៩. រាធត្ថេរអបទានំ

២៩៦. ‘‘បទុមុត្តរោ នាម ជិនោ, សព្ពលោកវិទូ មុនិ;

ឥតោ សតសហស្សម្ហិ, កប្បេ ឧប្បជ្ជិ ចក្ខុមា.

២៩៧. ‘‘ឱវាទកោ វិញ្ញាបកោ, តារកោ សព្ពបាណិនំ;

ទេសនាកុសលោ ពុទ្ធោ, តារេសិ ជនតំ ពហុំ.

២៩៨. ‘‘អនុកម្បកោ ការុណិកោ, ហិតេសី សព្ពបាណិនំ;

សម្បត្តេ តិត្ថិយេ សព្ពេ, បញ្ចសីលេ បតិដ្ឋបិ.

២៩៩. ‘‘ឯវំ និរាកុលំ អាសិ, សុញ្ញតំ តិត្ថិយេហិ ច;

វិចិត្តំ អរហន្តេហិ, វសីភូតេហិ តាទិភិ.

៣០០. ‘‘រតនានដ្ឋបញ្ញាសំ, ឧគ្គតោ សោ មហាមុនិ;

កញ្ចនគ្ឃិយសង្កាសោ, ពាត្តិំសវរលក្ខណោ.

៣០១. ‘‘វស្សសតសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

៣០២. ‘‘តទាហំ ហំសវតិយំ, ព្រាហ្មណោ មន្តបារគូ;

ឧបេច្ច តំ នរវរំ, អស្សោសិំ ធម្មទេសនំ.

៣០៣. ‘‘បញ្ញបេន្តំ មហាវីរំ, បរិសាសុ វិសារទំ;

បដិភានេយ្យកំ ភិក្ខុំ, ឯតទគ្គេ វិនាយកំ.

៣០៤. ‘‘តទាហំ ការំ កត្វាន, សសង្ឃេ លោកនាយកេ;

និបច្ច សិរសា បាទេ, តំ ឋានំ អភិបត្ថយិំ.

៣០៥. ‘‘តតោ មំ ភគវា អាហ, សិង្គីនិក្ខសមប្បភោ;

សរេន រជនីយេន, កិលេសមលហារិនា.

៣០៦. ‘‘‘សុខី ភវស្សុ ទីឃាយុ, សិជ្ឈតុ បណិធី តវ;

សសង្ឃេ មេ កតំ ការំ, អតីវ វិបុលំ តយា.

៣០៧. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៣០៨. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

រាធោតិ នាមធេយ្យេន, ហេស្សតិ សត្ថុ សាវកោ.

៣០៩. ‘‘‘ស តេ ហេតុគុណេ តុដ្ឋោ, សក្យបុត្តោ នរាសភោ [ឥទំ បាទទ្វយំ ស្យាមមូលេ នត្ថី];

បដិភានេយ្យកានគ្គំ, បញ្ញបេស្សតិ នាយកោ’.

៣១០. ‘‘តំ សុត្វា មុទិតោ ហុត្វា, យាវជីវំ តទា ជិនំ;

មេត្តចិត្តោ បរិចរិំ, សតោ បញ្ញាសមាហិតោ.

៣១១. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៣១២. ‘‘សតានំ តីណិក្ខត្តុញ្ច, ទេវរជ្ជមការយិំ;

សតានំ បញ្ចក្ខត្តុញ្ច, ចក្កវត្តី អហោសហំ.

៣១៣. ‘‘បទេសរជ្ជំ វិបុលំ, គណនាតោ អសង្ខិយំ;

សព្ពត្ថ សុខិតោ អាសិំ, តស្ស កម្មស្ស វាហសា.

៣១៤. ‘‘បច្ឆិមេ ភវេ សម្បត្តេ, គិរិព្ពជបុរុត្តមេ;

ជាតោ វិប្បកុលេ និទ្ធេ, វិកលច្ឆាទនាសនេ.

៣១៥. ‘‘កដច្ឆុភិក្ខំ បាទាសិំ, សារិបុត្តស្ស តាទិនោ;

យទា ជិណ្ណោ ច វុទ្ធោ ច, តទារាមមុបាគមិំ.

៣១៦. ‘‘បព្ពជតិ ន មំ កោចិ [បព្ពាជេន្តិ ន មំ កេចិ (សី. ស្យា បី.)], ជិណ្ណទុព្ពលថាមកំ;

តេន ទីនោ វិវណ្ណង្គោ [វិវណ្ណកោ (ក.)], សោកោ ចាសិំ តទា អហំ.

៣១៧. ‘‘ទិស្វា មហាការុណិកោ, មមមាហ [មមាហ សោ (សី.), មមាហ ច (បី.)] មហាមុនិ;

‘កិមត្ថំ បុត្តសោកដ្ដោ, ព្រូហិ តេ ចិត្តជំ រុជំ’.

៣១៨. ‘‘‘បព្ពជ្ជំ ន លភេ វីរ, ស្វាក្ខាតេ តវ សាសនេ;

តេន សោកេន ទីនោស្មិ, សរណំ ហោហិ នាយក’.

៣១៩. ‘‘តទា ភិក្ខូ សមានេត្វា, អបុច្ឆិ មុនិសត្តមោ;

‘ឥមស្ស អធិការំ យេ, សរន្តិ ព្យាហរន្តុ តេ’.

៣២០. ‘‘សារិបុត្តោ តទាវោច, ‘ការមស្ស សរាមហំ;

កដច្ឆុភិក្ខំ ទាបេសិ, បិណ្ឌាយ ចរតោ មម’.

៣២១. ‘‘‘សាធុ សាធុ កតញ្ញូសិ, សារិបុត្ត ឥមំ តុវំ;

បព្ពាជេហិ ទិជំ វុឌ្ឍំ, ហេស្សតាជានិយោ អយំ’.

៣២២. ‘‘តតោ អលត្ថំ បព្ពជ្ជំ, កម្មវាចោបសម្បទំ;

ន ចិរេនេវ កាលេន, បាបុណិំ អាសវក្ខយំ.

៣២៣. ‘‘សក្កច្ចំ មុនិនោ វាក្យំ, សុណាមិ មុទិតោ យតោ;

បដិភានេយ្យកានគ្គំ, តតោ មំ ឋបយី ជិនោ.

៣២៤. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៣២៥. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៣២៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា រាធោ ថេរោ ឥមា គាថាយោ

អភាសិត្ថាតិ.

រាធត្ថេរស្សាបទានំ នវមំ.