៦. ពាហិយត្ថេរអបទានំ

១៧៨. ‘‘ឥតោ សតសហស្សម្ហិ, កប្បេ ឧប្បជ្ជិ នាយកោ;

មហប្បភោ តិលោកគ្គោ, នាមេន បទុមុត្តរោ.

១៧៩. ‘‘ខិប្បាភិញ្ញស្ស ភិក្ខុស្ស, គុណំ កិត្តយតោ មុនេ;

សុត្វា ឧទគ្គចិត្តោហំ, ការំ កត្វា មហេសិនោ.

១៨០. ‘‘ទត្វា សត្តាហិកំ ទានំ, សសិស្សស្ស មុនេ អហំ;

អភិវាទិយ សម្ពុទ្ធំ, តំ ឋានំ បត្ថយិំ តទា.

១៨១. ‘‘តតោ មំ ព្យាករិ ពុទ្ធោ, ‘ឯតំ បស្សថ ព្រាហ្មណំ;

បតិតំ បាទមូលេ មេ, ចរិយំ បច្ចវេក្ខណំ [បសន្ននយនាននំ (សី.), បីនសម្បន្នវេក្ខណំ (ស្យា.), បីណំសំ បច្ចវេក្ខណំ (បី.)].

១៨២. ‘‘‘ហេមយញ្ញោបចិតង្គំ, អវទាតតនុត្តចំ;

បលម្ពពិម្ពតម្ពោដ្ឋំ, សេតតិណ្ហសមំ ទិជំ.

១៨៣. ‘‘‘គុណថាមពហុតរំ, សមុគ្គតតនូរុហំ;

គុណោឃាយតនីភូតំ, បីតិសម្ផុល្លិតាននំ.

១៨៤. ‘‘‘ឯសោ បត្ថយតេ ឋានំ, ខិប្បាភិញ្ញស្ស ភិក្ខុនោ;

អនាគតេ មហាវីរោ, គោតមោ នាម ហេស្សតិ.

១៨៥. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

ពាហិយោ នាម នាមេន, ហេស្សតិ សត្ថុ សាវកោ’.

១៨៦. ‘‘តទា ហិ តុដ្ឋោ វុដ្ឋាយ, យាវជីវំ មហាមុនេ;

ការំ កត្វា ចុតោ សគ្គំ, អគំ សភវនំ យថា.

១៨៧. ‘‘ទេវភូតោ មនុស្សោ វា, សុខិតោ តស្ស កម្មុនោ;

វាហសា សំសរិត្វាន, សម្បត្តិមនុភោមហំ.

១៨៨. ‘‘បុន កស្សបវីរស្ស, អត្ថមេន្តម្ហិ [អត្ថង្គតម្ហិ (ស្យា.)] សាសនេ;

អារុយ្ហ សេលសិខរំ, យុញ្ជិត្វា ជិនសាសនំ.

១៨៩. ‘‘វិសុទ្ធសីលោ សប្បញ្ញោ, ជិនសាសនការកោ;

តតោ ចុតា បញ្ច ជនា, ទេវលោកំ អគម្ហសេ.

១៩០. ‘‘តតោហំ ពាហិយោ ជាតោ, ភារុកច្ឆេ បុរុត្តមេ;

តតោ នាវាយ បក្ខន្ទោ [បក្ខន្តោ (សី.), បក្កន្តោ (បី.)], សាគរំ អប្បសិទ្ធិយំ [អត្ថសិទ្ធិយំ (ក.)].

១៩១. ‘‘តតោ នាវា អភិជ្ជិត្ថ, គន្ត្វាន កតិបាហកំ;

តទា ភីសនកេ ឃោរេ, បតិតោ មករាករេ.

១៩២. ‘‘តទាហំ វាយមិត្វាន, សន្តរិត្វា មហោទធិំ;

សុប្បាទបដ្ដនវរំ [សុប្បារបដ្ដនវរំ (សី. បី.)], សម្បត្តោ មន្ទវេធិតោ [មន្ទមេធិកោ (សី.), មន្ទវេទិតោ (ស្យា.), មទ្ទវេរតំ (ក.)].

១៩៣. ‘‘ទារុចីរំ និវាសេត្វា, គាមំ បិណ្ឌាយ បាវិសិំ;

តទាហ សោ ជនោ តុដ្ឋោ, អរហាយមិធាគតោ.

១៩៤. ‘‘ឥមំ អន្នេន បានេន, វត្ថេន សយនេន ច;

ភេសជ្ជេន ច សក្កត្វា, ហេស្សាម សុខិតា មយំ.

១៩៥. ‘‘បច្ចយានំ តទា លាភី, តេហិ សក្កតបូជិតោ;

អរហាហន្តិ សង្កប្បំ, ឧប្បាទេសិំ អយោនិសោ.

១៩៦. ‘‘តតោ មេ ចិត្តមញ្ញាយ, ចោទយី បុព្ពទេវតា;

‘ន ត្វំ ឧបាយមគ្គញ្ញូ, កុតោ ត្វំ អរហា ភវេ’.

១៩៧. ‘‘ចោទិតោ តាយ សំវិគ្គោ, តទាហំ បរិបុច្ឆិ តំ;

‘កេ វា ឯតេ កុហិំ លោកេ, អរហន្តោ នរុត្តមា.

១៩៨. ‘‘‘សាវត្ថិយំ កោសលមន្ទិរេ ជិនោ, បហូតបញ្ញោ វរភូរិមេធសោ;

សោ សក្យបុត្តោ អរហា អនាសវោ, ទេសេតិ ធម្មំ អរហត្តបត្តិយា.

