៥. កុមារកស្សបត្ថេរអបទានំ

១៥០. ‘‘ឥតោ សតសហស្សម្ហិ, កប្បេ ឧប្បជ្ជិ នាយកោ;

សព្ពលោកហិតោ វីរោ, បទុមុត្តរនាមកោ.

១៥១. ‘‘តទាហំ ព្រាហ្មណោ ហុត្វា, វិស្សុតោ វេទបារគូ;

ទិវាវិហារំ វិចរំ, អទ្ទសំ លោកនាយកំ.

១៥២. ‘‘ចតុសច្ចំ បកាសេន្តំ, ពោធយន្តំ សទេវកំ;

វិចិត្តកថិកានគ្គំ, វណ្ណយន្តំ មហាជនេ.

១៥៣. ‘‘តទា មុទិតចិត្តោហំ, និមន្តេត្វា តថាគតំ;

នានារត្តេហិ វត្ថេហិ, អលង្ករិត្វាន មណ្ឌបំ.

១៥៤. ‘‘នានារតនបជ្ជោតំ, សសង្ឃំ ភោជយិំ តហិំ;

ភោជយិត្វាន សត្តាហំ, នានគ្គរសភោជនំ.

១៥៥. ‘‘នានាចិត្តេហិ [នានាវណ្ណេហិ (សី.)] បុប្ផេហិ, បូជយិត្វា សសាវកំ [មហាវីរំ (ក.)];

និបច្ច បាទមូលម្ហិ, តំ ឋានំ បត្ថយិំ អហំ.

១៥៦. ‘‘តទា មុនិវរោ អាហ, ករុណេករសាសយោ [ករុណោ ករុណាលយោ (ស្យា.)];

‘បស្សថេតំ ទិជវរំ, បទុមាននលោចនំ.

១៥៧. ‘‘‘បីតិបាមោជ្ជពហុលំ, សមុគ្គតតនូរុហំ;

ហាសម្ហិតវិសាលក្ខំ, មម សាសនលាលសំ.

១៥៨. ‘‘‘បតិតំ បាទមូលេ មេ, ឯកាវត្ថសុមានសំ [ឯកវត្ថំ សុមានសំ (ស្យា. ក.)];

ឯស បត្ថេតិ តំ ឋានំ, វិចិត្តកថិកត្តនំ [វិចិត្តកថិកត្តទំ (សី. បី.)].

១៥៩. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

១៦០. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

កុមារកស្សបោ នាម, ហេស្សតិ សត្ថុ សាវកោ.

១៦១. ‘‘‘វិចិត្តបុប្ផទុស្សានំ, រតនានញ្ច វាហសា;

វិចិត្តកថិកានំ សោ, អគ្គតំ បាបុណិស្សតិ’.

១៦២. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

១៦៣. ‘‘បរិព្ភមំ ភវាភវេ [ភវាកាសេ (សី. បី.)], រង្គមជ្ឈេ យថា នដោ;

សាខមិគត្រជោ ហុត្វា, មិគិយា កុច្ឆិមោក្កមិំ.

១៦៤. ‘‘តទា មយិ កុច្ឆិគតេ, វជ្ឈវារោ ឧបដ្ឋិតោ;

សាខេន ចត្តា មេ មាតា, និគ្រោធំ សរណំ គតា.

១៦៥. ‘‘តេន សា មិគរាជេន, មរណា បរិមោចិតា;

បរិច្ចជិត្វា សបាណំ [សំបាណំ (សី. បី.)], មមេវំ ឱវទី តទា.

១៦៦. ‘‘‘និគ្រោធមេវ សេវេយ្យ, ន សាខមុបសំវសេ;

និគ្រោធស្មិំ មតំ សេយ្យោ, យញ្ចេ សាខម្ហិ ជីវិតំ’.

១៦៧. ‘‘តេនានុសិដ្ឋា មិគយូថបេន, អហញ្ច មាតា ច តថេតរេ ច [ចិតរេ ច (ស្យា.), តស្សោវាទេន (បី.), ចិតរេ ច តស្សោវាទំ (ក.)];

អាគម្ម រម្មំ តុសិតាធិវាសំ, គតា បវាសំ សឃរំ យថេវ.

១៦៨. ‘‘បុនោ កស្សបវីរស្ស, អត្ថមេន្តម្ហិ សាសនេ;

អារុយ្ហ សេលសិខរំ, យុញ្ជិត្វា ជិនសាសនំ.

១៦៩. ‘‘ឥទានាហំ រាជគហេ, ជាតោ សេដ្ឋិកុលេ អហុំ;

អាបន្នសត្តា មេ មាតា, បព្ពជិ អនគារិយំ.

១៧០. ‘‘សគព្ភំ តំ វិទិត្វាន, ទេវទត្តមុបានយុំ;

សោ អវោច ‘វិនាសេថ, បាបិកំ ភិក្ខុនិំ ឥមំ’.

១៧១. ‘‘ឥទានិបិ មុនិន្ទេន, ជិនេន អនុកម្បិតា;

សុខិនី អជនី មយ្ហំ, មាតា ភិក្ខុនុបស្សយេ.

១៧២. ‘‘តំ វិទិត្វា មហីបាលោ, កោសលោ មំ អបោសយិ;

កុមារបរិហារេន, នាមេនាហញ្ច កស្សបោ.

១៧៣. ‘‘មហាកស្សបមាគម្ម, អហំ កុមារកស្សបោ;

វម្មិកសទិសំ កាយំ, សុត្វា ពុទ្ធេន ទេសិតំ.

១៧៤. ‘‘តតោ ចិត្តំ វិមុច្ចិ មេ, អនុបាទាយ សព្ពសោ;

បាយាសិំ ទមយិត្វាហំ, ឯតទគ្គមបាបុណិំ.

១៧៥. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១៧៦. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៧៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កុមារកស្សបោ ថេរោ ឥមា គាថាយោ

អភាសិត្ថាតិ.

កុមារកស្សបត្ថេរស្សាបទានំ បញ្ចមំ.

ចតុវីសតិមំ ភាណវារំ.