៣. សីវលិត្ថេរអបទានំ

៥៤. ‘‘បទុមុត្តរោ នាម ជិនោ, សព្ពធម្មេសុ ចក្ខុមា;

ឥតោ សតសហស្សម្ហិ, កប្បេ ឧប្បជ្ជិ នាយកោ.

៥៥. ‘‘សីលំ តស្ស អសង្ខេយ្យំ, សមាធិ វជិរូបមោ;

អសង្ខេយ្យំ ញាណវរំ, វិមុត្តិ ច អនោបមា.

៥៦. ‘‘មនុជាមរនាគានំ, ព្រហ្មានញ្ច សមាគមេ;

សមណព្រាហ្មណាកិណ្ណេ, ធម្មំ ទេសេសិ នាយកោ.

៥៧. ‘‘សសាវកំ មហាលាភិំ, បុញ្ញវន្តំ ជុតិន្ធរំ;

ឋបេសិ ឯតទគ្គម្ហិ, បរិសាសុ វិសារទោ.

៥៨. ‘‘តទាហំ ខត្តិយោ អាសិំ, នគរេ ហំសសវ្ហយេ;

សុត្វា ជិនស្ស តំ វាក្យំ, សាវកស្ស គុណំ ពហុំ.

៥៩. ‘‘និមន្តយិត្វា សត្តាហំ, ភោជយិត្វា សសាវកំ;

មហាទានំ ទទិត្វាន, តំ ឋានមភិបត្ថយិំ.

៦០. ‘‘តទា មំ វិនតំ បាទេ, ទិស្វាន បុរិសាសភោ;

សរេន មហតា វីរោ [សុស្សរេន មហាវីរោ (សី. បី.)], ឥទំ វចនមព្រវិ.

៦១. ‘‘‘តតោ ជិនស្ស វចនំ, សោតុកាមា មហាជនា;

ទេវទានវគន្ធព្ពា, ព្រហ្មានោ ច មហិទ្ធិកា’.

៦២. ‘‘សមណព្រាហ្មណា ចេវ, នមស្សិំសុ កតញ្ជលី;

‘នមោ តេ បុរិសាជញ្ញ, នមោ តេ បុរិសុត្តម.

៦៣. ‘‘‘ខត្តិយេន មហាទានំ, ទិន្នំ សត្តាហិកម្បិ វោ [សត្តហិកំ មិ វោ (សី.), សត្តហិកាធិកំ (ស្យា.), សត្តហិកំ វិភោ (បី.)];

សោតុកាមា ផលំ តស្ស, ព្យាករោហិ មហាមុនេ’.

៦៤. ‘‘តតោ អវោច ភគវា, ‘សុណាថ មម ភាសិតំ;

អប្បមេយ្យម្ហិ ពុទ្ធម្ហិ, សសង្ឃម្ហិ បតិដ្ឋិតា [សំឃម្ហិ សុប្បតិដ្ឋិតា (សី. បី.)].

៦៥. ‘‘‘ទក្ខិណា តាយ [ទក្ខិណាទាយ (ស្យា. បី.)] កោ វត្តា, អប្បមេយ្យផលា ហិ សា;

អបិ ចេ ស មហាភោគោ, ឋានំ បត្ថេតិ ឧត្តមំ.

៦៦. ‘‘‘លាភី វិបុលលាភានំ, យថា ភិក្ខុ សុទស្សនោ;

តថាហម្បិ ភវេយ្យន្តិ, លច្ឆសេ តំ អនាគតេ.

៦៧. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៦៨. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

សីវលិ នាម នាមេន, ហេស្សតិ សត្ថុ សាវកោ’.

៦៩. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសូបគោ អហំ.

៧០. ‘‘ឯកនវុតិតោ កប្បេ, វិបស្សី លោកនាយកោ;

ឧប្បជ្ជិ ចារុទស្សនោ, សព្ពធម្មវិបស្សកោ.

៧១. ‘‘តទាហំ ពន្ធុមតិយំ, កុលស្សញ្ញតរស្ស ច;

ទយិតោ បស្សិតោ ចេវ, អាសិំ កម្មន្តវាវដោ [កម្មន្តព្យាវដោ (សី. ស្យា. ក.)].

៧២. ‘‘តទា អញ្ញតរោ បូគោ, វិបស្សិស្ស មហេសិនោ;

បរិវេសំ អការយិ, មហន្តមតិវិស្សុតំ.

៧៣. ‘‘និដ្ឋិតេ ច មហាទានេ, ទទុំ ខជ្ជកសញ្ហិតំ;

នវំ ទធិំ មធុញ្ចេវ, វិចិនំ នេវ អទ្ទសុំ.

