១០. បិយាលផលទាយកត្ថេរអបទានំ

១០៤. ‘‘មិគលុទ្ទោ បុរេ អាសិំ, វិបិនេ វិចរំ តទា;

អទ្ទសំ វិរជំ ពុទ្ធំ, សព្ពធម្មាន បារគុំ.

១០៥. ‘‘បិយាលផលមាទាយ, ពុទ្ធសេដ្ឋស្សទាសហំ;

បុញ្ញក្ខេត្តស្ស វីរស្ស, បសន្នោ សេហិ បាណិភិ.

១០៦. ‘‘ឯកតិំសេ ឥតោ កប្បេ, យំ ផលំ អទទិំ តទា;

ទុគ្គតិំ នាភិជានាមិ, ផលទានស្សិទំ ផលំ.

១០៧. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១០៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១០៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បិយាលផលទាយកោ ថេរោ ឥមា

គាថាយោ អភាសិត្ថាតិ.

បិយាលផលទាយកត្ថេរស្សាបទានំ ទសមំ.

កិង្កណិបុប្ផវគ្គោ បញ្ញាសមោ.

តស្សុទ្ទានំ –

កិង្កណី បំសុកូលញ្ច, កោរណ្ឌមថ កិំសុកំ;

ឧបឌ្ឍទុស្សី ឃតទោ, ឧទកំ ថូបការកោ.

នឡការី ច នវមោ, បិយាលផលទាយកោ;

សតមេកញ្ច គាថានំ, នវកញ្ច តទុត្តរិ.

អថ វគ្គុទ្ទានំ –

មេត្តេយ្យវគ្គោ ភទ្ទាលិ, សកិំសម្មជ្ជកោបិ ច;

ឯកវិហារី វិភីតកី, ជគតី សាលបុប្ផិយោ.

នឡាគារំ បំសុកូលំ, កិង្កណិបុប្ផិយោ តថា;

អសីតិ ទ្វេ ច គាថាយោ, ចតុទ្ទសសតានិ ច.

មេត្តេយ្យវគ្គទសកំ.