៥០. កិង្កណិបុប្ផវគ្គោ

១. តិកិង្កណិបុប្ផិយត្ថេរអបទានំ

១. ‘‘កណិការំវ ជោតន្តំ, និសិន្នំ បព្ពតន្តរេ;

អទ្ទសំ វិរជំ ពុទ្ធំ, វិបស្សិំ លោកនាយកំ.

២. ‘‘តីណិ កិង្កណិបុប្ផានិ, បគ្គយ្ហ អភិរោបយិំ;

សម្ពុទ្ធមភិបូជេត្វា, គច្ឆាមិ ទក្ខិណាមុខោ.

៣. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៤. ‘‘ឯកនវុតិតោ កប្បេ, យំ ពុទ្ធមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៥. ‘‘កិលេសា ឈាបិតា មយ្ហំ, ភវា សព្ពេ សមូហតា;

នាគោវ ពន្ធនំ ឆេត្វា, វិហរាមិ អនាសវោ.

៦. ‘‘ស្វាគតំ វត មេ អាសិ, មម ពុទ្ធស្ស សន្តិកេ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

៧. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា តិកិង្កណិបុប្ផិយោ ថេរោ ឥមា

គាថាយោ អភាសិត្ថាតិ.

តិកិង្កណិបុប្ផិយត្ថេរស្សាបទានំ បឋមំ.

២. បំសុកូលបូជកត្ថេរអបទានំ

៨. ‘‘ហិមវន្តស្សាវិទូរេ, ឧទង្គណោ នាម បព្ពតោ;

តត្ថទ្ទសំ បំសុកូលំ, ទុមគ្គម្ហិ វិលម្ពិតំ.

៩. ‘‘តីណិ កិង្កណិបុប្ផានិ, ឱចិនិត្វានហំ តទា;

ហដ្ឋោ ហដ្ឋេន ចិត្តេន, បំសុកូលមបូជយិំ.

១០. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

១១. ‘‘ឯកនវុតិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, បូជិត្វា អរហទ្ធជំ.

១២. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១៣. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បំសុកូលបូជកោ ថេរោ ឥមា គាថាយោ

អភាសិត្ថាតិ.

បំសុកូលបូជកត្ថេរស្សាបទានំ ទុតិយំ.

៣. កោរណ្ឌបុប្ផិយត្ថេរអបទានំ

១៥. ‘‘វនកម្មិកោ បុរេ អាសិំ, បិតុមាតុមតេនហំ [បិតុបេតាមហេនហំ (សី. ស្យា. បី.)];

បសុមារេន ជីវាមិ, កុសលំ មេ ន វិជ្ជតិ.

១៦. ‘‘មម អាសយសាមន្តា, តិស្សោ លោកគ្គនាយកោ;

បទានិ តីណិ ទស្សេសិ, អនុកម្បាយ ចក្ខុមា.

១៧. ‘‘អក្កន្តេ ច បទេ ទិស្វា, តិស្សនាមស្ស សត្ថុនោ;

ហដ្ឋោ ហដ្ឋេន ចិត្តេន, បទេ ចិត្តំ បសាទយិំ.

១៨. ‘‘កោរណ្ឌំ បុប្ផិតំ ទិស្វា, បាទបំ ធរណីរុហំ;

សកោសកំ គហេត្វាន, បទសេដ្ឋមបូជយិំ [បទសេដ្ឋេ អបូជយិំ (សី. បី.)].

១៩. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

២០. ‘‘យំ យំ យោនុបបជ្ជាមិ, ទេវត្តំ អថ មានុសំ;

កោរណ្ឌកឆវិ ហោមិ, សុប្បភាសោ [សបភាសោ (សី. ស្យា. បី. ក.)] ភវាមហំ.

២១. ‘‘ទ្វេនវុតេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, បទបូជាយិទំ ផលំ.

២២. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

២៣. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កោរណ្ឌបុប្ផិយោ ថេរោ ឥមា គាថាយោ

អភាសិត្ថាតិ.

កោរណ្ឌបុប្ផិយត្ថេរស្សាបទានំ តតិយំ.

