៣. មហាកប្បិនត្ថេរអបទានំ

៦៦. ‘‘បទុមុត្តរោ នាម ជិនោ, សព្ពធម្មាន បារគូ;

ឧទិតោ អជដាកាសេ [ជគទាកាសេ (សី.), ជលទាកាសេ (បី.)], រវីវ សរទម្ពរេ.

៦៧. ‘‘វចនាភាយ ពោធេតិ, វេនេយ្យបទុមានិ សោ;

កិលេសបង្កំ សោសេតិ, មតិរំសីហិ នាយកោ.

៦៨. ‘‘តិត្ថិយានំ យសេ [យសោ (សី. បី.)] ហន្តិ, ខជ្ជោតាភា យថា រវិ;

សច្ចត្ថាភំ បកាសេតិ, រតនំវ ទិវាករោ.

៦៩. ‘‘គុណានំ អាយតិភូតោ, រតនានំវ សាគរោ;

បជ្ជុន្នោរិវ ភូតានិ, ធម្មមេឃេន វស្សតិ.

៧០. ‘‘អក្ខទស្សោ តទា អាសិំ, នគរេ ហំសសវ្ហយេ;

ឧបេច្ច ធម្មមស្សោសិំ, ជលជុត្តមនាមិនោ.

៧១. ‘‘ឱវាទកស្ស ភិក្ខូនំ, សាវកស្ស កតាវិនោ;

គុណំ បកាសយន្តស្ស, តប្បយន្តស្ស [តោសយន្តស្ស (សី.), ហាសយន្តស្ស (ស្យា.), វាសយន្តស្ស (បី.)] មេ មនំ.

៧២. ‘‘សុត្វា បតីតោ សុមនោ, និមន្តេត្វា តថាគតំ;

សសិស្សំ ភោជយិត្វាន, តំ ឋានមភិបត្ថយិំ.

៧៣. ‘‘តទា ហំសសមភាគោ, ហំសទុន្ទុភិនិស្សនោ [ហំសទុន្ទុភិសុស្សរោ (សី.)];

បស្សថេតំ មហាមត្តំ, វិនិច្ឆយវិសារទំ.

៧៤. ‘‘បតិតំ បាទមូលេ មេ, សមុគ្គតតនូរុហំ;

ជីមូតវណ្ណំ បីណំសំ, បសន្ននយនាននំ.

៧៥. ‘‘បរិវារេន មហតា, រាជយុត្តំ មហាយសំ;

ឯសោ កតាវិនោ ឋានំ, បត្ថេតិ មុទិតាសយោ.

៧៦. ‘‘‘ឥមិនា បណិបាតេន, ចាគេន បណិធីហិ ច [បិណ្ឌបាតេន, ចេតនា បណិធីហិ ច (សី.)];

កប្បសតសហស្សានិ, នុបបជ្ជតិ ទុគ្គតិំ.

៧៧. ‘‘‘ទេវេសុ ទេវសោភគ្គំ, មនុស្សេសុ មហន្តតំ;

អនុភោត្វាន សេសេន [អភុត្វាវ សេសេន (សី.), អនុភោត្វាវ សេសេន (ស្យា.)], និព្ពានំ បាបុណិស្សតិ.

៧៨. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៧៩. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

កប្បិនោ នាម នាមេន, ហេស្សតិ សត្ថុ សាវកោ’.

៨០. ‘‘តតោហំ សុកតំ ការំ, កត្វាន ជិនសាសនេ;

ជហិត្វា មានុសំ ទេហំ, តុសិតំ អគមាសហំ.

៨១. ‘‘ទេវមានុសរជ្ជានិ, សតសោ អនុសាសិយ;

ពារាណសិយមាសន្នេ, ជាតោ កេនិយជាតិយំ.

៨២. ‘‘សហស្សបរិវារេន [សតសហស្សបរិវារោ (ស្យា.)], សបជាបតិកោ អហំ;

បញ្ច បច្ចេកពុទ្ធានំ, សតានិ សមុបដ្ឋហិំ.

៨៣. ‘‘តេមាសំ ភោជយិត្វាន, បច្ឆាទម្ហ តិចីវរំ;

តតោ ចុតា មយំ សព្ពេ, អហុម្ហ តិទសូបគា.

៨៤. ‘‘បុនោ សព្ពេ មនុស្សត្តំ, អគមិម្ហ តតោ ចុតា;

កុក្កុដម្ហិ បុរេ ជាតា, ហិមវន្តស្ស បស្សតោ.

៨៥. ‘‘កប្បិនោ នាមហំ អាសិំ, រាជបុត្តោ មហាយសោ;

សេសាមច្ចកុលេ ជាតា, មមេវ បរិវារយុំ.

៨៦. ‘‘មហារជ្ជសុខំ បត្តោ, សព្ពកាមសមិទ្ធិមា;

វាណិជេហិ សមក្ខាតំ, ពុទ្ធុប្បាទមហំ សុណិំ.

