៩. ធម្មរុចិយត្ថេរអបទានំ

១៦៤. ‘‘យទា ទីបង្ករោ ពុទ្ធោ, សុមេធំ ព្យាករី ជិនោ;

‘អបរិមេយ្យេ ឥតោ កប្បេ, អយំ ពុទ្ធោ ភវិស្សតិ.

១៦៥. ‘‘‘ឥមស្ស ជនិកា មាតា, មាយា នាម ភវិស្សតិ;

បិតា សុទ្ធោទនោ នាម, អយំ ហេស្សតិ គោតមោ.

១៦៦. ‘‘‘បធានំ បទហិត្វាន, កត្វា ទុក្ករការិកំ;

អស្សត្ថមូលេ សម្ពុទ្ធោ, ពុជ្ឈិស្សតិ មហាយសោ.

១៦៧. ‘‘‘ឧបតិស្សោ កោលិតោ ច, អគ្គា ហេស្សន្តិ សាវកា;

អានន្ទោ នាម នាមេន [អានន្ទោ នាមុបដ្ឋាកោ (ស្យា.)], ឧបដ្ឋិស្សតិមំ ជិនំ.

១៦៨. ‘‘‘ខេមា ឧប្បលវណ្ណា ច, អគ្គា ហេស្សន្តិ សាវិកា;

ចិត្តោ អាឡវកោ ចេវ, អគ្គា ហេស្សន្តុបាសកា.

១៦៩. ‘‘‘ខុជ្ជុត្តរា នន្ទមាតា, អគ្គា ហេស្សន្តុបាសិកា;

ពោធិ ឥមស្ស វីរស្ស, អស្សត្ថោតិ បវុច្ចតិ’.

១៧០. ‘‘ឥទំ សុត្វាន វចនំ, អសមស្ស មហេសិនោ;

អាមោទិតា នរមរូ, នមស្សន្តិ កតញ្ជលី.

១៧១. ‘‘តទាហំ មាណវោ អាសិំ, មេឃោ នាម សុសិក្ខិតោ;

សុត្វា ព្យាករណំ សេដ្ឋំ, សុមេធស្ស មហាមុនេ.

១៧២. ‘‘សំវិសដ្ឋោ ភវិត្វាន, សុមេធេ ករុណាសយេ [ករុណាលយេ (ស្យា.)];

បព្ពជន្តញ្ច តំ វីរំ, សហាវ អនុបព្ពជិំ.

១៧៣. ‘‘សំវុតោ បាតិមោក្ខស្មិំ, ឥន្ទ្រិយេសុ ច បញ្ចសុ;

សុទ្ធាជីវោ សតោ វីរោ, ជិនសាសនការកោ.

១៧៤. ‘‘ឯវំ វិហរមានោហំ, បាបមិត្តេន កេនចិ;

និយោជិតោ អនាចារេ, សុមគ្គា បរិធំសិតោ.

១៧៥. ‘‘វិតក្កវសិកោ ហុត្វា, សាសនតោ អបក្កមិំ;

បច្ឆា តេន កុមិត្តេន, បយុត្តោ មាតុឃាតនំ.

១៧៦. ‘‘អករិំ អានន្តរិយំ [អករិំ នន្តរិយញ្ច (ស្យា. ក.)], ឃាតយិំ ទុដ្ឋមានសោ;

តតោ ចុតោ មហាវីចិំ, ឧបបន្នោ សុទារុណំ.

១៧៧. ‘‘វិនិបាតគតោ សន្តោ, សំសរិំ ទុក្ខិតោ ចិរំ;

ន បុនោ អទ្ទសំ វីរំ, សុមេធំ នរបុង្គវំ.

១៧៨. ‘‘អស្មិំ កប្បេ សមុទ្ទម្ហិ, មច្ឆោ អាសិំ តិមិង្គលោ;

ទិស្វាហំ សាគរេ នាវំ, គោចរត្ថមុបាគមិំ.

១៧៩. ‘‘ទិស្វា មំ វាណិជា ភីតា, ពុទ្ធសេដ្ឋមនុស្សរុំ;

គោតមោតិ មហាឃោសំ, សុត្វា តេហិ ឧទីរិតំ.

១៨០. ‘‘បុព្ពសញ្ញំ សរិត្វាន, តតោ កាលង្កតោ អហំ;

សាវត្ថិយំ កុលេ ឥទ្ធេ, ជាតោ ព្រាហ្មណជាតិយំ.

១៨១. ‘‘អាសិំ ធម្មរុចិ នាម, សព្ពបាបជិគុច្ឆកោ;

ទិស្វាហំ លោកបជ្ជោតំ, ជាតិយា សត្តវស្សិកោ.

១៨២. ‘‘មហាជេតវនំ គន្ត្វា, បព្ពជិំ អនគារិយំ;

ឧបេមិ ពុទ្ធំ តិក្ខត្តុំ, រត្តិយា ទិវសស្ស ច.

១៨៣. ‘‘តទា ទិស្វា មុនិ អាហ, ចិរំ ធម្មរុចីតិ មំ;

តតោហំ អវចំ ពុទ្ធំ, បុព្ពកម្មបភាវិតំ.

១៨៤. ‘‘សុចិរំ សតបុញ្ញលក្ខណំ, បតិបុព្ពេន វិសុទ្ធបច្ចយំ;

អហមជ្ជសុបេក្ខនំ វត, តវ បស្សាមិ និរុបមំ វិគ្គហំ [និរូបមគ្គហំ (សី.)].

១៨៥. ‘‘សុចិរំ វិហតត្តមោ មយា, សុចិរក្ខេន នទី វិសោសិតា;

សុចិរំ អមលំ វិសោធិតំ, នយនំ ញាណមយំ មហាមុនេ.

១៨៦. ‘‘ចិរកាលសមង្គិតោ [ចិរកាលំ សមាគតោ (បី.)] តយា, អវិនដ្ឋោ បុនរន្តរំ ចិរំ;

បុនរជ្ជសមាគតោ តយា, ន ហិ នស្សន្តិ កតានិ គោតម.

១៨៧. ‘‘កិលេសា ឈាបិតា មយ្ហំ…បេ… វិហរាមិ អនាសវោ.

១៨៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៨៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ធម្មរុចិយោ ថេរោ ឥមា គាថាយោ

អភាសិត្ថាតិ.

ធម្មរុចិយត្ថេរស្សាបទានំ នវមំ.