៤. កិំសុកបុប្ផិយត្ថេរអបទានំ

២៥. ‘‘កិំសុកំ បុប្ផិតំ ទិស្វា, បគ្គហេត្វាន អញ្ជលិំ;

ពុទ្ធសេដ្ឋំ សរិត្វាន, អាកាសេ អភិបូជយិំ.

២៦. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

២៧. ‘‘ឯកតិំសេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ពុទ្ធបូជាយិទំ ផលំ.

២៨. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

២៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៣០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កិំសុកបុប្ផិយោ ថេរោ ឥមា គាថាយោ

អភាសិត្ថាតិ.

កិំសុកបុប្ផិយត្ថេរស្សាបទានំ ចតុត្ថំ.

៥. ឧបឌ្ឍទុស្សទាយកត្ថេរអបទានំ

៣១. ‘‘បទុមុត្តរភគវតោ, សុជាតោ នាម សាវកោ;

បំសុកូលំ គវេសន្តោ, សង្ការេ ចរតេ [ចរតី (សី. ក.)] តទា.

៣២. ‘‘នគរេ ហំសវតិយា, បរេសំ ភតកោ អហំ;

ឧបឌ្ឍទុស្សំ ទត្វាន, សិរសា អភិវាទយិំ.

៣៣. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៣៤. ‘‘តេត្តិំសក្ខត្តុំ ទេវិន្ទោ, ទេវរជ្ជមការយិំ;

សត្តសត្តតិក្ខត្តុញ្ច, ចក្កវត្តី អហោសហំ.

៣៥. ‘‘បទេសរជ្ជំ វិបុលំ, គណនាតោ អសង្ខិយំ;

ឧបឌ្ឍទុស្សទានេន, មោទាមិ អកុតោភយោ.

៣៦. ‘‘ឥច្ឆមានោ ចហំ អជ្ជ, សកាននំ សបព្ពតំ;

ខោមទុស្សេហិ ឆាទេយ្យំ, អឌ្ឍទុស្សស្សិទំ ផលំ.

៣៧. ‘‘សតសហស្សិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, អឌ្ឍទុស្សស្សិទំ ផលំ.

៣៨. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៣៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៤០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧបឌ្ឍទុស្សទាយកោ ថេរោ ឥមា

គាថាយោ អភាសិត្ថាតិ.

ឧបឌ្ឍទុស្សទាយកត្ថេរស្សាបទានំ បញ្ចមំ.

៦. ឃតមណ្ឌទាយកត្ថេរអបទានំ

៤១. ‘‘សុចិន្តិតំ ភគវន្តំ, លោកជេដ្ឋំ នរាសភំ;

ឧបវិដ្ឋំ មហារញ្ញំ, វាតាពាធេន បីឡិតំ.

៤២. ‘‘ទិស្វា ចិត្តំ បសាទេត្វា, ឃតមណ្ឌមុបានយិំ;

កតត្តា អាចិតត្តា [ឧបចិតត្តា (ស្យា. ក.)] ច, គង្គា ភាគីរថី អយំ.

៤៣. ‘‘មហាសមុទ្ទា ចត្តារោ, ឃតំ សម្បជ្ជរេ មម;

អយញ្ច បថវី ឃោរា, អប្បមាណា អសង្ខិយា.

៤៤. ‘‘មម សង្កប្បមញ្ញាយ, ភវតេ មធុសក្ករា [មធុសក្ខរា (ស្យា. ក.)];

ចាតុទ្ទីបា ឥមេ រុក្ខា, បាទបា ធរណីរុហា.

៤៥. ‘‘មម សង្កប្បមញ្ញាយ, កប្បរុក្ខា ភវន្តិ តេ;

បញ្ញាសក្ខត្តុំ ទេវិន្ទោ, ទេវរជ្ជមការយិំ.

៤៦. ‘‘ឯកបញ្ញាសក្ខត្តុញ្ច, ចក្កវត្តី អហោសហំ;

បទេសរជ្ជំ វិបុលំ, គណនាតោ អសង្ខិយំ.

៤៧. ‘‘ចតុន្នវុតិតោ [ឆនវុតេ ឥតោ (សី.)] កប្បេ, យំ ទានមទទិំ តទា;

ទុគ្គតិំ នាភិជានាមិ, ឃតមណ្ឌស្សិទំ ផលំ.

