១០. ចុន្ទត្ថេរអបទានំ

១២៥. ‘‘សិទ្ធត្ថស្ស ភគវតោ, លោកជេដ្ឋស្ស តាទិនោ;

អគ្ឃិយំ ការយិត្វាន, ជាតិបុប្ផេហិ ឆាទយិំ.

១២៦. ‘‘និដ្ឋាបេត្វាន តំ បុប្ផំ, ពុទ្ធស្ស ឧបនាមយិំ;

បុប្ផាវសេសំ បគ្គយ្ហ, ពុទ្ធស្ស អភិរោបយិំ.

១២៧. ‘‘កញ្ចនគ្ឃិយសង្កាសំ, ពុទ្ធំ លោកគ្គនាយកំ;

បសន្នចិត្តោ សុមនោ, បុប្ផគ្ឃិយមុបានយិំ.

១២៨. ‘‘វិតិណ្ណកង្ខោ សម្ពុទ្ធោ, តិណ្ណោឃេហិ បុរក្ខតោ;

ភិក្ខុសង្ឃេ និសីទិត្វា, ឥមា គាថា អភាសថ.

១២៩. ‘‘‘ទិព្ពគន្ធំ បវាយន្តំ, យោ មេ បុប្ផគ្ឃិយំ អទា;

តមហំ កិត្តយិស្សាមិ, សុណាថ មម ភាសតោ.

១៣០. ‘‘‘ឥតោ ចុតោ អយំ បោសោ, ទេវសង្ឃបុរក្ខតោ;

ជាតិបុប្ផេហិ បរិកិណ្ណោ, ទេវលោកំ គមិស្សតិ.

១៣១. ‘‘‘ឧព្ពិទ្ធំ ភវនំ តស្ស, សោវណ្ណញ្ច មណីមយំ;

ព្យម្ហំ បាតុភវិស្សតិ, បុញ្ញកម្មប្បភាវិតំ.

១៣២. ‘‘‘ចតុសត្តតិក្ខត្តុំ សោ, ទេវរជ្ជំ ករិស្សតិ;

អនុភោស្សតិ សម្បត្តិំ, អច្ឆរាហិ បុរក្ខតោ.

១៣៣. ‘‘‘បថព្យា រជ្ជំ តិសតំ, វសុធំ អាវសិស្សតិ;

បញ្ចសត្តតិក្ខត្តុញ្ច, ចក្កវត្តី ភវិស្សតិ.

១៣៤. ‘‘‘ទុជ្ជយោ នាម នាមេន, ហេស្សតិ មនុជាធិបោ;

អនុភោត្វាន តំ បុញ្ញំ, សកកម្មំ អបស្សិតោ [សកកម្មូបសំហិតោ (ស្យា.)].

១៣៥. ‘‘‘វិនិបាតំ អគន្ត្វាន, មនុស្សត្តំ គមិស្សតិ;

ហិរញ្ញំ តស្ស [ហិរញ្ញស្ស ច (សី. ក.)] និចិតំ, កោដិសតមនប្បកំ.

១៣៦. ‘‘‘និព្ពត្តិស្សតិ យោនិម្ហិ, ព្រាហ្មណេ សោ ភវិស្សតិ;

វង្គន្តស្ស សុតោ ធីមា, សារិយា ឱរសោ បិយោ.

១៣៧. ‘‘‘សោ ច បច្ឆា បព្ពជិត្វា, អង្គីរសស្ស សាសនេ;

ចូឡចុន្ទោតិ [ចូលចុន្ទោតិ (សី.)] នាមេន, ហេស្សតិ សត្ថុ សាវកោ.

១៣៨. ‘‘‘សាមណេរោវ សោ សន្តោ, ខីណាសវោ ភវិស្សតិ;

សព្ពាសវេ បរិញ្ញាយ, និព្ពាយិស្សតិនាសវោ’.

១៣៩. ‘‘ឧបដ្ឋហិំ មហាវីរំ, អញ្ញេ ច បេសលេ ពហូ;

ភាតរំ មេ ចុបដ្ឋាសិំ, ឧត្តមត្ថស្ស បត្តិយា.

១៤០. ‘‘ភាតរំ មេ ឧបដ្ឋិត្វា, ធាតុំ បត្តម្ហិ ឱហិយ [ឱបិយ (សី.), ឱចិយ (ស្យា.)];

សម្ពុទ្ធំ ឧបនាមេសិំ, លោកជេដ្ឋំ នរាសភំ.

១៤១. ‘‘ឧភោ ហត្ថេហិ បគ្គយ្ហ, ពុទ្ធោ លោកេ សទេវកេ;

សន្ទស្សយន្តោ តំ ធាតុំ, កិត្តយិ អគ្គសាវកំ.

១៤២. ‘‘ចិត្តញ្ច សុវិមុត្តំ មេ, សទ្ធា មយ្ហំ បតិដ្ឋិតា;

សព្ពាសវេ បរិញ្ញាយ, វិហរាមិ អនាសវោ.

១៤៣. ‘‘បដិសម្ភិទានុប្បត្តា, វិមោក្ខាបិ ច ផស្សិតា [បដិសម្ភិទា ចតស្សោ, វិមោក្ខាបិ ច អដ្ឋិមេ (ស្យា.)];

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ចុន្ទោ ថេរោ ឥមា គាថាយោ អភាសិត្ថាតិ.

ចុន្ទត្ថេរស្សាបទានំ ទសមំ.

ឧបាលិវគ្គោ បញ្ចមោ.