៧. មហាកោដ្ឋិកត្ថេរអបទានំ

២២១. ‘‘បទុមុត្តរោ នាម ជិនោ, សព្ពលោកវិទូ មុនិ;

ឥតោ សតសហស្សម្ហិ, កប្បេ ឧប្បជ្ជិ ចក្ខុមា.

២២២. ‘‘ឱវាទកោ វិញ្ញាបកោ, តារកោ សព្ពបាណិនំ;

ទេសនាកុសលោ ពុទ្ធោ, តារេសិ ជនតំ ពហុំ.

២២៣. ‘‘អនុកម្បកោ ការុណិកោ, ហិតេសី សព្ពបាណិនំ;

សម្បត្តេ តិត្ថិយេ សព្ពេ, បញ្ចសីលេ បតិដ្ឋបិ.

២២៤. ‘‘ឯវំ និរាកុលំ អាសិ, សុញ្ញតំ តិត្ថិយេហិ ច;

វិចិត្តំ អរហន្តេហិ, វសីភូតេហិ តាទិភិ.

២២៥. ‘‘រតនានដ្ឋបញ្ញាសំ, ឧគ្គតោ សោ មហាមុនិ;

កញ្ចនគ្ឃិយសង្កាសោ, ពាត្តិំសវរលក្ខណោ.

២២៦. ‘‘វស្សសតសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

២២៧. ‘‘តទាហំ ហំសវតិយំ, ព្រាហ្មណោ វេទបារគូ;

ឧបេច្ច សព្ពលោកគ្គំ [សព្ពសារគ្គំ (សី.), សត្តបារគំ (បី.)], អស្សោសិំ ធម្មទេសនំ.

២២៨. ‘‘តទា សោ សាវកំ វីរោ, បភិន្នមតិគោចរំ;

អត្ថេ ធម្មេ និរុត្តេ ច, បដិភានេ ច កោវិទំ.

២២៩. ‘‘ឋបេសិ ឯតទគ្គម្ហិ, តំ សុត្វា មុទិតោ អហំ;

សសាវកំ ជិនវរំ, សត្តាហំ ភោជយិំ តទា.

២៣០. ‘‘ទុស្សេហច្ឆាទយិត្វាន, សសិស្សំ ពុទ្ធិសាគរំ [ពុទ្ធសាគរំ (ក.)];

និបច្ច បាទមូលម្ហិ, តំ ឋានំ បត្ថយិំ អហំ.

២៣១. ‘‘តតោ អវោច លោកគ្គោ, ‘បស្សថេតំ ទិជុត្តមំ;

វិនតំ បាទមូលេ មេ, កមលោទរសប្បភំ.

២៣២. ‘‘‘ពុទ្ធសេដ្ឋស្ស [សេដ្ឋំ ពុទ្ធស្ស (ស្យា. ក.)] ភិក្ខុស្ស, ឋានំ បត្ថយតេ អយំ;

តាយ សទ្ធាយ ចាគេន, សទ្ធម្មស្សវនេន [តេន ធម្មស្សវេន (សី. បី. ក.)] ច.

២៣៣. ‘‘‘សព្ពត្ថ សុខិតោ ហុត្វា, សំសរិត្វា ភវាភវេ;

អនាគតម្ហិ អទ្ធានេ, លច្ឆសេ តំ មនោរថំ.

២៣៤. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

២៣៥. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

កោដ្ឋិកោ នាម នាមេន, ហេស្សតិ សត្ថុ សាវកោ’.

២៣៦. ‘‘តំ សុត្វា មុទិតោ ហុត្វា, យាវជីវំ តទា ជិនំ;

មេត្តចិត្តោ បរិចរិំ, សតោ បញ្ញាសមាហិតោ.

២៣៧. ‘‘តេន កម្មវិបាកេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

២៣៨. ‘‘សតានំ តីណិក្ខត្តុញ្ច, ទេវរជ្ជមការយិំ;

សតានំ បញ្ចក្ខត្តុញ្ច, ចក្កវត្តី អហោសហំ.

២៣៩. ‘‘បទេសរជ្ជំ វិបុលំ, គណនាតោ អសង្ខិយំ;

សព្ពត្ថ សុខិតោ អាសិំ, តស្ស កម្មស្ស វាហសា.

២៤០. ‘‘ទុវេ ភវេ សំសរាមិ, ទេវត្តេ អថ មានុសេ;

អញ្ញំ គតិំ ន គច្ឆាមិ, សុចិណ្ណស្ស ឥទំ ផលំ.

២៤១. ‘‘ទុវេ កុលេ បជាយាមិ, ខត្តិយេ អថ ព្រាហ្មណេ;

‘‘នីចេ កុលេ ន ជាយាមិ, សុចិណ្ណស្ស ឥទំ ផលំ.

២៤២. ‘‘បច្ឆិមេ ភវេ សម្បត្តេ, ព្រហ្មពន្ធុ អហោសហំ;

សាវត្ថិយំ វិប្បកុលេ, បច្ចាជាតោ មហទ្ធនេ.

២៤៣. ‘‘មាតា ចន្ទវតី នាម, បិតា មេ អស្សលាយនោ;

យទា មេ បិតរំ ពុទ្ធោ, វិនយី សព្ពសុទ្ធិយា.

២៤៤. ‘‘តទា បសន្នោ សុគតេ, បព្ពជិំ អនគារិយំ;

មោគ្គល្លានោ អាចរិយោ, ឧបជ្ឈា សារិសម្ភវោ.

២៤៥. ‘‘កេសេសុ ឆិជ្ជមានេសុ, ទិដ្ឋិ ឆិន្នា សមូលិកា;

និវាសេន្តោ ច កាសាវំ, អរហត្តមបាបុណិំ.

២៤៦. ‘‘អត្ថធម្មនិរុត្តីសុ, បដិភានេ ច មេ មតិ;

បភិន្នា តេន លោកគ្គោ, ឯតទគ្គេ ឋបេសិ មំ.

២៤៧. ‘‘អសន្ទិដ្ឋំ វិយាកាសិំ, ឧបតិស្សេន បុច្ឆិតោ;

បដិសម្ភិទាសុ តេនាហំ, អគ្គោ សម្ពុទ្ធសាសនេ.

២៤៨. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

២៤៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២៥០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មហាកោដ្ឋិកោ ថេរោ ឥមា គាថាយោ

អភាសិត្ថាតិ.

មហាកោដ្ឋិកត្ថេរស្សាបទានំ សត្តមំ.