៤៨. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៤៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៥០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឃតមណ្ឌទាយកោ ថេរោ ឥមា គាថាយោ

អភាសិត្ថាតិ.

ឃតមណ្ឌទាយកត្ថេរស្សាបទានំ ឆដ្ឋំ.

៧. ឧទកទាយកត្ថេរអបទានំ

៥១. ‘‘បទុមុត្តរពុទ្ធស្ស, ភិក្ខុសង្ឃេ អនុត្តរេ;

បសន្នចិត្តោ សុមនោ, បានីឃដមបូរយិំ.

៥២. ‘‘បព្ពតគ្គេ ទុមគ្គេ វា, អាកាសេ វាថ ភូមិយំ;

យទា បានីយមិច្ឆាមិ, ខិប្បំ និព្ពត្តតេ មម.

៥៣. ‘‘សតសហស្សិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, ទកទានស្សិទំ ផលំ.

៥៤. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

៥៥. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៥៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧទកទាយកោ ថេរោ ឥមា គាថាយោ

អភាសិត្ថាតិ.

ឧទកទាយកត្ថេរស្សាបទានំ សត្តមំ.

៨. បុលិនថូបិយត្ថេរអបទានំ

៥៧. ‘‘ហិមវន្តស្សាវិទូរេ, យមកោ នាម បព្ពតោ;

អស្សមោ សុកតោ មយ្ហំ, បណ្ណសាលា សុមាបិតា.

៥៨. ‘‘នារទោ នាម នាមេន, ជដិលោ ឧគ្គតាបនោ;

ចតុទ្ទសសហស្សានិ, សិស្សា បរិចរន្តិ មំ.

៥៩. ‘‘បដិសល្លីនកោ សន្តោ, ឯវំ ចិន្តេសហំ តទា;

‘សព្ពោ ជនោ មំ បូជេតិ, នាហំ បូជេមិ កិញ្ចនំ.

៦០. ‘‘‘ន មេ ឱវាទកោ អត្ថិ, វត្តា កោចិ ន វិជ្ជតិ;

អនាចរិយុបជ្ឈាយោ, វនេ វាសំ ឧបេមហំ.

៦១. ‘‘‘ឧបាសមានោ យមហំ, គរុចិត្តំ ឧបដ្ឋហេ;

សោ មេ អាចរិយោ នត្ថិ, វនវាសោ និរត្ថកោ.

៦២. ‘‘‘អាយាគំ មេ គវេសិស្សំ, គរុំ ភាវនិយំ តថា;

សាវស្សយោ វសិស្សាមិ, ន កោចិ គរហិស្សតិ’.

៦៣. ‘‘ឧត្តានកូលា នទិកា, សុបតិត្ថា មនោរមា;

សំសុទ្ធបុលិនាកិណ្ណា, អវិទូរេ មមស្សមំ.

៦៤. ‘‘នទិំ អមរិកំ នាម, ឧបគន្ត្វានហំ តទា;

សំវឌ្ឍយិត្វា បុលិនំ, អកំ បុលិនចេតិយំ.

៦៥. ‘‘យេ តេ អហេសុំ សម្ពុទ្ធា, ភវន្តករណា មុនី;

តេសំ ឯតាទិសោ ថូបោ, តំ និមិត្តំ ករោមហំ.

៦៦. ‘‘ករិត្វា បុលិនំ [បុឡិនេ (សី. ស្យា. បី.)] ថូបំ, សោវណ្ណំ មាបយិំ អហំ;

សោណ្ណកិង្កណិបុប្ផានិ, សហស្សេ តីណិ បូជយិំ.

៦៧. ‘‘សាយបាតំ នមស្សាមិ, វេទជាតោ កតញ្ជលី;

សម្មុខា វិយ សម្ពុទ្ធំ, វន្ទិំ បុលិនចេតិយំ.

៦៨. ‘‘យទា កិលេសា ជាយន្តិ, វិតក្កា គេហនិស្សិតា;

សរាមិ សុកតំ ថូបំ, បច្ចវេក្ខាមិ តាវទេ.

៦៩. ‘‘ឧបនិស្សាយ វិហរំ, សត្ថវាហំ វិនាយកំ;

កិលេសេ សំវសេយ្យាសិ, ន យុត្តំ តវ មារិស.