៧. សយនទាយកត្ថេរអបទានំ

៨៨. ‘‘សិទ្ធត្ថស្ស ភគវតោ, មេត្តចិត្តស្ស តាទិនោ;

សយនគ្គំ មយា ទិន្នំ, ទុស្សភណ្ឌេហិ [ទុស្សភណ្ឌេន (ស្យា.)] អត្ថតំ.

៨៩. ‘‘បដិគ្គហេសិ ភគវា, កប្បិយំ សយនាសនំ;

ឧដ្ឋាយ សយនា [អាសនា (សី.)] តម្ហា, វេហាសំ ឧគ្គមី ជិនោ.

៩០. ‘‘ចតុន្នវុតិតោ កប្បេ, យំ សយនមទាសហំ;

ទុគ្គតិំ នាភិជានាមិ, សយនស្ស ឥទំ ផលំ.

៩១. ‘‘ឯកបញ្ញាសិតោ កប្បេ, វរកោ [វរុណោ (សី. ស្យា.)] ទេវសវ្ហយោ;

សត្តរតនសម្បន្នោ, ចក្កវត្តី មហព្ពលោ.

៩២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សយនទាយកោ ថេរោ ឥមា គាថាយោ អភាសិត្ថាតិ.

សយនទាយកត្ថេរស្សាបទានំ សត្តមំ.