៨. ឧរុវេឡកស្សបត្ថេរអបទានំ

២៥១. ‘‘បទុមុត្តរោ នាម ជិនោ, សព្ពលោកវិទូ មុនិ;

ឥតោ សតសហស្សម្ហិ, កប្បេ ឧប្បជ្ជិ ចក្ខុមា.

២៥២. ‘‘ឱវាទកោ វិញ្ញាបកោ, តារកោ សព្ពបាណិនំ;

ទេសនាកុសលោ ពុទ្ធោ, តារេសិ ជនតំ ពហុំ.

២៥៣. ‘‘អនុកម្បកោ ការុណិកោ, ហិតេសី សព្ពបាណិនំ;

សម្បត្តេ តិត្ថិយេ សព្ពេ, បញ្ចសីលេ បតិដ្ឋបិ.

២៥៤. ‘‘ឯវំ និរាកុលំ អាសិ, សុញ្ញតំ តិត្ថិយេហិ ច;

វិចិត្តំ អរហន្តេហិ, វសីភូតេហិ តាទិភិ.

២៥៥. ‘‘រតនានដ្ឋបញ្ញាសំ, ឧគ្គតោ សោ មហាមុនិ;

កញ្ចនគ្ឃិយសង្កាសោ, ពាត្តិំសវរលក្ខណោ.

២៥៦. ‘‘វស្សសតសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

២៥៧. ‘‘តទាហំ ហំសវតិយា, ព្រាហ្មណោ សាធុសម្មតោ;

ឧបេច្ច លោកបជ្ជោតំ, អស្សោសិំ ធម្មទេសនំ.

២៥៨. ‘‘តទា មហាបរិសតិំ, មហាបរិសសាវកំ;

ឋបេន្តំ ឯតទគ្គម្ហិ, សុត្វាន មុទិតោ អហំ.

២៥៩. ‘‘មហតា បរិវារេន, និមន្តេត្វា មហាជិនំ;

ព្រាហ្មណានំ សហស្សេន, សហទានមទាសហំ.

២៦០. ‘‘មហាទានំ ទទិត្វាន, អភិវាទិយ នាយកំ;

ឯកមន្តំ ឋិតោ ហដ្ឋោ, ឥទំ វចនមព្រវិំ.

២៦១. ‘‘‘តយិ សទ្ធាយ មេ វីរ, អធិការគុណេន ច;

បរិសា មហតី ហោតុ, និព្ពត្តស្ស តហិំ តហិំ’.

២៦២. ‘‘តទា អវោច បរិសំ, គជគជ្ជិតសុស្សរោ;

ករវីករុតោ សត្ថា, ‘ឯតំ បស្សថ ព្រាហ្មណំ.

២៦៣. ‘‘‘ហេមវណ្ណំ មហាពាហុំ, កមលាននលោចនំ;

ឧទគ្គតនុជំ ហដ្ឋំ, សទ្ធវន្តំ គុណេ មម.

២៦៤. ‘‘‘ឯស បត្ថយតេ ឋានំ [បត្ថយិ តំ ឋានំ (ស្យា.)], សីហឃោសស្ស ភិក្ខុនោ;

អនាគតម្ហិ អទ្ធានេ, លច្ឆសេ តំ មនោរថំ.

២៦៥. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

២៦៦. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

កស្សបោ នាម គោត្តេន, ហេស្សតិ សត្ថុ សាវកោ’.

២៦៧. ‘‘ឥតោ ទ្វេនវុតេ កប្បេ, អហុ សត្ថា អនុត្តរោ;

អនូបមោ អសទិសោ, ផុស្សោ លោកគ្គនាយកោ.

២៦៨. ‘‘សោ ច សព្ពំ តមំ ហន្ត្វា, វិជដេត្វា មហាជដំ;

វស្សតេ អមតំ វុដ្ឋិំ, តប្បយន្តោ សទេវកំ.

២៦៩. ‘‘តទា ហិ ពារាណសិយំ, រាជា បច្ចា អហុម្ហសេ;

ភាតរោម្ហ តយោ សព្ពេ, សំវិសដ្ឋាវ រាជិនោ.

២៧០. ‘‘វីរង្គរូបា ពលិនោ, សង្គាមេ អបរាជិតា;

តទា កុបិតបច្ចន្តោ [កុប្បតិ បច្ចន្តោ (ក.)], អម្ហេ អាហ មហីបតិ.

២៧១. ‘‘‘ឯថ គន្ត្វាន បច្ចន្តំ, សោធេត្វា អដ្ដវីពលំ;

ខេមំ វិជិរិតំ កត្វា, បុន ទេថាតិ ភាសថ’.

២៧២. ‘‘តតោ មយំ អវោចុម្ហ, យទិ ទេយ្យាសិ នាយកំ;

ឧបដ្ឋានាយ អម្ហាកំ, សាធយិស្សាម វោ តតោ.

២៧៣. ‘‘តតោ មយំ លទ្ធវរា, ភូមិបាលេន បេសិតា;

និក្ខិត្តសត្ថំ បច្ចន្តំ, កត្វា បុនរុបច្ច តំ.