៧៤. ‘‘តទាហំ តំ គហេត្វាន, នវំ ទធិំ មធុម្បិ ច;

កម្មស្សាមិឃរំ គច្ឆិំ, តមេសន្តា មមទ្ទសុំ.

៧៥. ‘‘សហស្សមបិ ទត្វាន, នាលភិំសុ ច តំ ទ្វយំ;

តតោហំ ឯវំ ចិន្តេសិំ, ‘នេតំ ហេស្សតិ ឱរកំ.

៧៦. ‘‘‘យថា ឥមេ ជនា សព្ពេ, សក្ករោន្តិ តថាគតំ;

អហម្បិ ការំ កស្សាមិ, សសង្ឃេ លោកនាយកេ’.

៧៧. ‘‘តទាហមេវំ ចិន្តេត្វា, ទធិំ មធុញ្ច ឯកតោ;

មទ្ទិត្វា លោកនាថស្ស, សសង្ឃស្ស អទាសហំ.

៧៨. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៧៩. ‘‘បុនាហំ ពារាណសិយំ, រាជា ហុត្វា មហាយសោ;

សត្តុកស្ស តទា ទុដ្ឋោ, ទ្វាររោធមការយិំ.

៨០. ‘‘តទា តបស្សិនោ រុទ្ធា, ឯកាហំ រក្ខិតា អហុំ;

តតោ តស្ស វិបាកេន, បាបតិំ [បាបិដ្ឋំ (ស្យា.) បាបត្តំ (ក.)] និរយំ ភុសំ.

៨១. ‘‘បច្ឆិមេ ច ភវេ ទានិ, ជាតោហំ កោលិយេ បុរេ;

សុប្បវាសា ច មេ មាតា, មហាលិ លិច្ឆវី បិតា.

៨២. ‘‘ខត្តិយេ បុញ្ញកម្មេន, ទ្វាររោធស្ស វាហសា;

សត្ត វស្សានិ និវសិំ, មាតុកុច្ឆិម្ហិ ទុក្ខិតោ.

៨៣. ‘‘សត្តាហំ ទ្វារមូឡ្ហោហំ, មហាទុក្ខសមប្បិតោ;

មាតា មេ ឆន្ទទានេន, ឯវំ អាសិ សុទុក្ខិតា.

៨៤. ‘‘សុវត្ថិតោហំ និក្ខន្តោ, ពុទ្ធេន អនុកម្បិតោ;

និក្ខន្តទិវសេយេវ, បព្ពជិំ អនគារិយំ.

៨៥. ‘‘ឧបជ្ឈា សារិបុត្តោ មេ, មោគ្គល្លានោ មហិទ្ធិកោ;

កេសេ ឱរោបយន្តោ មេ, អនុសាសិ មហាមតិ.

៨៦. ‘‘កេសេសុ ឆិជ្ជមានេសុ, អរហត្តមបាបុណិំ;

ទេវា នាគា មនុស្សា ច, បច្ចយេ ឧបនេន្តិ មេ.

៨៧. ‘‘បទុមុត្តរនាថញ្ច, វិបស្សិញ្ច វិនាយកំ;

យំ បូជយិំ បមុទិតោ, បច្ចយេហិ វិសេសតោ.

៨៨. ‘‘តតោ តេសំ វិសេសេន, កម្មានំ វិបុលុត្តមំ;

លាភំ លភាមិ សព្ពត្ថ, វនេ គាមេ ជលេ ថលេ.

៨៩. ‘‘រេវតំ ទស្សនត្ថាយ, យទា យាតិ វិនាយកោ;

តិំសភិក្ខុសហស្សេហិ, សហ លោកគ្គនាយកោ.

៩០. ‘‘តទា ទេវោបណីតេហិ, មមត្ថាយ មហាមតិ;

បច្ចយេហិ មហាវីរោ, សសង្ឃោ លោកនាយកោ.

៩១. ‘‘ឧបដ្ឋិតោ មយា ពុទ្ធោ, គន្ត្វា រេវតមទ្ទស;

តតោ ជេតវនំ គន្ត្វា, ឯតទគ្គេ ឋបេសិ មំ.

៩២. ‘‘‘លាភីនំ សីវលិ អគ្គោ, មម សិស្សេសុ ភិក្ខវោ’;

សព្ពលោកហិតោ សត្ថា, កិត្តយី បរិសាសុ មំ.

៩៣. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៩៤. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៩៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សីវលិថេរោ ឥមា គាថាយោ

អភាសិត្ថាតិ.

សីវលិត្ថេរស្សាបទានំ តតិយំ.