១០. មោឃរាជត្ថេរអបទានំ

៣២៧. ‘‘បទុមុត្តរោ នាម ជិនោ, សព្ពលោកវិទូ មុនិ;

ឥតោ សតសហស្សម្ហិ, កប្បេ ឧប្បជ្ជិ ចក្ខុមា.

៣២៨. ‘‘ឱវាទកោ វិញ្ញាបកោ, តារកោ សព្ពបាណិនំ;

ទេសនាកុសលោ ពុទ្ធោ, តារេសិ ជនតំ ពហុំ.

៣២៩. ‘‘អនុកម្បកោ ការុណិកោ, ហិតេសី សព្ពបាណិនំ;

សម្បត្តេ តិត្ថិយេ សព្ពេ, បញ្ចសីលេ បតិដ្ឋបិ.

៣៣០. ‘‘ឯវំ និរាកុលំ អាសិ, សុញ្ញតំ តិត្ថិយេហិ ច;

វិចិត្តំ អរហន្តេហិ, វសីភូតេហិ តាទិភិ.

៣៣១. ‘‘រតនានដ្ឋបញ្ញាសំ, ឧគ្គតោ សោ មហាមុនិ;

កញ្ចនគ្ឃិយសង្កាសោ, ពាត្តិំសវរលក្ខណោ.

៣៣២. ‘‘វស្សសតសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

៣៣៣. ‘‘តទាហំ ហំសវតិយំ, កុលេ អញ្ញតរេ អហុំ;

បរកម្មាយនេ យុត្តោ, នត្ថិ មេ កិញ្ចិ សំធនំ.

៣៣៤. ‘‘បដិក្កមនសាលាយំ, វសន្តោ កតភូមិយំ;

អគ្គិំ ឧជ្ជាលយិំ តត្ថ, ទឡ្ហំ កណ្ហាសិ សា [កណ្ហា សិយា (សី. បី.), ឌយ្ហកណ្ហា សិលា (ស្យា.)] ហី.

៣៣៥. ‘‘តទា បរិសតិំ នាថោ, ចតុសច្ចបកាសកោ;

សាវកំ សម្បកិត្តេសិ, លូខចីវរធារកំ.

៣៣៦. ‘‘តស្ស តម្ហិ គុណេ តុដ្ឋោ, បណិបច្ច [បតិបជ្ជ (ស្យា.)] តថាគតំ;

លូខចីវរធារគ្គំ, បត្ថយិំ ឋានមុត្តមំ.

៣៣៧. ‘‘តទា អវោច ភគវា, សាវកេ បទុមុត្តរោ;

‘បស្សថេតំ បុរិសកំ, កុចេលំ តនុទេហកំ.

៣៣៨. ‘‘‘បីតិប្បសន្នវទនំ, សទ្ធាធនសមន្វិតំ [សទ្ធាស្នេហសមន្វតំ (ក.)];

ឧទគ្គតនុជំ ហដ្ឋំ, អចលំ សាលបិណ្ឌិតំ.

៣៣៩. ‘‘‘ឯសោ បត្ថេតិ តំ ឋានំ, សច្ចសេនស្ស ភិក្ខុនោ;

លូខចីវរធារិស្ស, តស្ស វណ្ណសិតាសយោ [វណ្ណគតាសយោ (សី. ស្យា. បី.)].

៣៤០. ‘‘តំ សុត្វា មុទិតោ ហុត្វា, និបច្ច សិរសា ជិនំ;

យាវជីវំ សុភំ កម្មំ, ករិត្វា ជិនសាសនេ.

៣៤១. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសូបគោ អហំ.

៣៤២. ‘‘បដិក្កមនសាលាយំ, ភូមិទាហកកម្មុនា;

សមសហស្សំ និរយេ, អទយ្ហិំ វេទនាដ្ដិតោ.

៣៤៣. ‘‘តេន កម្មាវសេសេន, បញ្ច ជាតិសតានិហំ;

មនុស្សោ កុលជោ ហុត្វា, ជាតិយា លក្ខណង្កិតោ.

៣៤៤. ‘‘បញ្ច ជាតិសតានេវ, កុដ្ឋរោគសមប្បិតោ;

មហាទុក្ខំ អនុភវិំ, តស្ស កម្មស្ស វាហសា.

