២. កង្ខារេវតត្ថេរអបទានំ

៣៤. ‘‘បទុមុត្តរោ នាម ជិនោ, សព្ពធម្មេសុ ចក្ខុមា;

ឥតោ សតសហស្សម្ហិ, កប្បេ ឧប្បជ្ជិ នាយកោ.

៣៥. ‘‘សីហហនុ ព្រហ្មគិរោ, ហំសទុន្ទុភិនិស្សនោ [ហំសទុន្ទុភិនិស្សរោ (សី.) … និស្សវនោ (បី.) … សាវនោ (ស្យា.)];

នាគវិក្កន្តគមនោ, ចន្ទសូរាទិកប្បភោ.

៣៦. ‘‘មហាមតី មហាវីរោ, មហាឈាយី មហាពលោ [មហាគតិ (ស្យា.), មហាហិតោ (បី.)];

មហាការុណិកោ នាថោ, មហាតមបនូទនោ [មហាតមវិធំសនោ (ស្យា.), មហាតមនិសូទនោ (បី.)].

៣៧. ‘‘ស កទាចិ តិលោកគ្គោ, វេនេយ្យំ វិនយំ ពហុំ [វេនេយ្យេ វិនិយំ ពហូ (សី.)];

ធម្មំ ទេសេសិ សម្ពុទ្ធោ, សត្តាសយវិទូ មុនិ.

៣៨. ‘‘ឈាយិំ ឈានរតំ វីរំ, ឧបសន្តំ អនាវិលំ;

វណ្ណយន្តោ បរិសតិំ, តោសេសិ [តោសេតិ (ស្យា. បី. ក.)] ជនតំ ជិនោ.

៣៩. ‘‘តទាហំ ហំសវតិយំ, ព្រាហ្មណោ វេទបារគូ;

ធម្មំ សុត្វាន មុទិតោ, តំ ឋានមភិបត្ថយិំ.

៤០. ‘‘តទា ជិនោ វិយាកាសិ, សង្ឃមជ្ឈេ វិនាយកោ;

‘មុទិតោ ហោហិ ត្វំ ព្រហ្មេ, លច្ឆសេ តំ មនោរថំ.

៤១. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៤២. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

រេវតោ នាម នាមេន, ហេស្សតិ សត្ថុ សាវកោ’.

៤៣. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៤៤. ‘‘បច្ឆិមេ ច ភវេ ទានិ, ជាតោហំ កោលិយេ បុរេ;

ខត្តិយេ កុលសម្បន្នេ, ឥទ្ធេ ផីតេ មហទ្ធនេ.

៤៥. ‘‘យទា កបិលវត្ថុស្មិំ, ពុទ្ធោ ធម្មមទេសយិ;

តទា បសន្នោ សុគតេ, បព្ពជិំ អនគារិយំ.

៤៦. ‘‘កង្ខា មេ ពហុលា អាសិ, កប្បាកប្បេ តហិំ តហិំ;

សព្ពំ តំ វិនយី ពុទ្ធោ, ទេសេត្វា ធម្មមុត្តមំ.

៤៧. ‘‘តតោហំ តិណ្ណសំសារោ, សទា ឈានសុខេ រតោ;

វិហរាមិ តទា ពុទ្ធោ, មំ ទិស្វា ឯតទព្រវិ.

៤៨. ‘‘‘យា កាចិ កង្ខា ឥធ វា ហុរំ វា, សកវេទិយា វា បរវេទិយា វា;

យេ ឈាយិនោ តា បជហន្តិ សព្ពា, អាតាបិនោ ព្រហ្មចរិយំ ចរន្តា’.

៤៩. ‘‘សតសហស្សេ កតំ កម្មំ, ផលំ ទស្សេសិ មេ ឥធ;

សុមុត្តោ សរវេគោវ កិលេសេ ឈាបយិំ មម.

៥០. ‘‘តតោ ឈានរតំ ទិស្វា, ពុទ្ធោ លោកន្តគូ មុនិ;

ឈាយីនំ ភិក្ខូនំ អគ្គោ, បញ្ញាបេតិ មហាមតិ.

៥១. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៥២. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៥៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កង្ខារេវតោ ថេរោ ឥមា គាថាយោ

អភាសិត្ថាតិ.

កង្ខារេវតត្ថេរស្សាបទានំ ទុតិយំ.