៤. ទព្ពមល្លបុត្តត្ថេរអបទានំ

១០៨. ‘‘បទុមុត្តរោ នាម ជិនោ, សព្ពលោកវិទូ មុនិ;

ឥតោ សតសហស្សម្ហិ, កប្បេ ឧប្បជ្ជិ ចក្ខុមា.

១០៩. ‘‘ឱវាទកោ វិញ្ញាបកោ, តារកោ សព្ពបាណិនំ;

ទេសនាកុសលោ ពុទ្ធោ, តារេសិ ជនតំ ពហុំ.

១១០. ‘‘អនុកម្បកោ ការុណិកោ, ហិតេសី សព្ពបាណិនំ;

សម្បត្តេ តិត្ថិយេ សព្ពេ, បញ្ចសីលេ បតិដ្ឋបិ [បតិដ្ឋហិ (ស្យា. ក.)].

១១១. ‘‘ឯវំ និរាកុលំ អាសិ, សុញ្ញតំ [សុញ្ញកំ (សី.) ឯវមុបរិបិ] តិត្ថិយេហិ ច;

វិចិត្តំ អរហន្តេហិ, វសីភូតេហិ តាទិភិ.

១១២. ‘‘រតនានដ្ឋបញ្ញាសំ, ឧគ្គតោ សោ មហាមុនិ;

កញ្ចនគ្ឃិយសង្កាសោ, ពាត្តិំសវរលក្ខណោ.

១១៣. ‘‘វស្សសតសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

១១៤. ‘‘តទាហំ ហំសវតិយំ, សេដ្ឋិបុត្តោ មហាយសោ;

ឧបេត្វា លោកបជ្ជោតំ, អស្សោសិំ ធម្មទេសនំ.

១១៥. ‘‘សេនាសនានិ ភិក្ខូនំ, បញ្ញាបេន្តំ សសាវកំ;

កិត្តយន្តស្ស វចនំ, សុណិត្វា មុទិតោ អហំ.

១១៦. ‘‘អធិការំ សសង្ឃស្ស, កត្វា តស្ស មហេសិនោ;

និបច្ច សិរសា បាទេ, តំ ឋានមភិបត្ថយិំ.

១១៧. ‘‘តទាហ ស មហាវីរោ, មម កម្មំ បកិត្តយំ;

‘យោ សសង្ឃមភោជេសិ, សត្តាហំ លោកនាយកំ.

១១៨. ‘‘‘សោយំ កមលបត្តក្ខោ, សីហំសោ កនកត្តចោ;

មម បាទមូលេ និបតិ [បតិតោ (បី.)], បត្ថយំ ឋានមុត្តមំ.

១១៩. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

១២០. ‘‘‘សាវកោ តស្ស ពុទ្ធស្ស, ទព្ពោ នាមេន វិស្សុតោ;

សេនាសនបញ្ញាបកោ, អគ្គោ ហេស្សតិយំ តទា’.

១២១. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

១២២. ‘‘សតានំ តីណិក្ខត្តុញ្ច, ទេវរជ្ជមការយិំ;

សតានំ បញ្ចក្ខត្តុញ្ច, ចក្កវត្តី អហោសហំ.

១២៣. ‘‘បទេសរជ្ជំ វិបុលំ, គណនាតោ អសង្ខិយំ;

សព្ពត្ថ សុខិតោ អាសិំ, តស្ស កម្មស្ស វាហសា.

១២៤. ‘‘ឯកនវុតិតោ កប្បេ, វិបស្សី នាម នាយកោ;

ឧប្បជ្ជិ ចារុទស្សនោ [ចារុនយនោ (សី. ស្យា. បី.)], សព្ពធម្មវិបស្សកោ.

១២៥. ‘‘ទុដ្ឋចិត្តោ ឧបវទិំ, សាវកំ តស្ស តាទិនោ;

សព្ពាសវបរិក្ខីណំ, សុទ្ធោតិ ច វិជានិយ.

១២៦. ‘‘តស្សេវ នរវីរស្ស, សាវកានំ មហេសិនំ;

សលាកញ្ច គហេត្វាន [សលាកំ បគ្គហេត្វាន (សី. បី.)], ខីរោទនមទាសហំ.

១២៧. ‘‘ឥមម្ហិ ភទ្ទកេ កប្បេ, ព្រហ្មពន្ធុ មហាយសោ;

កស្សបោ នាម គោត្តេន, ឧប្បជ្ជិ វទតំ វរោ.

១២៨. ‘‘សាសនំ ជោតយិត្វាន, អភិភុយ្យ កុតិត្ថិយេ;

វិនេយ្យេ វិនយិត្វាវ, និព្ពុតោ សោ សសាវកោ.