៣៤៥. ‘‘ឥមស្មិំ ភទ្ទកេ កប្បេ, ឧបរិដ្ឋំ យសស្សិនំ;

បិណ្ឌបាតេន តប្បេសិំ, បសន្នមានសោ អហំ.

៣៤៦. ‘‘តេន កម្មវិសេសេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៣៤៧. ‘‘បច្ឆិមេ ភវេ សម្បត្តេ, អជាយិំ ខត្តិយេ កុលេ;

បិតុនោ អច្ចយេនាហំ, មហារជ្ជសមប្បិតោ.

៣៤៨. ‘‘កុដ្ឋរោគាធិភូតោហំ, ន រតិំ ន សុខំ លភេ;

មោឃំ រជ្ជំ សុខំ យស្មា, មោឃរាជា តតោ អហំ.

៣៤៩. ‘‘កាយស្ស ទោសំ ទិស្វាន, បព្ពជិំ អនគារិយំ;

ពាវរិស្ស ទិជគ្គស្ស, សិស្សត្តំ អជ្ឈុបាគមិំ.

៣៥០. ‘‘មហតា បរិវារេន, ឧបេច្ច នរនាយកំ;

អបុច្ឆិំ និបុណំ បញ្ហំ, តំ វីរំ វាទិសូទនំ.

៣៥១. ‘‘‘អយំ លោកោ បរោ លោកោ, ព្រហ្មលោកោ សទេវកោ;

ទិដ្ឋិំ នោ [ទិដ្ឋា នោ (សី.), ទិដ្ឋំ នោ (បី.), ទិដ្ឋិំ តេ (ស្យា.)] នាភិជានាមិ, គោតមស្ស យសស្សិនោ.

៣៥២. ‘‘‘ឯវាភិក្កន្តទស្សាវិំ, អត្ថិ បញ្ហេន អាគមំ;

កថំ លោកំ អវេក្ខន្តំ, មច្ចុរាជា ន បស្សតិ’.

៣៥៣. ‘‘‘សុញ្ញតោ លោកំ អវេក្ខស្សុ, មោឃរាជ សទា សតោ;

អត្តានុទិដ្ឋិំ ឧហច្ច, ឯវំ មច្ចុតរោ សិយា.

៣៥៤. ‘‘‘ឯវំ លោកំ អវេក្ខន្តំ, មច្ចុរាជា ន បស្សតិ’;

ឥតិ មំ អភណិ ពុទ្ធោ, សព្ពរោគតិកិច្ឆកោ.

៣៥៥. ‘‘សហ គាថាវសានេន, កេសមស្សុវិវជ្ជិតោ;

កាសាវវត្ថវសនោ, អាសិំ ភិក្ខុ តថារហា.

៣៥៦. ‘‘សង្ឃិកេសុ វិហារេសុ, ន វសិំ រោគបីឡិតោ;

មា វិហារោ បទុស្សីតិ, វាតរោគេហិ បីឡិតោ [វាចាយាភិសុបីឡិតោ (ស្យា. បី.), វាតរោគី សុបីឡិតោ (ក.)].

៣៥៧. ‘‘សង្ការកូដា អាហិត្វា, សុសានា រថិកាហិ ច;

តតោ សង្ឃាដិំ ករិត្វា, ធារយិំ លូខចីវរំ.

៣៥៨. ‘‘មហាភិសក្កោ តស្មិំ មេ, គុណេ តុដ្ឋោ វិនាយកោ;

លូខចីវរធារីនំ, ឯតទគ្គេ ឋបេសិ មំ.

៣៥៩. ‘‘បុញ្ញបាបបរិក្ខីណោ, សព្ពរោគវិវជ្ជិតោ;

សិខីវ អនុបាទានោ, និព្ពាយិស្សមនាសវោ.

៣៦០. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៣៦១. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៣៦២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មោឃរាជា ថេរោ ឥមា គាថាយោ

អភាសិត្ថាតិ.

មោឃរាជត្ថេរស្សាបទានំ ទសមំ.

កច្ចាយនវគ្គោ ចតុបញ្ញាសមោ.