២៧៤. ‘‘យាចិត្វា សត្ថុបដ្ឋានំ, រាជានំ លោកនាយកំ;

មុនិវីរំ លភិត្វាន, យាវជីវំ យជិម្ហ តំ.

២៧៥. ‘‘មហគ្ឃានិ ច វត្ថានិ, បណីតានិ រសានិ ច;

សេនាសនានិ រម្មានិ, ភេសជ្ជានិ ហិតានិ ច.

២៧៦. ‘‘ទត្វា សសង្ឃមុនិនោ [សសំឃស្ស មុនេ (សី. បី.)], ធម្មេនុប្បាទិតានិ នោ;

សីលវន្តោ ការុណិកា, ភាវនាយុត្តមានសា.

២៧៧. ‘‘សទ្ធា បរិចរិត្វាន, មេត្តចិត្តេន នាយកំ;

និព្ពុតេ តម្ហិ លោកគ្គេ, បូជំ កត្វា យថាពលំ.

២៧៨. ‘‘តតោ ចុតា សន្តុសិតំ [តាវតិំសំ (ស្យា.)], គតា តត្ថ មហាសុខំ;

អនុភូតា មយំ សព្ពេ, ពុទ្ធបូជាយិទំ ផលំ.

២៧៩. ‘‘មាយាការោ យថា រង្គេ [លទ្ធោ (ស្យា. បី.)], ទស្សេសិ វិកតិំ ពហុំ;

តថា ភវេ ភមន្តោហំ [គមេន្តោហំ (ក.), ភវន្តោហំ (ស្យា.)], វិទេហាធិបតី អហុំ.

២៨០. ‘‘គុណាចេឡស្ស វាក្យេន, មិច្ឆាទិដ្ឋិគតាសយោ;

នរកំ មគ្គមារូឡ្ហោ, រុចាយ មម ធីតុយា.

២៨១. ‘‘ឱវាទំ នាទិយិត្វាន, ព្រហ្មុនា នារទេនហំ;

ពហុធា សំសិតោ សន្តោ, ទិដ្ឋិំ ហិត្វាន បាបិកំ.

២៨២. ‘‘បូរយិត្វា វិសេសេន, ទស កម្មបថានិហំ;

ហិត្វាន ទេហមគមិំ, សគ្គំ សភវនំ យថា.

២៨៣. ‘‘បច្ឆិមេ ភវេ សម្បត្តេ, ព្រហ្មពន្ធុ អហោសហំ;

ពារាណសិយំ ផីតាយំ, ជាតោ វិប្បមហាកុលេ.

២៨៤. ‘‘មច្ចុព្យាធិជរា ភីតោ, ឱគាហេត្វា មហាវនំ [ជហិត្វាន មហាធនំ (សី.), ជហិត្វា ច មហាធនំ (បី.)];

និព្ពានំ បទមេសន្តោ, ជដិលេសុ បរិព្ពជិំ.

២៨៥. ‘‘តទា ទ្វេ ភាតរោ មយ្ហំ, បព្ពជិំសុ មយា សហ;

ឧរុវេឡាយំ មាបេត្វា, អស្សមំ និវសិំ អហំ.

២៨៦. ‘‘កស្សបោ នាម គោត្តេន, ឧរុវេឡនិវាសិកោ [ឧរុវេឡាយ និវសិំ (ស្យា.)];

តតោ មេ អាសិ បញ្ញត្តិ, ឧរុវេឡកស្សបោ ឥតិ.

២៨៧. ‘‘នទីសកាសេ ភាតា មេ, នទីកស្សបសវ្ហយោ;

អាសី សកាសនាមេន, គយាយំ គយាកស្សបោ.

២៨៨. ‘‘ទ្វេ សតានិ កនិដ្ឋស្ស, តីណិ មជ្ឈស្ស ភាតុនោ;

មម បញ្ច សតានូនា, សិស្សា សព្ពេ មមានុគា.

២៨៩. ‘‘តទា ឧបេច្ច មំ ពុទ្ធោ, កត្វាន វិវិធានិ មេ [កត្វា នានាវិធានិ មេ (សី.)];

បាដិហីរានិ លោកគ្គោ, វិនេសិ នរសារថិ.

២៩០. ‘‘សហស្សបរិវារេន, អហោសិំ ឯហិភិក្ខុកោ;

តេហេវ សហ សព្ពេហិ, អរហត្តមបាបុណិំ.

២៩១. ‘‘តេ ចេវញ្ញេ ច ពហវោ, សិស្សា មំ បរិវារយុំ;

សាសិតុញ្ច សមត្ថោហំ, តតោ មំ ឥសិសត្តមោ.

២៩២. ‘‘មហាបរិសភាវស្មិំ, ឯតទគ្គេ ឋបេសិ មំ;

អហោ ពុទ្ធេ កតំ ការំ, សផលំ មេ អជាយថ.

២៩៣. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

២៩៤. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២៩៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧរុវេឡកស្សបោ ថេរោ ឥមា គាថាយោ

អភាសិត្ថាតិ.

ឧរុវេឡកស្សបត្ថេរស្សាបទានំ អដ្ឋមំ.