១២៩. ‘‘សសិស្សេ និព្ពុតេ នាថេ, អត្ថមេន្តម្ហិ សាសនេ;

ទេវា កន្ទិំសុ សំវិគ្គា, មុត្តកេសា រុទម្មុខា.

១៣០. ‘‘និព្ពាយិស្សតិ ធម្មក្ខោ, ន បស្សិស្សាម សុព្ពតេ;

ន សុណិស្សាម សទ្ធម្មំ, អហោ នោ អប្បបុញ្ញតា.

១៣១. ‘‘តទាយំ បថវី សព្ពា, អចលា សា ចលាចលា [ចលាចលី (សី.), បុលាបុលី (ស្យា.)];

សាគរោ ច សសោកោវ, វិនទី ករុណំ គិរំ.

១៣២. ‘‘ចតុទ្ទិសា ទុន្ទុភិយោ, នាទយិំសុ អមានុសា;

សមន្តតោ អសនិយោ, ផលិំសុ ច ភយាវហា.

១៣៣. ‘‘ឧក្កា បតិំសុ នភសា, ធូមកេតុ ច ទិស្សតិ;

សធូមា ជាលវដ្ដា ច [សព្ពថលជសត្តា ច (សី.)], រវិំសុ ករុណំ មិគា.

១៣៤. ‘‘ឧប្បាទេ ទារុណេ ទិស្វា, សាសនត្ថង្គសូចកេ;

សំវិគ្គា ភិក្ខវោ សត្ត, ចិន្តយិម្ហ មយំ តទា.

១៣៥. ‘‘សាសនេន វិនាម្ហាកំ, ជីវិតេន អលំ មយំ;

បវិសិត្វា មហារញ្ញំ, យុញ្ជាម ជិនសាសនំ.

១៣៦. ‘‘អទ្ទសម្ហ តទារញ្ញេ, ឧព្ពិទ្ធំ សេលមុត្តមំ;

និស្សេណិយា តមារុយ្ហ, និស្សេណិំ បាតយិម្ហសេ.

១៣៧. ‘‘តទា ឱវទិ នោ ថេរោ, ពុទ្ធុប្បាទោ សុទុល្លភោ;

សទ្ធាតិទុល្លភា លទ្ធា, ថោកំ សេសញ្ច សាសនំ.

១៣៨. ‘‘និបតន្តិ ខណាតីតា, អនន្តេ ទុក្ខសាគរេ;

តស្មា បយោគោ កត្តព្ពោ, យាវ ឋាតិ មុនេ មតំ [យាវ តិដ្ឋតិ សាសនំ (ស្យា.)].

១៣៩. ‘‘អរហា អាសិ សោ ថេរោ, អនាគាមី តទានុគោ;

សុសីលា ឥតរេ យុត្តា, ទេវលោកំ អគម្ហសេ.

១៤០. ‘‘និព្ពុតោ តិណ្ណសំសារោ, សុទ្ធាវាសេ ច ឯកកោ;

អហញ្ច បក្កុសាតិ ច, សភិយោ ពាហិយោ តថា.

១៤១. ‘‘កុមារកស្សបោ ចេវ, តត្ថ តត្ថូបគា មយំ;

សំសារពន្ធនា មុត្តា, គោតមេនានុកម្បិតា.

១៤២. ‘‘មល្លេសុ កុសិនារាយំ, ជាតោ គព្ភេវ មេ សតោ;

មាតា មតា ចិតារុឡ្ហា, តតោ និប្បតិតោ អហំ.

១៤៣. ‘‘បតិតោ ទព្ពបុញ្ជម្ហិ, តតោ ទព្ពោតិ វិស្សុតោ;

ព្រហ្មចារីពលេនាហំ, វិមុត្តោ សត្តវស្សិកោ.

១៤៤. ‘‘ខីរោទនពលេនាហំ, បញ្ចហង្គេហុបាគតោ;

ខីណាសវោបវាទេន, បាបេហិ ពហុចោទិតោ.

១៤៥. ‘‘ឧភោ បុញ្ញញ្ច បាបញ្ច, វីតិវត្តោម្ហិ ទានិហំ;

បត្វាន បរមំ សន្តិំ, វិហរាមិ អនាសវោ.

១៤៦. ‘‘សេនាសនំ បញ្ញាបយិំ, ហាសយិត្វាន សុព្ពតេ;

ជិនោ តស្មិំ គុណេ តុដ្ឋោ, ឯតទគ្គេ ឋបេសិ មំ.

១៤៧. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១៤៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៤៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ទព្ពមល្លបុត្តោ ថេរោ ឥមា គាថាយោ

អភាសិត្ថាតិ.

ទព្ពមល្លបុត្តត្ថេរស្សាបទានំ ចតុត្ថំ.