហន្តេហិ ចិត្តិតំ.

៩៨. ‘‘សទេវាសុរនាគេហិ, មនុជេហិ បុរក្ខតោ;

សមណព្រាហ្មណាកិណ្ណេ, ជនមជ្ឈេ ជិនុត្តមោ.

៩៩. ‘‘បភាហិ អនុរញ្ជន្តោ, លោកេ [លោកំ (សី.)] លោកន្តគូ ជិនោ;

វចនេន វិពោធេន្តោ, វេនេយ្យបទុមានិ សោ.

១០០. ‘‘វេសារជ្ជេហិ សម្បន្នោ, ចតូហិ បុរិសុត្តមោ;

បហីនភយសារជ្ជោ, ខេមប្បត្តោ វិសារទោ.

១០១. ‘‘អាសភំ បវរំ ឋានំ, ពុទ្ធភូមិញ្ច កេវលំ;

បដិជានាតិ លោកគ្គោ, នត្ថិ សញ្ចោទកោ ក្វចិ.

១០២. ‘‘សីហនាទមសម្ភីតំ, នទតោ តស្ស តាទិនោ;

ទេវោ នរោ វា ព្រហ្មា វា, បដិវត្តា ន វិជ្ជតិ.

១០៣. ‘‘ទេសេន្តោ បវរំ ធម្មំ, សន្តារេន្តោ សទេវកំ;

ធម្មចក្កំ បវត្តេតិ, បរិសាសុ វិសារទោ.

១០៤. ‘‘បដិភានវតំ អគ្គំ, សាវកំ សាធុសម្មតំ;

គុណំ ពហុំ បកិត្តេត្វា, ឯតទគ្គេ ឋបេសិ តំ.

១០៥. ‘‘តទាហំ ហំសវតិយំ, ព្រាហ្មណោ សាធុសម្មតោ;

សព្ពវេទវិទូ ជាតោ, វាគីសោ វាទិសូទនោ.

១០៦. ‘‘ឧបេច្ច តំ មហាវីរំ, សុត្វាហំ ធម្មទេសនំ;

បីតិវរំ បដិលភិំ, សាវកស្ស គុណេ រតោ.

១០៧. ‘‘និមន្តេត្វាវ សុគតំ, សសង្ឃំ លោកនន្ទនំ;

សត្តាហំ ភោជយិត្វាហំ, ទុស្សេហច្ឆាទយិំ តទា.

១០៨. ‘‘និបច្ច សិរសា បាទេ, កតោកាសោ កតញ្ជលី;

ឯកមន្តំ ឋិតោ ហដ្ឋោ, សន្ថវិំ ជិនមុត្តមំ.

១០៩. ‘‘‘នមោ តេ វាទិមទ្ទន [វាទិសទ្ទុល (សី. បី.), វាទិសូទន (ស្យា.)], នមោ តេ ឥសិសត្តម [បុរិសុត្តម (សី. បី.)];

នមោ តេ សព្ពលោកគ្គ, នមោ តេ អភយង្ករ.

១១០. ‘‘‘នមោ តេ មារមថន [មារមសន (អដ្ឋ.)], នមោ តេ ទិដ្ឋិសូទន;

នមោ តេ សន្តិសុខទ, នមោ តេ សរណង្ករ.

១១១. ‘‘‘អនាថានំ ភវំ នាថោ, ភីតានំ អភយប្បទោ;

វិស្សាមភូមិ [វិស្សាសំ ភូមិ (ស្យា.), វិស្សានភូមិ (បី.)] សន្តានំ, សរណំ សរណេសិនំ’.

១១២. ‘‘ឯវមាទីហិ សម្ពុទ្ធំ, សន្ថវិត្វា មហាគុណំ;

អវោចំ វាទិសូទស្ស [វាទិសូរស្ស (សី. ស្យា. បី.)], គតិំ បប្បោមិ ភិក្ខុនោ.

១១៣. ‘‘តទា អវោច ភគវា, អនន្តបដិភានវា;

‘យោ សោ ពុទ្ធំ អភោជេសិ, សត្តាហំ សហសាវកំ.

១១៤. ‘‘‘គុណញ្ច មេ បកិត្តេសិ, បសន្នោ សេហិ បាណិភិ;

ឯសោ បត្ថយតេ ឋានំ, វាទិសូទស្ស ភិក្ខុនោ.

១១៥. ‘‘‘អនាគតម្ហិ អទ្ធានេ, លច្ឆសេ តំ មនោរថំ;

ទេវមានុសសម្បត្តិំ, អនុភោត្វា អនប្បកំ.

១១៦. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

១១៧. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

វង្គីសោ នាម នាមេន, ហេស្សតិ សត្ថុ សាវកោ’.

១១៨. ‘‘តំ សុត្វា មុទិតោ ហុត្វា, យាវជីវំ តទា ជិនំ;

បច្ចយេហិ ឧបដ្ឋាសិំ, មេត្តចិត្តោ តថាគតំ.

១១៩. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តុសិតំ [តាវតិំសំ (ស្យា.)] អគមាសហំ.

១២០. ‘‘បច្ឆិមេ ច ភវេ ទានិ, ជាតោ វិប្បកុលេ [បរិព្ពាជកុលេ (សី. ស្យា. បី.)] អហំ;

បច្ចាជាតោ [សម្បត្តោ ច (ក.)] យទា អាសិំ, ជាតិយា សត្តវស្សិកោ.