៨៧. ‘‘‘ពុទ្ធោ លោកេ សមុប្បន្នោ, អសមោ ឯកបុគ្គលោ;

សោ បកាសេតិ សទ្ធម្មំ, អមតំ សុខមុត្តមំ.

៨៨. ‘‘‘សុយុត្តា តស្ស សិស្សា ច, សុមុត្តា ច អនាសវា’;

‘‘សុត្វា នេសំ សុវចនំ, សក្ករិត្វាន វាណិជេ.

៨៩. ‘‘បហាយ រជ្ជំ សាមច្ចោ, និក្ខមិំ ពុទ្ធមាមកោ;

នទិំ ទិស្វា មហាចន្ទំ, បូរិតំ សមតិត្តិកំ.

៩០. ‘‘អប្បតិដ្ឋំ អនាលម្ពំ, ទុត្តរំ សីឃវាហិនិំ;

គុណំ សរិត្វា ពុទ្ធស្ស, សោត្ថិនា សមតិក្កមិំ.

៩១. ‘‘‘ភវសោតំ សចេ ពុទ្ធោ, តិណ្ណោ លោកន្តគូ វិទូ [វិភូ (ក.)];

ឯតេន សច្ចវជ្ជេន, គមនំ មេ សមិជ្ឈតុ.

៩២. ‘‘‘យទិ សន្តិគមោ មគ្គោ, មោក្ខោ ចច្ចន្តិកំ [មោក្ខទំ សន្តិកំ (ស្យា.)] សុខំ;

ឯតេន សច្ចវជ្ជេន, គមនំ មេ សមិជ្ឈតុ.

៩៣. ‘‘‘សង្ឃោ ចេ តិណ្ណកន្តារោ, បុញ្ញក្ខេត្តោ អនុត្តរោ;

ឯតេន សច្ចវជ្ជេន, គមនំ មេ សមិជ្ឈតុ’.

៩៤. ‘‘សហ កតេ សច្ចវរេ, មគ្គា អបគតំ ជលំ;

តតោ សុខេន ឧត្តិណ្ណោ, នទីតីរេ មនោរមេ.

៩៥. ‘‘និសិន្នំ អទ្ទសំ ពុទ្ធំ, ឧទេន្តំវ បភង្ករំ;

ជលន្តំ ហេមសេលំវ, ទីបរុក្ខំវ ជោតិតំ.

៩៦. ‘‘សសិំវ តារាសហិតំ, សាវកេហិ បុរក្ខតំ;

វាសវំ វិយ វស្សន្តំ, ទេសនាជលទន្តរំ [ទេវេន ជលនន្ទនំ (ស្យា. បី.)].

៩៧. ‘‘វន្ទិត្វាន សហាមច្ចោ, ឯកមន្តមុបាវិសិំ;

តតោ នោ អាសយំ [តតោ អជ្ឈាសយំ (ស្យា.)] ញត្វា, ពុទ្ធោ ធម្មមទេសយិ.

៩៨. ‘‘សុត្វាន ធម្មំ វិមលំ, អវោចុម្ហ មយំ ជិនំ;

‘បព្ពាជេហិ មហាវីរ, និព្ពិន្ទាម្ហ [និព្ពិន្នាម្ហ (សី. បី.), ឱតិណ្ណម្ហ (ស្យា.)] មយំ ភវេ’.

៩៩. ‘‘‘ស្វក្ខាតោ ភិក្ខវេ ធម្មោ, ទុក្ខន្តករណាយ វោ;

ចរថ ព្រហ្មចរិយំ’, ឥច្ចាហ មុនិសត្តមោ.

១០០. ‘‘សហ វាចាយ សព្ពេបិ, ភិក្ខុវេសធរា មយំ;

អហុម្ហ ឧបសម្បន្នា, សោតាបន្នា ច សាសនេ.

១០១. ‘‘តតោ ជេតវនំ គន្ត្វា, អនុសាសិ វិនាយកោ;

អនុសិដ្ឋោ ជិនេនាហំ, អរហត្តមបាបុណិំ.

១០២. ‘‘តតោ ភិក្ខុសហស្សានិ [ភិក្ខុសហស្សំ តំ (សី. បី.)], អនុសាសិមហំ តទា;

មមានុសាសនករា, តេបិ អាសុំ អនាសវា.

១០៣. ‘‘ជិនោ តស្មិំ គុណេ តុដ្ឋោ, ឯតទគ្គេ ឋបេសិ មំ;

ភិក្ខុឱវាទកានគ្គោ, កប្បិនោតិ មហាជនេ.

១០៤. ‘‘សតសហស្សេ កតំ កម្មំ, ផលំ ទស្សេសិ មេ ឥធ;

បមុត្តោ សរវេគោវ, កិលេសេ ឈាបយិំ [ឈាបយី (សី.)] មម.

១០៥. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១០៦. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១០៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មហាកប្បិនោ ថេរោ ឥមា គាថាយោ

អភាសិត្ថាតិ.

មហាកប្បិនត្ថេរស្សាបទានំ តតិយំ.