១៩៩. ‘‘‘តទស្ស សុត្វា វចនំ សុបីណិតោ [បីណិត្វា (ក.)], និធិំវ លទ្ធា កបណោតិ វិម្ហិតោ;

ឧទគ្គចិត្តោ អរហត្តមុត្តមំ, សុទស្សនំ ទដ្ឋុមនន្តគោចរំ.

២០០. ‘‘‘តទា តតោ និក្ខមិត្វាន សត្ថុនោ [និក្ខមិតុន សត្ថុវរំ (សី.)], សទា ជិនំ បស្សាមិ វិមលាននំ [បរាជិនំ បស្សាមិ កមលាននំ (ក.)];

ឧបេច្ច រម្មំ វិជិតវ្ហយំ វនំ, ទិជេ អបុច្ឆិំ កុហិំ លោកនន្ទនោ.

២០១. ‘‘‘តតោ អវោចុំ នរទេវវន្ទិតោ, បុរំ បវិដ្ឋោ អសនេសនាយ សោ;

សសោវ [បច្ចេហិ (សី. ស្យា.)] ខិប្បំ មុនិទស្សនុស្សុកោ, ឧបេច្ច វន្ទាហិ តមគ្គបុគ្គលំ’.

២០២. ‘‘តតោហំ តុវដំ គន្ត្វា, សាវត្ថិំ បុរមុត្តមំ;

វិចរន្តំ តមទ្ទក្ខិំ, បិណ្ឌត្ថំ អបិហាគិធំ.

២០៣. ‘‘បត្តបាណិំ អលោលក្ខំ, បាចយន្តំ បីតាករំ [ភាជយន្តំ វិយាមតំ (សី.), ជោតយន្តំ ឥធាមតំ (ស្យា.), ភាជយន្តំ ឥទំមតំ (បី.)];

សិរីនិលយសង្កាសំ, រវិទិត្តិហរាននំ.

២០៤. ‘‘តំ សមេច្ច និបច្ចាហំ, ឥទំ វចនមព្រវិំ;

‘កុបថេ វិប្បនដ្ឋស្ស, សរណំ ហោហិ គោតម.

២០៥. ‘‘‘បាណសន្តារណត្ថាយ, បិណ្ឌាយ វិចរាមហំ;

ន តេ ធម្មកថាកាលោ, ឥច្ចាហ មុនិសត្តមោ’.

២០៦. ‘‘តទា បុនប្បុនំ ពុទ្ធំ, អាយាចិំ ធម្មលាលសោ;

យោ មេ ធម្មមទេសេសិ, គម្ភីរំ សុញ្ញតំ បទំ.

២០៧. ‘‘តស្ស ធម្មំ សុណិត្វាន, បាបុណិំ អាសវក្ខយំ;

បរិក្ខីណាយុកោ សន្តោ, អហោ សត្ថានុកម្បកោ.

២០៨. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

២០៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២១០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ.

២១១. ‘‘ឯវំ ថេរោ វិយាកាសិ, ពាហិយោ ទារុចីរិយោ;

សង្ការកូដេ បតិតោ, ភូតាវិដ្ឋាយ គាវិយា.

២១២. ‘‘អត្តនោ បុព្ពចរិយំ, កិត្តយិត្វា មហាមតិ;

បរិនិព្ពាយិ សោ ថេរោ [វីរោ (សី.), ធីរោ (ស្យា.)], សាវត្ថិយំ បុរុត្តមេ.

២១៣. ‘‘នគរា និក្ខមន្តោ តំ, ទិស្វាន ឥសិសត្តមោ;

ទារុចីរធរំ ធីរំ, ពាហិយំ ពាហិតាគមំ.

២១៤. ‘‘ភូមិយំ បតិតំ ទន្តំ, ឥន្ទកេតូវ បាតិតំ;

គតាយុំ សុក្ខកិលេសំ [គតាយុ សំគតក្លេសំ (សី. បី.), តទាយុ សង្កតាលេសំ (ក.)], ជិនសាសនការកំ.

២១៥. ‘‘តតោ អាមន្តយី សត្ថា, សាវកេ សាសនេ រតេ;

‘គណ្ហថ នេត្វា [ហុត្វា (ស្យា. បី. ក.)] ឈាបេថ, តនុំ សព្រហ្មចារិនោ.

២១៦. ‘‘‘ថូបំ ករោថ បូជេថ, និព្ពុតោ សោ មហាមតិ;

ខិប្បាភិញ្ញានមេសគ្គោ, សាវកោ មេ វចោករោ.

២១៧. ‘‘‘សហស្សមបិ ចេ គាថា, អនត្ថបទសញ្ហិតា;

ឯកំ គាថាបទំ សេយ្យោ, យំ សុត្វា ឧបសម្មតិ.

២១៨. ‘‘‘យត្ថ អាបោ ច បថវី, តេជោ វាយោ ន គាធតិ;

ន តត្ថ សុក្កា ជោតន្តិ, អាទិច្ចោ ន បកាសតិ.

២១៩. ‘‘‘ន តត្ថ ចន្ទិមា ភាតិ, តមោ តត្ថ ន វិជ្ជតិ;

យទា ច អត្តនា វេទិ, មុនិមោនេន ព្រាហ្មណោ.

២២០. ‘‘‘អថ រូបា អរូបា ច, សុខទុក្ខា វិមុច្ចតិ’;

ឥច្ចេវំ អភណី នាថោ, តិលោកសរណោ មុនិ’’.

ឥត្ថំ សុទំ អាយស្មា ពាហិយោ ថេរោ ឥមា គាថាយោ

អភាសិត្ថាតិ.

ពាហិយត្ថេរស្សាបទានំ ឆដ្ឋំ.