៨. ចង្កមនទាយកត្ថេរអបទានំ

៩៣. ‘‘អត្ថទស្សិស្ស មុនិនោ, លោកជេដ្ឋស្ស តាទិនោ;

ឥដ្ឋកាហិ ចិនិត្វាន, ចង្កមំ ការយិំ អហំ.

៩៤. ‘‘ឧច្ចតោ បញ្ចរតនំ, ចង្កមំ សាធុមាបិតំ;

អាយាមតោ ហត្ថសតំ, ភាវនីយ្យំ មនោរមំ.

៩៥. ‘‘បដិគ្គហេសិ ភគវា, អត្ថទស្សី នរុត្តមោ;

ហត្ថេន បុលិនំ គយ្ហ, ឥមា គាថា អភាសថ.

៩៦. ‘‘‘ឥមិនា បុលិនទានេន, ចង្កមំ សុកតេន ច;

សត្តរតនសម្បន្នំ, បុលិនំ អនុភោស្សតិ.

៩៧. ‘‘‘តីណិ កប្បានិ ទេវេសុ, ទេវរជ្ជំ ករិស្សតិ;

អនុភោស្សតិ សម្បត្តិំ, អច្ឆរាហិ បុរក្ខតោ.

៩៨. ‘‘‘មនុស្សលោកមាគន្ត្វា, រាជា រដ្ឋេ ភវិស្សតិ;

តិក្ខត្តុំ ចក្កវត្តី ច, មហិយា សោ ភវិស្សតិ’.

៩៩. ‘‘អដ្ឋារសេ កប្បសតេ, យំ កម្មមករិំ តទា;

ទុគ្គតិំ នាភិជានាមិ, ចង្កមស្ស ឥទំ ផលំ.

១០០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ចង្កមនទាយកោ ថេរោ ឥមា គាថាយោ អភាសិត្ថាតិ.

ចង្កមនទាយកត្ថេរស្សាបទានំ អដ្ឋមំ.