១២១. ‘‘សព្ពវេទវិទូ ជាតោ, វាទសត្ថវិសារទោ;

វាទិស្សរោ [វគ្គុស្សរោ (ស្យា. បី.)] ចិត្តកថី, បរវាទប្បមទ្ទនោ.

១២២. ‘‘វង្គេ ជាតោតិ វង្គីសោ, វចនេ ឥស្សរោតិ វា;

វង្គីសោ ឥតិ មេ នាមំ, អភវី លោកសម្មតំ.

១២៣. ‘‘យទាហំ វិញ្ញុតំ បត្តោ, ឋិតោ បឋមយោព្ពនេ;

តទា រាជគហេ រម្មេ, សារិបុត្តមហទ្ទសំ [មថទ្ទសំ (សី. បី.), ច អទ្ទសំ (ស្យា.)].

បញ្ចវីសតិមំ ភាណវារំ.

១២៤. ‘‘បិណ្ឌាយ វិចរន្តំ តំ, បត្តបាណិំ សុសំវុតំ;

អលោលក្ខិំ មិតភាណិំ, យុគមត្តំ និទក្ខិតំ [និរិក្ខតំ (សី. បី.), ឧទិក្ខតំ (ស្យា.)].

១២៥. ‘‘តំ ទិស្វា វិម្ហិតោ ហុត្វា, អវោចំ មមនុច្ឆវំ [មននុច្ឆវំ (សី. ស្យា.)];

កណិការំវ និចិតំ [កណិការបរិចិតំ (បី.), ខណិកំ ឋានរចិតំ (សី.)], ចិត្តំ គាថាបទំ អហំ.

១២៦. ‘‘អាចិក្ខិ សោ មេ សត្ថារំ, សម្ពុទ្ធំ លោកនាយកំ;

តទា សោ បណ្ឌិតោ វីរោ, ឧត្តរិំ [ឧត្តរំ (សី. បី.)] សមវោច មេ.

១២៧. ‘‘វិរាគសំហិតំ វាក្យំ, កត្វា ទុទ្ទសមុត្តមំ;

វិចិត្តបដិភានេហិ, តោសិតោ តេន តាទិនា.

១២៨. ‘‘និបច្ច សិរសា បាទេ, ‘បព្ពាជេហី’តិ មំ ព្រវិ;

តតោ មំ ស មហាបញ្ញោ, ពុទ្ធសេដ្ឋមុបានយិ.

១២៩. ‘‘និបច្ច សិរសា បាទេ, និសីទិំ សត្ថុ សន្តិកេ;

មមាហ វទតំ សេដ្ឋោ, កច្ចិ វង្គីស ជានាសិ [សច្ចំ វង្គីស កច្ចិ តេ (ស្យា.)].

១៣០. ‘‘កិញ្ចិ សិប្បន្តិ តស្សាហំ, ‘ជានាមី’តិ ច អព្រវិំ;

មតសីសំ វនច្ឆុទ្ធំ, អបិ ពារសវស្សិកំ;

តវ វិជ្ជាវិសេសេន, សចេ សក្កោសិ វាចយ [ភាសយ (សី. បី.)].

១៣១. ‘‘អាមោតិ មេ បដិញ្ញាតេ, តីណិ សីសានិ ទស្សយិ;

និរយនរទេវេសុ, ឧបបន្នេ អវាចយិំ.

១៣២. ‘‘តទា ខីណាសវស្សេវ [បច្ចេកពុទ្ធស្ស (សី. បី.)], សីសំ ទស្សេសិ នាយកោ;

តតោហំ វិហតារព្ភោ, បព្ពជ្ជំ សមយាចិសំ.

១៣៣. ‘‘បព្ពជិត្វាន សុគតំ, សន្ថវាមិ តហិំ តហិំ;

តតោ មំ កព្ពវិត្តោសិ [កវិចិត្តោតិ (ស្យា. បី.)], ឧជ្ឈាយន្តិហ ភិក្ខវោ.

១៣៤. ‘‘តតោ វីមំសនត្ថំ មេ, អាហ ពុទ្ធោ វិនាយកោ;

តក្កិកា បនិមា គាថា, ឋានសោ បដិភន្តិ តំ.

១៣៥. ‘‘ន កព្ពវិត្តោហំ វីរ, ឋានសោ បដិភន្តិ មំ;

តេន ហិ ទានិ វង្គីស, ឋានសោ សន្ថវាហិ មំ.

១៣៦. ‘‘តទាហំ សន្ថវិំ វីរំ, គាថាហិ ឥសិសត្តមំ;

ឋានសោ មេ តទា តុដ្ឋោ, ជិនោ អគ្គេ ឋបេសិ មំ.

១៣៧. ‘‘បដិភានេន ចិត្តេន, អញ្ញេសមតិមញ្ញហំ;

បេសលេ តេន សំវិគ្គោ, អរហត្តមបាបុណិំ.

១៣៨. ‘‘‘បដិភានវតំ អគ្គោ, អញ្ញោ កោចិ ន វិជ្ជតិ;

យថាយំ ភិក្ខុ វង្គីសោ, ឯវំ ធារេថ ភិក្ខវោ’.

១៣៩. ‘‘សតសហស្សេ កតំ កម្មំ, ផលំ ទស្សេសិ មេ ឥធ;

សុមុត្តោ សរវេគោវ កិលេសេ ឈាបយិំ មម.

១៤០. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១៤១. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៤២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា វង្គីសោ ថេរោ ឥមា គាថាយោ

អភាសិត្ថាតិ.

វង្គីសត្ថេរស្សាបទានំ ចតុត្ថំ.