៩. សុភទ្ទត្ថេរអបទានំ

១០១. ‘‘បទុមុត្តរោ លោកវិទូ, អាហុតីនំ បដិគ្គហោ;

ជនតំ ឧទ្ធរិត្វាន, និព្ពាយតិ មហាយសោ.

១០២. ‘‘និព្ពាយន្តេ ច សម្ពុទ្ធេ, ទសសហស្សិ កម្បថ;

ជនកាយោ មហា អាសិ, ទេវា សន្និបតុំ តទា.

១០៣. ‘‘ចន្ទនំ បូរយិត្វាន, តគរាមល្លិកាហិ ច;

ហដ្ឋោ ហដ្ឋេន ចិត្តេន, អារោបយិំ [អាលេបេសិំ (សី.), អារោបេសិំ (ស្យា.)] នរុត្តមំ.

១០៤. ‘‘មម សង្កប្បមញ្ញាយ, សត្ថា លោកេ អនុត្តរោ;

និបន្នកោវ សម្ពុទ្ធោ, ឥមា គាថា អភាសថ.

១០៥. ‘‘‘យោ មេ បច្ឆិមកេ កាលេ, គន្ធមាលេន [គន្ធមល្លេន (ស្យា. ក.) នបុំសកេកត្តំ មនសិកាតព្ពំ] ឆាទយិ;

តមហំ កិត្តយិស្សាមិ, សុណាថ មម ភាសតោ.

១០៦. ‘‘‘ឥតោ ចុតោ អយំ បោសោ, តុសិតកាយំ គមិស្សតិ;

តត្ថ រជ្ជំ ករិត្វាន, និម្មានំ សោ គមិស្សតិ.

១០៧. ‘‘‘ឯតេនេវ ឧបាយេន, ទត្វា មាលំ [មល្យំ (សី.), មល្លំ (ស្យា. ក.)] វរុត្តមំ;

សកកម្មាភិរទ្ធោ សោ, សម្បត្តិំ អនុភោស្សតិ.

១០៨. ‘‘‘បុនាបិ តុសិតេ កាយេ, និព្ពត្តិស្សតិយំ នរោ;

តម្ហា កាយា ចវិត្វាន, មនុស្សត្តំ គមិស្សតិ.

១០៩. ‘‘‘សក្យបុត្តោ មហានាគោ, អគ្គោ លោកេ សទេវកេ;

ពោធយិត្វា ពហូ សត្តេ, និព្ពាយិស្សតិ ចក្ខុមា.

១១០. ‘‘‘តទា សោបគតោ សន្តោ, សុក្កមូលេន ចោទិតោ;

ឧបសង្កម្ម សម្ពុទ្ធំ, បញ្ហំ បុច្ឆិស្សតិ តទា.

១១១. ‘‘‘ហាសយិត្វាន សម្ពុទ្ធោ, សព្ពញ្ញូ លោកនាយកោ;

បុញ្ញកម្មំ បរិញ្ញាយ, សច្ចានិ វិវរិស្សតិ.

១១២. ‘‘‘អារទ្ធោ ច អយំ បញ្ហោ, តុដ្ឋោ ឯកគ្គមានសោ;

សត្ថារំ អភិវាទេត្វា, បព្ពជ្ជំ យាចយិស្សតិ.

១១៣. ‘‘‘បសន្នមានសំ ទិស្វា, សកកម្មេន តោសិតំ;

បព្ពាជេស្សតិ សោ ពុទ្ធោ, អគ្គមគ្គស្ស កោវិទោ.

១១៤. ‘‘‘វាយមិត្វានយំ បោសោ, សម្មាសម្ពុទ្ធសាសនេ;

សព្ពាសវេ បរិញ្ញាយ, និព្ពាយិស្សតិនាសវោ’.

បញ្ចមភាណវារំ.

១១៥. ‘‘បុព្ពកម្មេន សំយុត្តោ, ឯកគ្គោ សុសមាហិតោ;

ពុទ្ធស្ស ឱរសោ បុត្តោ, ធម្មជោម្ហិ សុនិម្មិតោ.

១១៦. ‘‘ធម្មរាជំ ឧបគម្ម, អបុច្ឆិំ បញ្ហមុត្តមំ;

កថយន្តោ ច មេ បញ្ហំ, ធម្មសោតំ ឧបានយិ.

១១៧. ‘‘តស្សាហំ ធម្មមញ្ញាយ, វិហាសិំ សាសនេ រតោ;

សព្ពាសវេ បរិញ្ញាយ, វិហរាមិ អនាសវោ.

១១៨. ‘‘សតសហស្សិតោ កប្បេ, ជលជុត្តមនាយកោ;

និព្ពាយិ អនុបាទានោ, ទីបោវ តេលសង្ខយា.

១១៩. ‘‘សត្តយោជនិកំ អាសិ, ថូបញ្ច រតនាមយំ;

ធជំ តត្ថ អបូជេសិំ, សព្ពភទ្ទំ មនោរមំ.

១២០. ‘‘កស្សបស្ស ច ពុទ្ធស្ស, តិស្សោ នាមគ្គសាវកោ;

បុត្តោ មេ ឱរសោ អាសិ, ទាយាទោ ជិនសាសនេ.

១២១. ‘‘តស្ស ហីនេន មនសា, វាចំ ភាសិំ អភទ្ទកំ;

តេន កម្មវិបាកេន, បច្ឆា មេ អាសិ ភទ្ទកំ [បច្ឆិមេ អទ្ទសំ ជិនំ (សី.)].

១២២. ‘‘ឧបវត្តនេ សាលវនេ, បច្ឆិមេ សយនេ មុនិ;

បព្ពាជេសិ មហាវីរោ, ហិតោ ការុណិកោ ជិនោ.

១២៣. ‘‘អជ្ជេវ ទានិ បព្ពជ្ជា, អជ្ជេវ ឧបសម្បទា;

អជ្ជេវ បរិនិព្ពានំ, សម្មុខា ទ្វិបទុត្តមេ.

១២៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សុភទ្ទោ ថេរោ ឥមា គាថាយោ អភាសិត្ថាតិ.

សុភទ្ទត្ថេរស្សាបទានំ នវមំ.